I Jọn 4:2 - Edo Bible (E Baibol Ẹdo) Version 1996

² Vbene uwa gha ya rẹn hẹ a deghẹ Orhiọn Osanobua nọ ọre ọna khin: Ọmwaikọmwa ne ọ sẹtin kha wẹ Jesu Kristi do khian ọmwa ne ọ sẹtin wu, ọ mwẹ Orhiọn ne ọ ke obọ Osanobua ree.

I Jọn 4:2 ပူးပေါင်းရင်းမြစ်များ

Iyẹn ne ọ Maan Ọghe Jọn 1:14

Nene Ẹmwẹ ne a guan keghi khian ọmwa ne agbọn, ọ keghi do gu ima gha rrọọ. Ma miẹn uyi ẹre, ọ vuọn ne ẹsọhẹ kevbe ẹmwata. Ọ na kegha re uyi ne a rhie nẹẹn zẹ vbe ukpọmọkpa kẹkan ne Evbavba mwẹ.

I Kọrinti 12:3

Ọ kere ne uwa rẹn khekherriọ wẹ, a i miẹn ọmwa ne Orhiọn Osanobua lo ne ọ gha sẹtin kha wẹ, “Emwi ọ gha rruan Jesu.” A i vbe miẹn ọmwa ne ọ gha sẹtin miẹn kue wẹ, “Jesu ọrọre Nọyaẹnmwa,” a deghẹ ẹ i re Orhiọn Ne Ọ Huanrẹn ọre ọ dia ẹre.

I Timoti 3:16

Ọmwa ne ọ gha sẹtin muan rẹn ẹ i rrọọ ighẹ ẹmwẹ oro nọkhua ọghe iyayi mwa: Rẹn rhie egbe ma zẹ vbe ọmwa kẹkan, a miẹn ọẹn vbe ọghe Orhiọn wẹ ọmwata nọ, avbe odibo Osa vbe miẹn ọẹn. A kpe orhu ẹre vbe avbe uhunmwu ẹvbo, a ya ẹe yi vbe otọ agbọn hia, a keghi tọn ẹn mu gha rrie ẹrinmwi.

I Jọn 1:2

Ugbẹn vbe arọọ na ghi khian ne a ye aro bẹghe nẹ, ma tobọ mwa miẹn ọẹn, rhunmwuda ọnii, ma keghi ta ẹmwẹ ọnrẹn, ma keghi ta ẹmwẹ arrọọ etẹbitẹ nii, ne ọ gha gu Evbavba rrọọ, ne a vbe do rhie ma ima, ma uwa.

I Jọn 2:23

Rhunmwuda, ọmwa ne ọ ma rhan obọ miẹn Ọmọ, ọ ma rhan obọ miẹn Erha, ọmwa ne ọ rhan obọ miẹn Ọmọ, Erha wa vbe guẹe rrọọ ba re.

I Jọn 4:15

Ọmwaikọmwa ne ọ khare ighẹ Ovbi Osanobua ọre Jesu khin, Osanobua rre uwu ẹre, rẹn keghi vbe re uwu Osanobua.

I Jọn 4:3

Ọmwa ne ọ rhirhi kha ighẹ ohoghe ọna khin vbe ekpa ọghe Jesu, ẹ i mwẹ orhiọn ne ọ ke obọ Osanobua rre, Orhiọn nii, obọ Oghian Jesu ọre ọ ke rre, wa ka họn nẹ wẹ, ọ gha rre, wanwanna nian, ọ rre emwa na nẹ vbe agbọn na.

I Jọn 5:1

Ọmwaikọmwa ne ọ yayi ighẹ Jesu ọrọre nene Mẹzaia, ovbi Osanobua nọ, ọmwa ne ọ hoẹmwẹ erha ne ọ biẹ ọmọ, te ọ vbe hoẹmwẹ ovbi ẹre ba ẹre.

II Jọn 1:7

Avbe ọrẹrẹ ọmwa ni bun vẹ ku agbọn hia, emwa ni ma tae wẹ Jesu Kristi gele khian ọmwa ne ọ sẹtin wu. Egbe ọmwa vberriọ, ọrẹrẹ ọmwa nọ. Rẹn ọrọre oghian Kristi.