I Kọrinti 1:2 - Edo Bible (E Baibol Ẹdo) Version 1996

² gie esọsi Osanobua ne ọ rre Kọrinti, gie emwa ne a tie re ne iran do gha re emwa ni huanrẹn Osanobua, emwa ni khian ọghọe rhunmwuda ighẹ iran ya egbe ba Kristi Jesu, deba emwa hia ni ghi na erhunmwu ghe Nọyaẹnmwa Jesu Kristi nẹ, zẹ vbe Nọyan iran kevbe ima.

I Kọrinti 1:2 ပူးပေါင်းရင်းမြစ်များ

Gẹnẹsis 12:8

Vbe iyeke ọnii, ọ keghi la ghe odẹ ekẹn ọghe oke ne ọ rre odẹ ahọ ọghe Bẹtẹl, ọ na bu agọ ye ẹkpo Bẹtẹl vbe orrie kevbe Ai vbe ahọ. Ọ kevbe bọ aka ye evba, ọ na ya uhunmwu rhanmwẹ otọ ne Nọyaẹnmwa.

Gẹnẹsis 4:26

Sẹt keghi biẹ ọmọ okpia ọkpa ne ọ he ẹre Ẹnọs. Ẹghẹ nii ọre emwa ke gha so eni Nọyaẹnmwa, iran ghi vbe gha gae.

Psalm 45:11

Ose ruẹ gha ya ọba ho ẹmwẹ ruẹn, rẹn ọrọre arowa a rhunmwuda ọnii, u ghi gha họn ẹmwẹ ne ẹẹn.

Iwinna 10:36

Wa rẹn uhunmwu ne ọ gie gie emwa Izrẹl ne ọ na gha wewe Iyẹn Ne ọ maa ọghe ọfumwegbe la ekpa Jesu Kristi ne ọre Nọyan emwa hia.

Iwinna 15:9

Ọ ma vbe rhie alughaẹn ye ẹkpo ima vbe iran, ọ ya orukhọ iran bọ iran rhunmwuda ighẹ iran yayi.

Iwinna 18:1

Vbe iyeke emwi na na, Pọl keghi kpao vbe Atẹns rre, ọ na gha rrie Kọrinti.

Iwinna 22:16

Wanwanna nian, de emwi ne u ghi ye mudia khẹ? Kpaegbe ne a sa amẹ nuẹn ne a miẹn ehe na kpe orukhọ ruẹ kua vbe ekpa ne u na datie eni ẹnrẹn.’

Iwinna 26:18

U ghi rhan iran aro ne u gban iran uhunmwu hin ebiebi rre la uwu uwanmwẹ, kevbe hin ẹtin Setan rre ghe Osanobua. Vbene a gha na miẹn wẹ vbekpa ne iran na mu ẹtin yan mwẹ, a ghi ye orukhọ iran bọ iran, iran ghi rhie ihe iran vbe uwu ẹbu emwa ne Osanobua hannọ zẹ.’

Iwinna 9:13

Ananaias keghi wanniẹn wẹẹ, “Ẹ i re avbiẹ ẹvbo ọ he ta ẹmwẹ ọmwa na ma mwẹ, uza ne ọ he zẹ vbe egbe emwa ruẹn ni rre Jerusalẹm.

Iwinna 9:14

Ogie Ohẹn ọre ọ vbe gbẹn ebe ya rhie asẹ nẹẹn ne ọ gha die Damaskọs ne ọ do munọ emwa ne ọ ghi da tie eni ruẹn.”

Iwinna 9:21

Unu keghi yan emwa ni họn ẹn hia, iran kegha nọ wẹẹ, “Ọ na i re oko nii ne ọ gbele emwa ni ya eni na yi vbe Jerusalẹm? Ẹ i re ne ọ do munọ iran, ne ọ vbe viọ iran bu avbe igie ohẹn ọre ọ yae gha die edinran?”

