I Pita 4:11 - Edo Bible (E Baibol Ẹdo) Version 1996

¹¹ Ne ọ kpe orhu, we ne ọ gha kpe orhu ẹmwẹ Osanobua, ne ọ ga emwa ọvbehe, we ne ọ gha ya ẹtin ne Osanobua rhie nẹẹn hia ga, ne a miẹn ehe na miẹn wẹ, vbe uwu emwi hia, te a ghi la ekpa Jesu Kristi rhie urhomwẹ ne Osanobua, ọmwa ne ọ yan ẹtin kevbe uyi ẹdẹ kevbe ẹdẹdẹmwẹdẹ. Isẹ.

I Pita 4:11 ပူးပေါင်းရင်းမြစ်များ

Psalm 145:13

Te uwẹ khaemwisẹ ẹdẹdẹmwẹdẹ, ọba etẹbitẹ ọ re uwẹ khin, te Nọyaẹnmwa wa ru zẹ vbene ọ yanrẹn, emwi ne irẹn ru hia ọ re ọ wa maa.

Aizaia 8:20

Wẹ ghi zẹ wanniẹn iran wẹẹ, “Danmwehọ emwi ne Nọyaẹnmwa ma uwa ẹre! Wa ghẹ danmwehọ avbe iran ni miẹn aro, emwi ne iran ra tama uwa i mwẹ asa ne ọ ye ne uwa.”

Jerimaia 23:22

Akpawẹ te iran rẹn iro ẹkhokho ekhọe mwẹ, iran gha ta uhunmwu ne I gie ma emwa mwẹ, iran gha te ru ẹe ne iran sẹ uyinmwẹ dan ne iran yin kevbe emwi dan ne iran ru rae.

Daniẹl 4:3

“ ‘U miẹn vbe ọyunnuan ne Osanobua rhie ma mwa kpọlọ hẹ! U miẹn vbe avbe iwinna ọyunnuan rẹn ne ọ winna kọnkọn hẹ! Osanobua ọ re ọ khian gha re ọba ẹdẹdẹmwẹdẹ ọ gha rre asẹ ẹdẹ kevbe ẹdẹdẹmwẹdẹ.’

Daniẹl 4:34

Ọba keghi kha wẹẹ, “Ugbẹn vbe ukpo ihinrọn nii ghi ghaa nẹ, I keghi tọn aro mu ghe iso, ẹrherhe mwẹ keghi gba vbe uhunmwu. I keghi rho Osanobua ne ọ Sẹehia, I keghi rhie ọghọ kevbe uyi ne irẹn nii ne ọ rrọ ẹdẹdẹmwẹdẹ. “ ‘Rẹn gha rriọba ẹdẹdẹmwẹdẹ otọe arriọba ẹre gha rrọ etẹbitẹghori.

Daniẹl 7:14

A keghi rhie asẹ, uyi, kevbe ẹtin ọba nẹẹn, ne emwa uhunmwu ẹvbo hia, emwa, kevbe ẹvbo ne a zẹ, miẹn ehe na gha kpe gae. Asẹ ọre ghi gha rrọ rhinrin ẹdẹ, arriọba ẹre i vbe mwẹ ufomwẹ.

Matiu 6:13

Ghẹ gia danmwẹ mwa ghe, rhie mwa lẹre hin obọ Ọkaẹrhia Nii.’

Iyẹn ne ọ Maan Ọghe Jọn 13:31

Judas ghi kpao nẹ, Jesu keghi wẹẹ, “Banbanna nian, a rhie uyi Ovbi Ọmwa maa, a keghi vbe la egbe ẹre rhie uyi Osanobua maa.

Iwinna 7:38

Rẹn ọre ọ gu ivbi Izrẹl gha rrọọ vbe ehe ne iran si koko yi vbe uwu ato, rẹn ọre ọ gu avbe erha mwa odede gha rrọọ kevbe odibosa ne ọ gu ẹe guan vbe uhunmwu oke Sainai, rẹn ọre ọ rhan obọ miẹn uhunmwu ne Osanobua gie, o keghi do tama ima.

Ebe ne Pọl gbẹẹn gie emwa Rom 11:36

Rhunmwuda rẹn ọre ọ yi emwi hia, rhunmwuda ẹre ọre emwi hia na rrọọ, rẹn iran vbe rrọọ na: Uyi ọre ọghe Osanobua ẹdẹdẹmwẹdẹ. Isẹ!

Ebe ne Pọl gbẹẹn gie emwa Rom 12:3

Rhunmwuda, ẹsọhẹ Osanobua ne ọ ya ru mwẹ ẹse, I tama uwa hia wẹẹ, wa ghẹ mwa egbe ye ukpo ne ọ gberra ehe ne ọ ke yi. Sokpan wa gha re ne ẹ i si ukankan vbe iro ne uwa zẹ, ne dọmwadẹ ọghọe vbe uwu uwa gha mwa egbe ẹre ye vbene Osanobua rhie iyayi nẹẹn sẹ.

