Iwinna 3:21 - Edo Bible (E Baibol Ẹdo) Version 1996

²¹ Te irẹn gha ka tota vbe ẹrinmwi nẹ, ọ te do sẹ ẹghẹ ne a gha na ya emwi hia khian ọgbọn, zẹ vbene Osanobua la unu avbe akhasẹ ọre ta ẹe ye otọ ke ne ẹkpo imwẹ arria gha dee.

Iwinna 3:21 ပူးပေါင်းရင်းမြစ်များ

Aizaia 1:26

I gha viọ iran ni khaemwisẹ kevbe iran ni gu ọmwa zẹ iro ne uwa, vbene uwa te ka mwẹ ọnrẹn ẹghẹ nẹdẹ. Ẹghẹ nii, a ghi do gha tie Jerusalẹm, ẹvbo ne uyinmwẹ ọnrẹn gbae ke ne ọ ru emwi ẹmwata.”

Iyẹn ne ọ Maan Ọghe Luk 1:70

Erriọ ọ la unu avbe akhasẹ ọre ni huanrẹn nẹdẹ tae ye otọ.

Iwinna 1:11

Iran wẹẹ, “Ivbi e Galili, vbe uwa na mudia ye evba tan aro ye iso hẹ yi? Jesu na ne a tọn mu hin ehe ne uwa ye rre gha rrie ẹrinmwi, gha vbe werriegbe rre zẹ vbene uwa miẹn ọẹn vbe ọ rrie ẹrinmwi na.”

Iwinna 10:43

Avbe akhasẹ hia ta ẹmwẹ ọnrẹn wẹ ọmwaikọmwa ne ọ rhirhi a yae yi, a gha ya orukhọ ẹre hia bọ ẹe la ekpa ẹtin eni ẹnrẹn.”

Iwinna 3:19

Rhunmwuda ọnii nian, wa roiro fi uyinmwẹ werriẹ, wa bu Osanobua gha dee, ne ọ miẹn ehe na kpe orukhọ uwa hia kua.

Iwinna 3:20

Vberriọ ọre ẹghẹ iwo vbe egbe orhiọn, gha na ke ehe ne Nọyaẹnmwẹ ye gha dee, ne ọ miẹn ehe na gie Jesu ne ọre Mẹzaia ne irẹn zẹe ye otọ ne uwa nẹ gha dee.

Ebe ne Pọl gbẹẹn gie emwa Rom 8:21

ẹdẹ ọkpa, a gha rhan emwi ne a yi hin uwu ọviẹn kevbe ọ kẹkua ne ọ ye rre, ne ọ vbe do gha ghae vbe uyi enọyan egbe ẹre ne ivbi Osanobua mwẹ.

Hibru 1:1

Vbe ẹghẹ ne ọ gberra, odẹ ughughan kevbe ẹghẹ ni bun ọre Osanobua ya gha gu avbe erha mwa odede guan, vbe ne ọ na gie avbe akhasẹ gie iran.

II Pita 1:21

Rhunmwuda, ẹmwẹ avbe akhasẹ hia, ọkpa i rrọọ ne a tae zẹ vbe iho ọghe ọmwa kẹkan, sokpan te a gha dia ọmwa khian vbe ekpa Orhiọn Ne ọ huanrẹn, vbe uwu ehe ne iran na ta ẹmwẹ ne ọ ke ehe ne Osanobua ye rre.

II Pita 3:2

I ho ne uwa ye avbe ẹmwẹ ne avbe akhasẹ tae ẹghẹ ne ọ kpẹe fua kevbe avbe iyi ni ke obọ Nọyaẹnmwa kevbe Ọmiọnmwafan mwa rre, zẹ vbene a vbe ukọ tae ma uwa.

Arhie Maan 18:20

Wa ne ẹrinmwi, wa gha ghọghọ ye ne okhuo na na fuan! Wa ne emwa Osanobua, wa gha ghọghọ, kevbe avbe ukọ kevbe avbe akhasẹ. Rhunmwuda emwi ne okhuo na ru uwa ẹre, ẹre Osanobua rria ẹre ikhi yi na.

Arhie Maan 22:6

Odibosa nii keghi vbe khama mwẹ wẹ, “Ẹmwẹ ẹmwata ne ọ gia muẹn ẹtin yan ọre ena khin. Nene Nọyaẹnmwa Osanobua ne ọ rhie Orhiọn ẹnrẹn ne avbe akhasẹ, ọre ọ vbe gie odibosa ẹre ne ọ do rhie emwi ne ọ gha rherhe sunu ma avbe eguọmwadia ẹre.”