Ebe ne Pọl gbẹẹn gie emwa Rom 1:7

Rhunmwuda ọnii, ọre I na gbẹn ebe gie uwa hia ni rre Rom ne Osanobua ho ẹmwẹ ọnrẹn, ọ na tie uwa ne uwa do gha re emwa irẹn. Te Osanobua ne Erha mwa kevbe Nọyaẹnmwa Jesu Kristi gha rhie ẹsọhẹ kevbe ọfumwegbe ne uwa.

Ebe ne Pọl gbẹẹn gie emwa Rom 10:12

Emwa hia ọre a kha, rhunmwuda alughaẹn i rrọọ ne Ju ra iran ne ẹ i re Ju, Osanobua ọrọre Nọyan ehia, ọ ghi vbe gha fiangbe iran hia ni datie ẹre wọrhọwọrhọ.

Ebe ne Pọl gbẹẹn gie emwa Rom 3:22

A ya Jesu yi, ọre Osanobua rhunmwuda ẹre ya ọmwa khian ọmwata. Emwa hia ni ya Jesu yi, ọre Osanobua ru vberriọ rhunmwuda alughaẹn ne egbe i rrọọ hiehie re.

Ebe ne Pọl gbẹẹn gie emwa Rom 8:28

Ma rẹnrẹn wẹ vbe uwu emwi hia, te Osanobua yaba emwa ni ho ẹmwẹ ọnrẹn ru emwi ne ọ ma an, avbe emwa ne irẹn tie re zẹ vbene ọ mwamwa ẹn.

I Kọrinti 1:30

Sokpan Osanobua ku uwa kugbe ba Kristi Jesu nẹ, Osanobua kevbe ru ẹe ne Kristi gha re ẹwaẹn ima, ekpa ẹre ọre a na ya ima khian ni mudia ẹse vbe odaro Osanobua, ma keghi khian emwa Osanobua, a na fannọ ima ye otọ.

I Kọrinti 10:32

Gha yin vbene a gha na miẹn wẹ u ma hẹ vba avbe Ju ra iran ne ẹ i re Ju ra esọsi Osanobua.

I Kọrinti 12:27

Rhunmwuda ọnii, egbe Kristi ọre uwa hia khin, orhiọn ọkpọkpa keghi vbe re efẹn ọkpa vbọ.

I Kọrinti 8:6

Sokpan Osanobua ọkpa ma mwẹ, ọnii ọ re Evbavba ne ọ yi emwi hia, ọmwa ne ima rre agbọn na, Nọyaẹnmwa ọkpa kẹkan ọre ọ vbe rrọọ, ọnii ọrọre Jesu Kristi, ọmwa ne a la ekpa ẹre yi emwi hia, ọmwa ne ima la ekpa ẹre vbe rre agbọn.

II Kọrinti 1:1

E Pọl ne ukọ vbene Osanobua ho ẹre yi, kevbe ọtẹn mwa ighẹ Timoti, ọre ọ gbẹn ebe na, gie esọsi Osanobua ne ọ rre Kọrinti kevbe emwa Osanobua hia ni rre Gris.

II Kọrinti 4:5

Rhunmwuda, ẹ i re egbe ima ma kpe orhu ẹre, ma kpe orhu Jesu Kristi zẹ vbe Nọyaẹnmwa, kevbe ima tobọ mwa zẹ vbe eguọmwadia uwa vbe ekpa Jesu.

Galatia 1:2

Etẹn hia ni rre edinran deba mwẹ gie otuẹ esọsi hia ni rre Galatia.

Ẹfisọs 5:26

Te irẹn ru ọna, ne ọ miẹn ehe na ya ẹmwẹ ọnrẹn ya esọsi fi ohan ne Osanobua, vbe iyeke vbe ọ ghi ye amẹ kpe ẹe huan nẹ.

I Tẹsalonaika 1:1

E Pọl, Sailas kevbe Timoti, ọre ọ gbẹn ebe na gie emwa esọsi ni rre Tẹsalonaika, emwa ni re ọghe Osanobua ne Erha kevbe Nọyaẹnmwa Jesu Kristi, ẹsọhẹ kevbe ọfumwegbe ọre ogha re ọwua.