Ebe ne Pọl gbẹẹn gie emwa Rom 16:27

Osanobua ọkpa nii ọmwa ne irẹn ọkpa mwẹ ẹwaẹn hia, ọre uyi gha rrọọ na vbekpa Jesu Kristi ẹdẹdẹmwẹdẹ. Isẹ.

Ebe ne Pọl gbẹẹn gie emwa Rom 3:2

Ẹsẹse, vbe ẹmwata, vbe odẹ hia. Vbe ne okaro, avbe Ju ọre Osanobua rhie ẹmwẹ ọnrẹn nẹ rhie mwẹ.

I Kọrinti 10:31

Vbene ọ rhirhi gha ye hẹ, ne uwẹ a rhirhi ru vbọ, te u re nọ re ra te u re ne ọ da, gha ru ehia ne uyi Osanobua.

I Kọrinti 12:4

Emwi Orhiọn ne a ya wẹ ọmwa ughughan ọre ọ rrọọ, sokpan Orhiọn Osanobua ọkpa nii ọre ọ ya ẹe we ọmwa.

I Kọrinti 3:10

Vbe uwu ne I na lo emwi ne Osanobua ya we mwẹ, I keghi bọ owa zẹ vbe ọmwa ne ọ rẹn iwinna ẹsẹse. I keghi gbe ẹyotọ. Ọmwa ọvbehe ọre ọ ghi ra do mu yan rẹn. Sokpan dọmwadẹ ọghọe ghi ye egbe ẹro vbene ọ họ ẹe hẹ.

I Kọrinti 6:20

Te ọ dẹ uwa ha osa, rhunmwuda ọnii, wa gha lo egbe uwa ne uyi Osanobua.

II Kọrinti 2:17

Ma i ye vbe emwa ọvbehe ne ọ ye obọ mu ẹmwẹ Osanobua vbene a miẹn wẹ emwi ne ọ ro puẹkẹ nọ, sokpan rhunmwuda wẹ Osanobua gie ima nẹ, ma kegha ye ẹkoata ta ẹe vbe odaro ẹre zẹ vbe eguọmwadia Kristi.

II Kọrinti 9:13

Kevbe rhunmwuda emwi ne ọ ghi la ekpa iwinna uwa na vẹ ne agbọn rẹn, emwa ni bun ghi rhie uyi ne Osanobua ye ẹmwẹ iyẹn ne ọ maa ọghe Kristi ne ọ rre uwa ekhọe, kevbe ne uwa vbe yayi, kevbe obọ ẹse ne ọ tọlọ uwa ghe iran, kevbe emwa ọvbehe.

Ẹfisọs 1:19

Kevbe vbene ẹtin ẹnrẹn ne ọ winna vbe uwu ima ni yayi kpọlọ sẹ hẹ. Ne ne ẹtin nọ rre uwu ima na, ọre ọ vbe re ẹtin nọkhua ni.

Ẹfisọs 4:29

Wa ghẹ gha fi obi unu gie egbe, wa gha ta ẹmwẹ ne ọ yi ọmwa obọ, egbe ne ọ rhie ẹtin ye ọmwa iwu, ọ ghi vbe rhie emwi ne ẹ i te rrọ rre, vbene a gha na miẹn wẹ, ẹmwẹ ne u ye unu ruẹn ta, ghi gha ru ọ maa ne iran ni ya ehọ họn ẹn.

Ẹfisọs 5:20

Gha kpọnmwẹ Osanobua ne Erha emwi hia vbe ẹghẹ hia, vbe eni Nọyaẹnmwa Jesu Kristi.

Ẹfisọs 6:10

Vbe okiekie ehia, wa ruẹ iwegbe uwa ba Nọyaẹnmwa, vbe ekpa ẹtin ẹnrẹn nọkhua.

Filipai 1:11

Ẹdẹ agbọn uwa ghi do vuọn ne avbe emwi ne ọre ne ọ maa, ọghe ẹmwata ne a ghe ginna ọmwa, ne Jesu Kristi ọkpa sẹtin rhie ladian ne uyi kevbe urhomwẹ Osanobua.

Filipai 2:11

Ehia ghi vbe yae go vbe azagba wẹ, Jesu Kristi ọrọre Nọyaẹnmwa ne uyi ọghe Osanobua e Evbavba.

Kọlose 4:6

Wa gie ẹmwẹ uwa gha re ne ọ maa kevbe ne ọ rhiẹnrhiẹn vbe ehọ ẹghẹ hia, wa ghi vbe gua ra gha rhie ewanniẹn ne ọ gua ẹe ro ne emwa hia.

I Tẹsalonaika 2:4

Vberriọ, vbe ne Osanobua wẹ ne ima gha guan, ọre ima ya guan, rhunmwuda, Osanobua gba ẹko ima, ọre ọna mu ẹmwẹ Iyẹn Ne ọ maa ye ima obọ. Ẹ i re ne ọ gha yẹ emwa ne agbọn ma ru, vbe ẹ i re ne ọ gha yẹ Osanobua ọmwa nọ danmwẹ emwi ne ọ rre ima ekhọe ghe.

