I Pita 5:5 - Edo Bible (E Baibol Ẹdo) Version 1996

⁵ Erriọ vbe nọ zẹẹ, wa ne igbama, wa gha gbe uhunmwu ke otọ ne avbe eniwanrẹn. Wa hia fẹẹrẹ ghi rhie ukugba imuegberriotọ gba, ne uwa ya gha ru ne egbe rhunmwuda ebe khare wẹẹ, “Osanobua mu aro igbinna da e nọ tọn egbe mu, sokpan ọ ghi gha rhie ẹsọhẹ ne ne ọ mu egbe rri otọ.”

I Pita 5:5 ပူးပေါင်းရင်းမြစ်များ

II Krọnikol 6:41

Guakpao nian e Nọyaẹnmwa Osanobua, uwẹ kevbe Ẹkpẹti Ile ne ima ya rẹn ẹtin ruẹn, la uwu Ọgua Osa ne u gha rre evba ni rhinrin ẹdẹ. Fiangbe avbe ohẹn ruẹn vbe emwi ne iran ru hia, ne ọyẹnmwẹ gha sẹ emwa ruẹn hia rhunmwuda ne u na maa ne iran.

Job 22:29

Osanobua si ọmwa itengbemu gbe otọ ọ keghi miẹn ne ọ mu egbe rriotọ fan.

Job 29:14

Uhẹn uhẹn ọ re I hẹko gha ru emwi re.

Psalm 132:16

I gha fiangbe emwi ne avbe ohẹn ni rrọ ru hia, avbe emwa rẹn ghi gha wee, iran ghi gha so ihuan oghọghọ.

Psalm 132:9

Te avbe ohẹn ruẹn ghaa ru vbene ọ ke yi vbe ẹghẹ hia, te avbe emwa ruẹn gha a wee ne oghọghọ.

Psalm 138:6

A gha rhe miẹn wẹẹ ehe ne u ye vbe odukhunmwu yo ẹsẹse, te u ye zẹ ye avbe emwa ne a ma rẹn re, iran ni tọn egbe mu i vbe sẹtin lẹre ne uẹn.

Itan 25:7

A tie ruẹ wẹ ne u do tota ye ehe ne ọ sikẹ odaro sẹẹ, ọre ọ maa sẹẹ ne a tama ruẹn wẹ ne u kpaegbe ne ọmwa ne ọ ru okpọmwa sẹ ruẹ tota.

Itan 3:34

Ẹ i mwẹ emwi ne ọ ya iran ni ya obọ rra ẹwẹe iran ru, sokpan, ọ wa ru iran ni mu egbe rriotọ ẹse.

Aizaia 57:15

“Mẹ ọrọre Osanobua ne ọ yo kevbe ne ọ kpọlọ ne ọ rrọ ẹdẹdẹmwẹdẹ. Ehe ne ọ yo kevbe ne ọ huanrẹn ọ re imẹ dia, sokpan mẹ vbe di ọghe iran ni mu egbe rriotọ, kevbe ni roiro fi uyinmwẹ werriẹ ya, ne imẹ miẹn ehe na rhie idaehọ kevbe imuẹntiyan ọghe iran werriegbe ye ihe.

Aizaia 61:10

Ẹko rhiẹnrhiẹn Jerusalẹm rhunmwuda iwinna ne Nọyaẹnmwa winna ẹn. Te ọ yevbe ọha ne a mu ẹre egbe irhiọha. Osanobua ya imiẹnfan kevbe akhọnmiotọ yo ẹre ẹwu.

Aizaia 66:2

Mẹ ọ re ọ tobọmwẹ yi agbọn na hia. Ẹko avbe emwa ni mu egbe rriotọ ke ni roiro fiwerriẹ wa ma mwẹ iran ni mu ohan mwẹ, ni vbe họn ẹmwẹ mẹ.

Ezikiẹl 26:16

Avbe ọba avbe uhunmwu ẹvbo nii ghi gua okọ ye okun hia, gha tuorre ke ẹkete iran rre. Iran gha kie ẹwu iran kevbe ukpọn ne a do ọghe iran, iran ghi tota lele otọ gha guọ zẹzẹzẹ. Emwi ne ọ rruan ruẹn gha mu iran ohan sẹrriọ wẹ, iran i ghi ra sẹtin dobọ uguọmwẹ yi.

Daniẹl 11:12

Rẹn gha ye akhọnmiotọ ẹre kevbe ubunmwẹ avbe ivbiyokuo ne ọ gbele rhuọ. Sokpan, ẹ i ra wa gha khọnmiotọ khian rhinrin.

