Iwinna 8:3 - Edo Bible (E Baibol Ẹdo) Version 1996
3 Sokpan e Sọl kegha hia ne ọ wa fuẹn esọsi rua fẹẹrẹ, ọ na gha ke owa ọkpa la ọvbehe, ọ na gha munọ emwa ni yayi hia ikpia kevbe ikhuo, ọ na gha hẹ iran ku ẹwẹdọ.
Ugbẹn vbe iran ni yan rẹn ghi miẹn wẹ, emwi ne iran te ya miẹn igho rrie, iran keghi de obọ mu Pọl kevbe Sailas, iran na silo iran bu avbe eghaẹvbo vbe ihueada ẹvbo hoho.
Iran keghi sanmwẹ ọẹn hin adesẹ ore ẹvbo rre, iran na filo okuta gbe ẹe rua. Iran ne osẹe keghi viọ agbada ẹwu iran ne igbama ọkpa viọ mwẹ, a keghi tie eni igbama nii Sọl.
Unu keghi yan emwa ni họn ẹn hia, iran kegha nọ wẹẹ, “Ọ na i re oko nii ne ọ gbele emwa ni ya eni na yi vbe Jerusalẹm? Ẹ i re ne ọ do munọ iran, ne ọ vbe viọ iran bu avbe igie ohẹn ọre ọ yae gha die edinran?”
Rhunmwuda mẹ ọre ọ ghi re ne ọ kanmwa sẹ vbe uwu avbe ukọ hia, sẹrriọ wẹẹ, ọ ma te khẹke ne a gha tie mwẹ ukọ, rhunmwuda, te imẹ gha zẹ esọsi Osanobua kpokpo.
Wa họn nẹ vbene I gha ru hẹ, ẹghẹ ne I na mu ẹmwẹ ugamwẹ avbe Ju yan uhunmwu, vbene I gue esọsi Osanobua khọn hẹ, I na gha ye ẹtin mwẹ hia gbinna ne I wa fuẹn ọnrẹn uan.
I mu aro yọ sẹrriọ wẹ I kegha khu esọsi khian. Zẹ vbene ọmwa gha sẹtin la ekpa a ru vbene nene Uhi khare khian ọmwata sẹ, I kegha re ọmwa ne ẹ i mwẹ abaku ru.
Egbe ne a rhe ya miẹn wẹ, vbe ẹghẹ ne ọ gberra, te I gha ye ukpẹ sakan ẹn, I zẹ ọe kpokpo, I na vbe gha filo unu gi ẹe. Sokpan Osanobua tohan mwẹ, rhunmwuda wẹ, ne i ma na yayi ni, I ma rẹn emwi ne I gha ru.