I Kọrinti 11:3 - Edo Bible (E Baibol Ẹdo) Version 1996

³ Sokpan I ho ne uwa rẹn wẹ, Kristi kpọlọ sẹ emwa hia fẹẹrẹ, ọdọ ọre ọ kpọlọ sẹ amwẹ ọnrẹn, Osanobua keghi vbe sẹ Kristi.

I Kọrinti 11:3 ပူးပေါင်းရင်းမြစ်များ

Gẹnẹsis 3:16

Rẹn keghi vbe tama okhuo nii wẹẹ, “I gha rhie ba ọlọghọmwa ruẹn vbe u a gha hanmwa, ke obalọ ruẹ vbe ẹghẹ ubiẹmwẹ. Sevba, te u gha ye gha rhikhan lele ọdafọn, ọdafọn ọre ọ gha kha yan ruẹn.”

Aizaia 52:13

E Nọyaẹnmwa khare wẹẹ, “Ọguọmwadia mwẹ gha miẹn ọ dunnaẹn vbe iwinna ne a wa ne ẹẹn; a gha ya ọghọ nọkhua ne ẹẹn.

Aizaia 55:4

I yae ru ọkaolotu kevbe ne ọkhaemwisẹ yan avbe uhunmwu ẹvbo. Obọ ẹre ọ re I la rhie ẹtinmwẹ ma iran.

Matiu 28:18

Jesu tama iran wẹẹ, “A rhie ẹtin hia ni rre ẹrinmwi kevbe agbọn mẹ nẹ.

Iyẹn ne ọ Maan Ọghe Jọn 14:28

Wa họẹn vbe I tama uwa wẹẹ, ‘I ra kpao sokpan I gha vbe dọlegbe bu uwa rre.’ Adeghẹ te uwa gele ho ẹmwẹ mwẹ te uwa ghẹ gha ghọghọ wẹ mẹ bu Evbavba khian, rhunmwuda, rẹn kpọlọ sẹ mwẹ.

I Kọrinti 3:23

Ọghe Kristi wa khin, ọghe Osanobua ọre Kristi khin.

Ẹfisọs 4:15

Sokpan ọ kere ne ima gha la odẹ hia wan bu vbene ọ khin ighẹ Kristi, ne ọ re ọdia ọghe ehia vbe ekpa ne ima gha na gha ya orhiọn aho ẹmwẹ ọmwa ta ẹmwata.

Kọlose 1:18

Rẹn ọrọre uhunmwu ra arowa esọsi ẹre, ne ọ re ikinnegbe ẹre, obọ ẹre ọre arrọọ ne ikinnegbe nii mwẹ, ke rre, rẹn ọrọre Ọmọdiọn ne a huẹn kpaegbe vbe orinmwi, ne a miẹn ehe na miẹn wẹ, rẹn ọre ọ rre ukpo ne okaro vbe uwu emwi hia.

Kọlose 2:10

A keghi ru ẹdẹ agbọn uwa enọgbae rhunmwuda ighẹ, wa ya egbe ba irẹn. Obọ irẹn ọre ọ ke ukhunmwu ne avbe orhiọn ẹrinmwi ni dakha kevbe iran ni rre asẹ.

Kọlose 2:19

Ẹ i ghi re igbinna ọghe Kristi ne ọ re ẹzi ehia rẹn ghi ye. Vbe ekpa ọdakha Kristi, a ghi gha koko egbe hia, a ghi vbe dee akhuẹn kevbe inian ni rrọọ hia kugbe, ọ ghi vbe do waan zẹ vbe ne Osanobua ho ẹre yi.

Kọlose 3:18

Wa ne ikhuo, wa gha họn ẹmwẹ ne ọdafẹn uwa, rhunmwuda, emwi ne ọ khẹ ke ne uwa gha ru zẹ vbe ọmwa ne ọ ya Kristi yi, ọre ọnii khin.

I Pita 3:1

Erriọ wa vbe nọ zẹẹ, wa ne avbe amwẹ, wa gha gbe uhunmwu ke otọ ne avbe ọdafẹn uwa, vbene a gha na miẹn wẹ, a deghẹ eso vbe uwu iran ma yayi, iran ghi do rhunmwuda uyinmwẹ uwa yayi. Vbe ne uwẹ ighi na vbe ta ifi ẹmwẹ ọkpa.