Levitikọs 19:32

“Wa gha daa ne avbe ọmaẹn, gha ya ọghọ ne iran, rhunmwuda ighẹ wa mu ohan mwẹ. Mẹ ọ re Nọyaẹnmwa.

Iyẹn ne ọ Maan Ọghe Luk 22:26

Sokpan, Ọghe uwa, i yerriọ, sokpan ne ọre ne ọ kpọlọ sẹ vbe uwu uwa, ọ kere ne ọ gha yevbe ne ọ ru ọvbokhan sẹ vbe ehia.

Ebe ne Pọl gbẹẹn gie emwa Rom 12:10

Wa kakabọ gha ho ẹmwẹ egbe zẹ vbe etẹn vbe uwu Kristi, wa gie ẹe gha bọbọ uwa egbe ighẹ ẹmwẹ ọghọ na rhie ne egbe.

Ebe ne Pọl gbẹẹn gie emwa Rom 13:14

Sokpan wa viọ emwi igbinna ọghe Nọyaẹnmwa Jesu Kristi mwẹ obọ, wa ghẹ gie ẹmwẹ egbe orukhọ uwa mu uwa, vbe ekpa ne uwa na rhie emwi ne ọ ho nẹẹn ne ẹko vuọẹn.

Ẹfisọs 5:21

Wa gha gbe uhunmwu ke otọ ne egbe, rhunmwuda ọghọ ne uwa ya ne Jesu.

Filipai 2:3

Wa ghẹ ya ekhọe a gua ye ẹgẹn ọmwa ọkpa ru emwi rhọkpa, ra ekhọe a ba wẹ, sokpan wa gba gha daa ne egbe, vbene u i na ro ighẹ wẹ maa sẹ ọmwa ọvbehe.

Kọlose 3:12

Emwa Osanobua ọre uwa khin, ọ ho ẹmwẹ uwa, ọ keghi vbe hannọ uwa zẹ ne ọ ya ru ọghọe, rhunmwuda ọnii, wa gha mwẹ ekhọe agiẹngiẹn, itohan imuegberriotọ, ọmẹhẹ, ufumwẹ kevbe iziengbe.

I Timoti 5:1

Ghẹ gu ọmwa ne ọwan sẹ ruẹ gui, sokpan heko gu ẹe guan vbene a miẹn wẹ erha a nọ. Gha ya obọ mu iran ne u wan sẹẹ, zẹ vbe etuẹn ne ikpia,

Hibru 13:17

Wa gha họn ẹmwẹ ne avbe ọkaolotu uwa, wa gha ru vbene iran kha re. Iran ọre ọ gbe aro ghe orhiọn uwa vbe ne a i na hẹwẹ, rhunmwuda ighẹ iran na iyẹn iwinna iran ma Osanobua. Wa ghẹ ghi gha họn ẹmwẹ ne iran nẹ, iran ghi gha ya ọyẹnmwẹ winna iwinna iran, a deghẹ ẹ i ghi ye rriọ, iran ghi gha ye ẹkorriaramwẹ winnaẹn, iyobọ ọkpa i rrọọ ne ọnii gha ru ne uwa.

Jems 4:6

Sokpan, uhin ighẹ ẹsọhẹ ne Osanobua rhie ne ọmwa, ọre ọ wo vbe egbe sẹ. Rhunmwuda ebe khare wẹ, “Te Osanobua mu aro ne ọkhọ da iran ni tọn egbe mu, sokpan ọ ghi gha rhie ẹsọhẹ ne iran ni mu egbe rriotọ.”

I Pita 3:8

Ne I ya fian ẹre ifi: wa gie vbene uwa ziro kevbe vbene emwi ye vbe ekhọe uwa, gha ya kugbe. Wa gha ho ẹmwẹ egbe, zẹ vbe etentẹn ne ikpia. Wa gha mwẹ itohan ghe egbe, ne uwa vbe gha mu egbe rri otọ ne egbe.

I Pita 4:1

Vbene a ghi na miẹn wẹ, ikinnegbe ọre Kristi ya rri oya, wa vbe ya egbe iro vberriọ rhie ẹtin ye egbe uwa iwu, rhunmwuda ọmwa ne ọ ghi rri oya nẹ vbe egbe, ẹ i ghi de fi orukhọ.

I Pita 4:5

Sokpan, iran gha ya ye unu iran na iyẹn egbe iran ma Osanobua, ne ọ mu egbe ne ọ ya bu ohiẹn ni wulo nẹ kevbe ni ma he wulo.