I Jọn 3:10 - Edo Bible (E Baibol Ẹdo) Version 1996

¹⁰ Ọnọna ọrọre alughaẹn ne egbe ne aro dae, ne ọ rre ẹkpo ivbi Osanobua kevbe ivbi Esu. Ọmwaikọmwa ne ẹ i ru emwi ne ọ gbae, ra ne ẹ i ho ẹmwẹ etiọnrẹn, ẹ i re ovbi Osanobua.

I Jọn 3:10 ပူးပေါင်းရင်းမြစ်များ

II Samuẹl 13:22

Absalọm ma vbe rhan unu ta ẹmwẹ ọkpa ma Amnọn. Ohu ẹre kegha mu Absalọm rhunmwuda, ọ ya ẹtin vbe iwegbe gu e Tama ne ovbiye ẹe ru emwi ọdọ vbe amwẹ.

Matiu 13:38

Ugbo ne ọ kọ ẹe yi ọrọre agbọn na, emwiokọ ni maa ọrọre emwa ni re ọghe nene Arriọba, ohunhun ọrọre iran ni re ọghe Esu.

Iyẹn ne ọ Maan Ọghe Luk 6:35

Ẹ i re rriọ! Gha ho ẹmwẹ eghian ruẹn, vbe gha ru iran ẹse, rhie ne emwa mọmọ, ghẹ ghi vbe rhie aro ye odẹ khẹ emwi rhọkpa. A gha san ruẹn ẹse nọkhua, u ghi vbe gha re ovbi Osanobua Ne Ọ Yo Sẹ, rhunmwuda te irẹn maa ne emwa ẹse oghodan kevbe emwa dan.

Iyẹn ne ọ Maan Ọghe Jọn 1:12

Vbene ọ rhirhi gha ye hẹ, eso vbọ rhan obọ miẹn rẹn, iran keghi yaeyi, rhunmwuda ọnii, rẹn keghi rhie ẹtin ne iran ne iran khian ivbi Osanobua.

Iyẹn ne ọ Maan Ọghe Jọn 11:52

Sokpan ẹ i re ne iran ọkpa, sokpan ne ọ vbe si ivbi Osanobua ni zagha kua koko ye otu ọkpa.)

Iyẹn ne ọ Maan Ọghe Jọn 8:44

Ivbi erha uwa ne Esu ọre uwa khin. Emwi ne erha uwa ho ọre uwa vbe ho ne uwa gha ru. Izigha rẹn wa khin ke otọe gha dee. Ọma he mwẹ obọ vbe ẹmwata ẹdẹ, rhunmwuda ẹmwata i vbe rre uwu irẹn, ọ gha ta ohoghe, emwi ne a ya we ẹe ọre ọ ru ni, rhunmwuda, ohoghe nọ, kevbe erha ohoghe hia.

Iyẹn ne ọ Maan Ọghe Jọn 8:47

Ọmwa ne ọ ke ehe ne Osanobua ye rre vbe danmwehọ ẹmwẹ Osa, sokpan ẹ i re ehe ne Osanobua ye wa ke rre. Ọnii ọ si ẹe ne uwa i ra na danmwehọ.”

Iwinna 13:10

ọ wẹẹ, “Wẹ ne ovbi e Esu. Wẹ ne oghian emwi ni maa hia, wẹ ne ẹkẹ vbe iwẹnwẹn gba ẹre obọ, wẹ ne ọ hia ne ọ gha ya ẹmwata Nọyaẹnmwa khian ohoghe vbe ẹghẹ hia!

Ebe ne Pọl gbẹẹn gie emwa Rom 13:8

Ghẹ rri ọmwa rhọkpa osa, osa ọkpa ne u gha re ọrọre ne uwa gha ho ẹmwẹ egbe, ọmwaikọmwa ne ọ mwẹ ahoẹmwọmwa ghe ihua ẹre, mu nene Uhi sẹ nẹ.

