Iwinna 7:51 - Edo Bible (E Baibol Ẹdo) Version 1996

⁵¹ “Wa na ni zẹ udu gbee! Wẹ ne ekhọe ibisi, wa ni kan igban khiọ ehọ, ne ẹ i họn ẹmwẹ Osanobua. Vbene avbe erha uwa gha ye ọre uwa vbe ye. Orhiọn Ne Ọ Huanrẹn ọre uwa gu suan ẹdẹ.

Iwinna 7:51 ပူးပေါင်းရင်းမြစ်များ

II Ọba 17:14

Sokpan, iran ma họn ẹmwẹ ne ọ tama iran, iran na vbe gha yin uyinmwẹ dan ne erha iran vbe yin ne iran ma na ya e Nọyaẹnmwa ne Osanobua iran yi.

II Krọnikol 30:8

Wa ghẹ ze vbe udu vbene iran ye, sokpan, wa họn ẹmwẹ ne Nọyaẹnmwa. Wa gha die Ọgua Osa ne ọ rre Jerusalẹm, ehe ne Nọyaẹnmwa ya khian ne ọ huanrẹn nẹ ẹdẹdẹmwẹdẹ, ne uwa do ga ẹe, ne ọ ghẹ ghi mu ohu ghe uwa.

Nehimaia 9:16

Sokpan avbe erhamwa odede ke gha hio iran na vbe ze vbe udu, iran ke ghi he ne iran họn ẹmwẹ ne uẹn.

Nehimaia 9:30

Ke ukpo dinna ukpo, u keghi ye izin egbe gha ma iran emwi u ru ẹe ne avbe akhasẹ ruẹ guan, sokpan emwa ruẹn keghi yin ehọ u keghi rhunmwuda ọnii rhie ẹghẹ ne ẹvbo ọvbehe ya khọn iran.

Psalm 75:5

I tama iran ne iran dobọ orhuọ iran yi.”

Psalm 78:8

Iran i ra yevbe avbe erha iran odede emwa ni sọtẹ kevbe ni zẹ utun vbe ehọ ni ma mu ẹtin yan Osanobua ẹse, kevbe ni ma vbe guobọ ẹre.

Ẹksọdọs 32:9

E Nọyaẹnmwa keghi tama e Mosis wẹẹ, “Iran na yenhọ gbe.

Ẹksọdọs 33:3

Otọ igho kevbe ne ọ maa emwiokọ ọre uwa rrie. Sokpan mẹ i ra lele uwa gha khian rhunmwuda emwa ni zevbudu wa khin ne a ghẹ miẹn ghẹ I ya fuẹn uwa a vbe odẹ.”

Ẹksọdọs 33:5

E Nọyaẹnmwa keghi tama e Mosis wẹẹ, “Tama emwa nii wẹ emwa ni zevbudu wa khin, I gha wẹ ne 1 lele uwa khian la ovbi ẹghẹ kherhe, I gha fuẹn uwa a fẹẹrẹ. Banbanna nian, wa viọ ikpẹrọnmwọ itegbe uwa hin rre ne I miẹn ehe na rẹn emwi ne I gha ru.”

Ẹksọdọs 34:9

Ọ keghi kha wẹẹ, “Adeghẹ ẹko ruẹ gele rhiẹnrhiẹn ghe mwa, I wẹ ne u lele ima gha khian, E Nọyaẹnmwa, emwa na yinehọ, sokpan ya emwi dan mwa bọ mwa, kevbe orukhọ ima ne u rhan obọ miẹn ima zẹ vbe emwa obọ ruẹ.”

Aizaia 48:4

I rẹnrẹn ighẹ wa gha rhie ma ighẹ wa zevbudu wa na ye gbain vbe ematọn, kevbe ne ẹ i vbe vbokho zẹ vbe ẹgere.

Aizaia 63:10

sokpan, iran keghi sẹmwẹ ọnrẹn, iran keghi gha rhia ẹre ẹko rua. Rhunmwuda ọnii, e Nọyaẹnmwa keghi khian oghian iran, Ọ keghi gu iran gbinna.

