Iwinna 7:59 - Edo Bible (E Baibol Ẹdo) Version 1996

⁵⁹ Iran kegha filo okuta gbe Stivin vbe ne ọ ya da tie eni Nọyaẹnmwa nii, “Nọyaẹnmwa Jesu rhan obọ miẹn orhiọn mwẹ.”

Iwinna 7:59 ပူးပေါင်းရင်းမြစ်များ

I Ọba 21:13

Igbẹki eva nii keghi wa sirra emwa hia ba ẹre ifi ẹzọ wẹ iran họn vbe ọ kpa unu ghe Osanobua kevbe ọba. Rhunmwuda ọnii, iran keghi silo ẹe ladian hin ore ẹvbo rre, iran na filo okuta gbe ẹe rua.

Psalm 31:5

Wẹ ọ re I lẹ gbinna u ghi miẹn mwẹ fan Nọyaẹnmwa, Osanobua ne ọ gie a mu ẹtin yan, ọ re uwẹ khin.

Asan-Ibo 12:7

Ikinnegbe mwa ghi dọlegbe ghe ekẹn ne otọe, orhiọn ghi dọlegbe bu Osa ne ọ rhie ẹre ne ọmwa.

Joẹl 2:32

Sokpan, iran hia ni kpe tie Nọyaẹnmwa, a gha miẹn iran fan. Zẹ vbene Nọyaẹnmwa khare, ‘Eso vbe iran ni rre Jerusalẹm, gha lẹ fe, iran ne imẹ hannọ zẹ gha miẹn uhunmwu.’ ”

Iyẹn ne ọ Maan Ọghe Luk 23:46

Jesu keghi ya urhu ne ọ la datu wẹẹ, “Evbavba, obọ ruẹ ọre I rhie orhiọn mwẹ yi!” Ọ ghi tae vberriọ nẹ, ọ keghi kpan udu.

Iwinna 2:21

Ọmwa ne ọ rhirhi da tie eni Nọyaẹnmwa, a gha miẹn rẹn fan.’

Iwinna 22:16

Wanwanna nian, de emwi ne u ghi ye mudia khẹ? Kpaegbe ne a sa amẹ nuẹn ne a miẹn ehe na kpe orukhọ ruẹ kua vbe ekpa ne u na datie eni ẹnrẹn.’

Iwinna 9:14

Ogie Ohẹn ọre ọ vbe gbẹn ebe ya rhie asẹ nẹẹn ne ọ gha die Damaskọs ne ọ do munọ emwa ne ọ ghi da tie eni ruẹn.”

Iwinna 9:21

Unu keghi yan emwa ni họn ẹn hia, iran kegha nọ wẹẹ, “Ọ na i re oko nii ne ọ gbele emwa ni ya eni na yi vbe Jerusalẹm? Ẹ i re ne ọ do munọ iran, ne ọ vbe viọ iran bu avbe igie ohẹn ọre ọ yae gha die edinran?”

I Kọrinti 1:2

gie esọsi Osanobua ne ọ rre Kọrinti, gie emwa ne a tie re ne iran do gha re emwa ni huanrẹn Osanobua, emwa ni khian ọghọe rhunmwuda ighẹ iran ya egbe ba Kristi Jesu, deba emwa hia ni ghi na erhunmwu ghe Nọyaẹnmwa Jesu Kristi nẹ, zẹ vbe Nọyan iran kevbe ima.

II Timoti 2:22

Gha bi egbe hin orriarria ibiẹka, u ghi gha gbinna ne emwi ẹmwata, iyayi, kevbe ahoẹmwọmwa kevbe ọfumwegbe vbe uwu a ku obọ gbe ba iran ni ye ekhọe ne ọ huanrẹn datie Nọyaẹnmwa, ne ọ yi iran obọ.