Ẹfisọs 5:1

Vbene a na miẹn ighẹ ivbi Osanobua ne ọ ghan wa khin, te uwa gha hia ne uwa gha ye vbe irẹn.

Kọlose 3:14

Wa ghi rhie ba ena hia, aho ẹmwẹ ọmwa ne ọ re ọza ne ọ gba emwi hia kugbe vbe akugbe ne ọ gbae.

I Timoti 1:5

Emwi ne I rhunmwuda ẹre yi iyi na ọrọre, ne ọ gua ẹe kpao ighẹ aho ẹmwẹ ọmwa ne ekhọe sẹẹnrẹn, orhiọn ne ekhọe ẹre i gu gui, kevbe iyayi ne ẹ i re ọghe ababa.

I Jọn 2:29

Wa rẹnrẹn wẹ, ọmwata ọre Kristi khin, rhunmwuda ọnii, ọ kere ne uwa rẹn khekherriọ wẹ, ọmwaikọmwa ne ọ ru emwi emwata, ovbi Osanobua nọ.

I Jọn 3:1

Wa ghe vbene Evbavba ho ẹmwẹ ina hẹ! Ọ ho ẹmwẹ mwa sẹrriọ wẹ, te a ghi tie ima ivbi Osanobua, ẹmwata, ivbi ẹre ọre ima gele khin. Ọna ọre ọ si ẹe ne agbọn ma na rẹn ima, ọ ma rẹn Osanobua.

I Jọn 3:2

Ọse mwẹ ni ghaan, ivbi Osanobua ọre ima ghi khin nian, sokpan ọ ma he vẹ ne a rẹn, emwi ne ima ra khian. Sokpan emwi ne ima rẹnrẹn ọrọre wẹ, Kristi gha ya egbe ladian nẹ, ma gha ye vbe ne irẹn ye, rhunmwuda, ma gha miẹn ọẹn vbene ọ wa ye zẹẹ.

I Jọn 4:21

Rhunmwuda ọnii nian, iyi ne Kristi yi ne ima ọ na khin ọmwa ne ọ ho ẹmwẹ Osanobua, wẹ ne ovbe gha ho ẹmwẹ ọtiọnrẹn.

I Jọn 4:6

Sokpan ọghe Osanobua ọre ima khin. Ọmwaikọmwa ne ọ rẹn Osanobua ghi vbe gha rhie ẹmwẹ ima ye ehọ. Ọmwaikọmwa ne ẹ i re ọghe Osanobua, ẹ i vbe rhie ẹmwẹ ima ye ehọ. Rhunmwuda ọnii, vbe nian, ọre ima gha ya rẹn alughaẹn ne ọ rre Orhiọn ne ọre ọghe ẹmwata, kevbe orhiọn ne ọ re ọghe ebiebi.

I Jọn 4:8

Ọmwaikọmwa ne ẹ i mwẹ aho ẹmwẹ ọmwa, ọ ma rẹn Osanobua rhunmwuda aho ẹmwẹ ọmwa ọre Osanobua khin.

I Jọn 5:19

Ma rẹnrẹn wẹ ọghe Osanobua ma khin kevbe wẹ Ọmwa Dan ni ọre ọ kha yan agbọn na hia.

I Jọn 5:2

Vbenian ọre ima na rẹn ighẹ ma ho ẹmwẹ ivbi Osanobua, vbe ekpa ne a na hoẹmwẹ ọnrẹn kevbe ne a na vbe ru vbene iyi ẹre kha re.

III Jọn 1:11

Wa ne avbe ọse mwẹ, wa ghẹ gha ya egbe ta emwi dan, wa gha ya egbe ta emwi esi. Ọmwaikọmwa ne ọ ru emwi ne ọ maa ọghe Osanobua nọ, ọmwaikọmwa ne ọ ru emwi dan, ọ ma he miẹn Osanobua.