Jerimaia 17:23

Avbe erha iran odede ma họn ẹmwẹ mẹ ra ne iran zẹ yọ mwẹ re. Sokpan iran keghi ze vbe udu, iran ma họn ẹmwẹ mẹ amawẹ ne iran ruẹ emwi vbe ehe ne I ye.

Jerimaia 4:4

Wa ya ile ne uwa gu imẹ ne Nọyaẹnmwa uwa ta gha ru emwi, ne uwa ye egbe uwa fiohan mẹ, wa ne ivbi e Juda kevbe ivbi e Jerusalẹm. Adeghẹ wa ma ru vberriọ, ohu mwẹ gha vẹn zẹ vbe erhẹn rhunmwuda emwi dan hia ne uwa he ru. Ọ gha vẹn, orhunmwu ọkpa ne ọ gha dọ ẹre yọ irrọọ.”

Jerimaia 6:10

Mẹ keghi wanniẹn wẹẹ, “Deghẹ mẹ gu iran guan, I na gha bu iran ude, gha ọ ra danmwehọ mwẹ yi? Iran ze vbe udu, iran he ne iran danmwehọ uhunmwu ne u gie, iran ghi gha giẹ ye ẹmwẹ ne u wẹ ne I tama iran.

Ezikiẹl 2:4

Iran ze vbe ẹkoko udu, iran i vbe ya ọghọ mẹ, rhunmwuda ọnii, I ra giọ ne u ya tama iran vbene imẹ ne Nọyaẹnmwa ne Udazi kha hẹ.

Ezikiẹl 44:7

Iran ru awua Ọgua Osa mwẹ vbekpa ne iran na gie avbe iran ni ma rhuẹ, avbe orhunmwuyẹn ne ẹ i họn ẹmwẹ mẹ, gha la uwu Ọgua Osa vbe ẹghẹ ne a ya ye ẹvbi aranmwẹ kevbe esagiẹn zọ ese ghe mwẹ. Rhunmwuda ọnii avbe emwa mwẹ rra uhi mwẹ vbekpa uyinmwẹ osọnnọ ne iran yin.

Ezikiẹl 44:9

“Mẹ ne Nọyaẹnmwa ne Udazi ọre ọ tae wẹ, a ghẹ gie ọrriọvbe ne ọ ma rhuẹ, ọmwa ne ẹ i họn ẹmwẹ mẹ, ya sẹ egbe avbe orhunmwuyẹn ni rre uwu ẹbu ivbi Izrẹl la uwu Ọgua Osa mwẹ.”

Levitikọs 26:41

Ne I na rhunmwuda ọnii mu aro da iran, ne I na viọ iran oghunmwu gha rrie ẹvbo eghian iran. Ọ gha sẹ okiekie, vbe a ghi vbokho avbe ivbi uwa nẹ iran mu egbe rrie otọ nẹ, ighẹ iran vbe rri oya ye orukhọ kevbe isọtẹ iran nẹ.

Nọmbas 27:14

Rhunmwuda wa eva ọre ọ sọtẹ uhi mwẹ vbe ẹgbo e Zin. Ẹghẹ ne emwa ni na gha gui ẹzọ uwu unu ghe mwẹ vbe Mẹriba. wa ma kue ne uwa miẹn ẹtin mwẹ nọhuanrẹn kue ma iran.” (Mẹriba ọrọre ẹzẹ ne ọ rre Kedẹs vbe uwu ẹgbo Zin).

Iwinna 6:10

Sokpan Orhiọn keghi rhie ẹwaẹn nọkhua ne Stivin, sẹrriọ wẹ, a ma miẹn ọmwa ne ọ sẹtin mu aro da Stivin.

Iwinna 7:27

Ọmwa ne ọ ru ogieva ẹre khọ ne ọ rrọọ keghi wa sua Mosis ghe okhiẹ ọkpa, ọ nọ rẹn wẹẹ, ‘Gha ya uwẹ ru ne ọ khaemwisẹ ra ne ọ bu ohiẹn yan ima yi?

