I Jọn 4:17 - Edo Bible (E Baibol Ẹdo) Version 1996

¹⁷ Ọnọna ọrọre otọe ne a na ya aho ẹmwẹ ọmwa khian ne ọ gbae vbe uwu ima, ọnii nọ wẹẹ, ne afianma ghẹ fian mwẹ, vbe Ẹdẹ Ibuohiẹn, rhunmwuda vbene ẹdẹ agbọn Kristi ye vbe agbọn na ọre ọghomwa vbe ye.

I Jọn 4:17 ပူးပေါင်းရင်းမြစ်များ

Matiu 10:15

Ne I tama uwa ọ gha sẹ ẹdẹ ibuohiẹn, Osanobua gha tohan emwa ni rre Sọdom kevbe Gomorra sẹ emwa ni rre ẹvbo ni.

Matiu 10:25

Ọmwa ne a ma ẹre emwi sẹtin hia ne ọ vba ne ọ ma ẹre emwi. Ra ne ọviẹn vba enarẹn. Adeghẹ iran tie ọdafẹn nọyan owa Bẹlzibọb, inu ghi nọ ne iran ni rre owa ni!

Matiu 11:22

U ghi vbe rẹn nian wẹ, ọ gha sẹ Ẹdẹ Ibuohiẹn, Osanobua gha tohan Taia kevbe Saidọn sẹ uwa.

Matiu 11:24

Ne I guẹ rẹn nian wẹẹ, ọ gha sẹ Ẹdẹ Ibuohiẹn, Osanobua gha tohan Sọdom sẹ ruẹ.”

Matiu 12:36

“Ne I tama uwa, ọ gha sẹ ẹdẹ ibuohiẹn, dọmwadẹ ọghọe gha la erhan ẹzọ ba ẹmwẹ oya ne ọ ya unu ẹnrẹn ta.

Iyẹn ne ọ Maan Ọghe Jọn 15:20

Wa ye ẹmwẹ ne I tama uwa rre, ‘Ọviẹn i sẹ enarẹn,’ Deghẹ iran zẹ mwẹ owẹ, iran gha vbe zẹ uwa owẹ. Adeghẹ iran miẹn ẹmwẹ mwẹ ye ehọ, iran gha vbe miẹn ọghe uwa ye ehọ.

Iyẹn ne ọ Maan Ọghe Jọn 17:22

Uyi ne uwẹ rhie mẹ ọre imẹ vbe rhie ne iran, ne iran miẹn ehe na gha re ọkpa zẹ vbene imẹ vbe ruẹ re ọkpa.

Ebe ne Pọl gbẹẹn gie emwa Rom 8:29

Rhunmwuda avbe iran ne Osanobua hannọ zẹ nẹ, ọre irẹn vbe viọ ye efọnkpa ne iran do ye vbe Ovbi ẹre, ne Ọmọ miẹn ehe na do gha re okaro vbe uwu ẹbu etẹn ni bun.

Hibru 9:27

Rhunmwuda uhukpa ọre dọmwadẹ ọghọe ra wu, vbe iyeke ọnii, Osanobua ghi bu ohiẹn ọnrẹn.

Jems 2:13

Rhunmwuda, ọmwa ne ọ ma mwẹ itohan, Osanobua i ra tohan rẹn vbe ọ a gha bu ohiẹn, sokpan itohan ọre ọ khọnmiotọ ibuohiẹn.

Jems 2:22

A deghẹ u miẹn ọẹn? Iyayi ẹre, kevbe iwinna rẹn keghi ku obọ gbe, iwinna rẹn ọre a ya ya iyayi ẹre khian ne ọ gbae.

II Pita 2:9

Erriọ vbe nọ, Nọyaẹnmwa rẹn vbene ọ ya yuo emwa esi hin uwu edanmwẹ iran re hẹẹ, kevbe vbene ọ ya da emwa dan ne a gha rri ọre oya yi khẹ Ẹdẹ Ibuohiẹn hẹ.

II Pita 3:7

Sokpan agbọn kevbe ẹrinmwi ne ọ rrọọ banbanna, ẹmwẹ ọkpa ni ọghe Osanobua, ọre a ya da ẹe yi, ne a do ya erhẹn fuẹn ọnrẹn uan. Te a viọ iran hinrre khẹ ẹdẹ ne a gha gui ẹzọ avbe emwa dan ne a fuẹn iran uan.

I Jọn 2:28

Erriọ nọ, wa ne ivbi mwẹ, wa mudia vbe uwu irẹn, ne afianma ghẹ fian ima vbe ẹdẹ ne ọ gha ya egbe ladian, ne ima ghẹ ya ya ekhọe lẹre hin ehe ne ọ ye rre, vbe Ẹdẹ ne ọ gha rre.

I Jọn 2:5

Sokpan ọmwa ne ọ ya ẹmwẹ ọnrẹn ru emwi, ọrọre ọmwa ne a ye aho ne ọ mwẹ ghe Osanobua khian ne ọ gbae. vbenian ọre ima gha ya rẹn ighẹ uwu Osanobua ọre ima ye.

I Jọn 2:6

Ọmwa ne ọ kha re ighẹ uwu Osanobua ọre irẹn ye, we ne ọ gha yin zẹ vbene Jesu Kristi yinrin.

I Jọn 3:1

Wa ghe vbene Evbavba ho ẹmwẹ ina hẹ! Ọ ho ẹmwẹ mwa sẹrriọ wẹ, te a ghi tie ima ivbi Osanobua, ẹmwata, ivbi ẹre ọre ima gele khin. Ọna ọre ọ si ẹe ne agbọn ma na rẹn ima, ọ ma rẹn Osanobua.

I Jọn 3:3

Ọmwaikọmwa ne ọ mwẹ idaehọ na vbe uwu Kristi, ọ gha da egbe ẹre yi vbe ne ẹ i mwẹ iruẹn, zẹ vbene Kristi vbe re ne ẹ i mwẹ iruẹn.

I Jọn 3:7

Emọ, wa ghẹ gie ọmwaikọmwa mu uwa rẹrẹ, ọmwaikọmwa ne ọ ru emwi ne ọ kere, ọmwa ẹmwata nọ zẹ vbene Kristi vbe re ọmwa ẹmwata.

I Jọn 4:12

Ọmwa ọkpa ne ọ he miẹn Osanobua aro ẹdẹ, ẹ i rrọọ, a deghẹ ma ho ẹmwẹ egbe, Osanobua rre uwu ima, a keghi vbe ya aho ẹmwẹ ọmwa rẹn khian ne ọ gbae vbe uwu ima.