I Tẹsalonaika 4:7

Osanobua ma tie ima ne a do gha yin uyinmwẹ alama oghẹ, sokpan ne a do gha re ne ọ mwẹ uyinmwẹ ne ọ huanrẹn.

II Tẹsalonaika 1:1

E Pọl, Sailas kevbe Timoti ọre ọ gbẹn ebe na gie emwa esọsi ne ọ rre Tẹsalonaika, emwa ni re ọghe Osanobua ne Erha mwa kevbe Nọyaẹnmwa Jesu Kristi.

I Timoti 2:8

I ho ne ikpia hia gha na erhunmwu vbe ehe hia, emwa ni ye egbe yan Osanobua, emwa ni gha sẹtin viọ obọ iran da odukhunmwu vbe ne a i na mu ohu kevbe ne a i na muan ẹmwẹ.

I Timoti 3:15

Sokpan deghẹ I ma ghi rherhe rre, ebe na gha gie uwa rẹn vbene ọ kere ne ima gha mu egbe yi hẹ vbe uwu igiowa Osanobua, ne ọre esọsi ọghe Osanobua ne ọ rrọọ, orre kevbe okpo ọghe ẹmwata.

II Timoti 1:9

Ọ miẹn ima fan, ọ kevbe tie mwa ne a do gha re emwa irẹn, ẹ i re rhunmwuda emwi ne ima ru, sokpan vbe ọghe ekhọe obọ ẹre kevbe ẹsọhẹ. Ọ rhie ẹsọhẹ na ne ima nẹ, vbe uwu Kristi Jesu, ẹghẹ te do suẹn.

II Timoti 2:19

Sokpan, a i sẹtin mu ẹyotọ ne gbain ne Osanobua gbe rueghe, a keghi gbẹnnẹ avbe ẹmwẹ na yan rẹn wẹẹ, “Nọyaẹnmwa rẹn iran ni re ọghọe” kevbe wẹẹ, “ọmwaikọmwa ne ọ ghi tie egbe ẹre ọghe Nọyaẹnmwa nẹ, te ọ kere ne ọ zobọ vbe emwi dan ne a ru.”

II Timoti 2:22

Gha bi egbe hin orriarria ibiẹka, u ghi gha gbinna ne emwi ẹmwata, iyayi, kevbe ahoẹmwọmwa kevbe ọfumwegbe vbe uwu a ku obọ gbe ba iran ni ye ekhọe ne ọ huanrẹn datie Nọyaẹnmwa, ne ọ yi iran obọ.

Hibru 10:10

Rhunmwuda wẹ Kristi ru zẹ vbene Osanobua ho ne ọ ru, ma keghi khian ne a khuẹ hin orukhọ ima ne, rhunmwuda ese ne ọ ya egbe ẹre zọ uhukpa ne ọ fo vbe otọ.

Hibru 13:12

Ọna ọ si ẹẹ ne Jesu na vbe wu ye vbe a lahin onurho ẹvbo rre nẹ, ne ọ miẹn ehe na ye esagiẹn ọnrẹn, khuẹ orukhọ emwa kua.

Hibru 2:11

Ọ khuẹ emwa huan hin orukhọ iran rre, irẹn kevbe emwa ni irẹn khuẹ huan, erha ọkpa iran mwẹ. Ọnii ọ si ẹe ne ekhue i na mu Jesu vbe ọ gha tie iran etiọnrẹn.

Ebe ne Jud gbẹẹn 1:1

E Jud ne ọguọmwadia Jesu Kristi kevbe ọtẹn Jems ne okpia, ọre ọ gbẹn ebe na gie emwa hia ne Osanobua tie re, emwa ni rrọọ vbe uwu aho ẹmwẹ ọmwa ọghe Osanobua ne erha kevbe iran ne Jesu Kristi gbe aro ghe.

Arhie Maan 19:16

A keghi gbẹnnẹ avbe ẹmwẹ na ye ẹwu ne ọ yọe kevbe owẹ ọre wẹẹ, “Ọba avbe iran ne ọba kevbe Nọyan iran ni yaẹn emwa.”