I Timoti 1:17

Ọba etẹbitẹ, ne ẹ i wu ẹde, kevbe ne a i bẹghe, ne irẹn ọkpa re Osanobua, ọre ọghọ kevbe uyi gha rrọọ na, ẹdẹ kevbe ẹdẹdẹmwẹdẹ. Isẹ.

I Timoti 6:16

Rẹn ọkpa kẹkan ọre ne ẹ i wu ẹdẹ, ne ọ rre uwu uwanmwẹ ne ẹ i gie a ghe. Ọmwa ne ọmwa ọkpa ma he ye aro kan, kevbe ne ọmwaikọmwa i sẹtin miẹn ọre aro, ọghọe ọre uyi khin deba ẹtin etẹbitẹ. Isẹ.

Taitọs 2:1

Sokpan, wẹ ghi gha ma emwa emwi zẹ vbene iruẹmwi ne ọ gbae kha re.

Taitọs 2:15

Gha ma emwa avbe emwi na hia, vbe gha lo asẹ hia ne ọ gu ẹe vbe uwu ẹghẹ ne u na rhie igiẹdu ne iran, kevbe ne u na vbe gu iran gui hin ọkhọ rre, ighẹ iran ni danmwehọ ruẹ. Ghẹ gie ọmwa rhọkpa vbe uwu iran ye aro gue uẹ re.

Hibru 13:7

Wa ye avbe ọkaolotu uwa ni karo rre, iran ni kpe orhu Osanobua ma uwa. Wa roro ẹe, vbe ne iran ya yin hẹ, kevbe vbene iran ya wulo hẹ, ne uwa gha ye egbe ta iran vbe ẹmwẹ iyayi.

Hibru 5:12

Ẹghẹ te sẹ nẹ ne uwa tobọ uwa gha ya gha re emamwaemwi, sokpan te uwa ye gualọ ọmwa ne ọ gha ma uwa ikpe orhu ẹmwẹ Osanobua. Ne uwa gha na gha rri evbare ne evbare, ewẹn uwa ye wẹn.

Jems 1:19

Wa ghi ye ọna rre o, wa ne etẹn mwẹ ni ghan, Dọmwadẹ ọghọe, vbe uwu uwa, wa ghi gha re ne ọ rherhe danmwehọ ẹmwẹ, sokpan ne ẹ i rherhe guan, kevbe ne ẹ i rherhe mu ohu.

Jems 1:26

Deghẹ ọmwaikọmwa ro ighẹ ọmwa ne ọ mwẹ iyayi rẹn khin, a deghẹ ẹ i rhie aranmwẹ kọ ẹho guan, iyayi ẹre i mwẹ esa.

I Pita 2:12

Wa gie uyinmwẹ ne uwa yin maa sẹ rriọ vbe uwu ẹbu avbe eni ma yayi wẹ, iran gha ba uwa ifi ẹzọ wẹ emwi dan ọre uwa ru, iran ghi vbe tobọ iran kha wẹ, wa vbe ru emwi esi, rhunmwuda ọnii, iran ghi rho Osanobua vbe Ẹdẹ ne ọ ra rre.

I Pita 2:5

Wa gha dee zẹ vbe okuta ni rrọọ, ne uwa gia ya uwa bọ Ọgua Osa ọghe orhiọn, eke ne uwa gha na winna, zẹ vbe avbe ohẹn ni huanrẹn, ne uwa gha zọ ese orhiọn ne a ọ gia rhan obọ miẹn ghe Osanobua vbe ekpa Jesu Kristi.

I Pita 4:10

Dọmwadẹ ọghọe zẹ vbe ọmwa ne ọ ya obọ mu avbe emwi ughughan ne Osanobua ya wẹ ẹse, ọ kere ne ọ gha lo avbe emwi nii, ne ọ maa sẹ emwa ọvbehe egbe.

I Pita 4:16

Sokpan, deghẹ u rri oya rhunmwuda ighẹ, u re ọguọmwadia Kristi, ghẹ gie ekhue ẹre mu uẹn, sokpan gha kpọnmwẹ Osanobua wẹ, u vbe khuẹnniẹn eni Kristi.

I Pita 5:11

Ọghọe ọ re ẹtin gha khin ẹdẹdẹmwẹdẹ Isẹ.

Ebe ne Jud gbẹẹn 1:25

Ne Osanobua ọkpa kevbe Ọmiọnmwafan, la ekpa Jesu Kristi Nọyaẹnmwa, ọre uyi, ọdakha, ẹtin kevbe asẹ gha rrọọ na, ke orre ni gberra hia gha dee do sẹ wanwanna, ẹdẹ kevbe ẹdẹdẹmwẹdẹ. Isẹ.