Iwinna 7:35

“Nene Mosis ne ivbi Izrẹl ma rhan obọ miẹn ọre ọna khin na. Ne iran tama wẹẹ, ‘Gha ya uwẹ ru ne ọ khaemwisẹ rra ne ọ bu ohiẹn yan ima yi?’ Rẹn na ọre Osanobua ghi gie zẹ vbe ne ọ khaemwisẹ ke ọmiọnmwafan gie iran, vbe kpa iyobọ odibosa ne ọ miẹn vbe oha ne erhẹn na gha baa.

Iwinna 7:39

“Sokpan avbe erha mwa odede ma miẹn ẹre ẹmwẹ ye ehọ, iran bie ẹe fua, ọ kegha khọn iran ne iran dọlegbe gha rrie Igipt.

Iwinna 7:9

“Avbe erha mwa odede kegha mu ohu Josẹf, iran keghi khiẹn ọre ọviẹn fua gha rrie otọ Igipt. Sokpan Osanobua keghi ya ba ẹre.

Ebe ne Pọl gbẹẹn gie emwa Rom 2:25

U gha ru vbene nene Uhi khare, ọre arhuẹ ruẹ na mwẹ esa. Sokpan adeghẹ u i ru vbene nene Uhi kha re, esa ne ọ ma rhuẹ ọre u ye.

Ẹfisọs 4:30

Ghẹ rhia Orhiọn Ne Ọ Huanrẹn ọghe Osanobua ekhọe rua, rhunmwuda nene Orhiọn ọrọre ama ọghe mẹ ọ yan rẹn, ne Osanobua yi ye uẹ egbe, ama ne aro ya dae wẹ, ẹdẹ dee ne Osanobua gha faan ye otọ.

Diuteronomi 10:16

Rhunmwuda onii nian, wa gha họn ẹmwẹ ne Nọyaẹnmwa, wa dobọ iyienhọ yi.

Diuteronomi 30:6

E Nọyaẹnmwa Osanobua rua gha rhie ekhọe ne ọ họn ẹmwẹ ne uwa kevbe avbe ivbi uwa, wa ghi ya ekhọe uwa hia kevbe orhiọn uwa hia ho ẹmwẹ ọnrẹn wa ghi vbe gha yin otọe nii khian.

Diuteronomi 31:27

I rẹn vbene iran ze vbe udu sẹ hẹ kevbe ne iran na vbe sọtẹ. A deghẹ iran sọtẹ ghe Nọyaẹnmwa vbe imẹ rre agbọn, I gha wu nẹ, evba iran ra na sọtẹ sẹ.

Diuteronomi 9:13

“E Nọyaẹnmwa keghi vbe tama mwẹ wẹẹ, ‘I rẹn vbene iran na yin ehọ hẹ.

Diuteronomi 9:6

Wa gie ọna la uwa ekhọe nian wẹ ẹ i re rhunmwuda ighẹ ọ khẹke uwa ọre Nọyaẹnmwa na mu otọe esiesi na ne uwa. Hiehiere, emwa ni yin ehọ ọ re uwa khin.

Filipai 3:3

Rhunmwuda, mẹ nọ, ẹ i re iran ọ re a rhie arhuẹ ẹmwata na, rhunmwuda, Orhiọn ọre ima ya ga Osanobua, ma ghi vbe gha ghọghọ ye agbọn ne ima ye vbe uwu Kristi Jesu. Ma i mu ẹtin yan emwi iruemwi ọghe ore egbe.

Kọlose 2:11

Wa ghi ya egbe ba irẹn nẹ, wa keghi do khian emwa ne a rhuẹ re, ẹ i re egbe a rhuẹ ne emwa ne agbọn ya obọ ru, sokpan arhuẹ ọghe Kristi tobọ ẹre ne ọre a rhan ọmwa vbe irri hin obọ egbe orukhọ na rre.