Iwinna 27:3 - Edo Bible (E Baibol Ẹdo) Version 1996

³ Ẹdẹ ne ọ lele ẹe, ma keghi sẹ Saidọn. Juliọs keghi tohan Pọl, ọ na giee ya miẹn avbe esiọ re, ne iran miẹn ehe na we ehe ye ọre ẹkpo.

Iwinna 27:3 ပူးပေါင်းရင်းမြစ်များ

Gẹnẹsis 10:15

Kenan kegha re erha Saidọn ne ovbi ẹre nokpia nọdiọn, Hẹt ọrọre erha odede iran ne a hẹ ẹre eni gie iran.

Gẹnẹsis 49:13

Ọkpẹn okun ọre Zẹbulọn ra yin. Avbe emwiokọ gha yakọ vbe eghute ẹre otọe ẹre gha niẹn sẹ Saidọn, Isaka ma maa sẹẹ ekẹtẹkẹtẹ

Aizaia 23:12

E Saidọn ne ore nọkhua, oghọghọ ruẹ sẹ ufomwẹ, emwa ruẹn khian ne a ghi wọ ẹre uhunmwu. Ọ gha khọn iran ne iran ya lẹ ku e Saiprọs, iran ma he ye fe vbe obọ ẹbe vbe evba.

Zẹkaraia 9:2

E Hamat ne ọ rre ọkpẹn Hedrak, rẹn ọ vbe yan rẹn, erriọ vbe nọ ne Saidọn kevbe Taia deba iguemwi iran hia.

Matiu 11:21

“Ọ suẹ Korazin! Ọ suẹ Bẹtsaida! Akpawẹ te a winna iwinna ọyunnuan ne a winnaẹn vbe uwu uwa vbe Taia kevbe Saidọn, ẹ i re eban iran ghẹ ghi viọ osọnmwẹ ukpọn ye egbe, zẹ emuẹn yan uhunmwu ne iran ya rhie ma ighe iran zobọ vbe orukhọ ne iran te ru.

Iwinna 12:20

Ohu emwa Saidọn kevbe Taia keghi gha mu Hẹrọd, iran keghi si egbe koko ya miẹn ọẹn. Iran keghi ka de Blastọs ne ọka ẹguae ba egbe. Iran keghi bu Hẹrọd gha khian ya rinmwian ne ọ mu ẹzọ fua rhunmwuda, ẹvbo Ọba na ọre a ke hẹ evbare ne avbe ẹvbo na re rre.

Iwinna 24:23

Ọ na tama ọmwa ne ọ rre asẹ ne a rhie Pọl nẹ dayi wẹ, ne iran ye gha rhie aro lele ẹe, sokpan ne avbe gi ẹe gha fanmwegbua ugbẹnso, kevbe ne a giẹ avbe esiọre gha viọ emwi ne ọ ho giẹe.

Iwinna 27:1

Ugbẹn vbe a ghi tae nẹ ne ima la okọ gha rrie Itali, iran keghi rhie Pọl deba avbe oleghan eso ne Juliọs ne ovbiyokuo e Rom ọkpa ne ọ rre asẹ vbe oka ọkpa ne a tie ẹre “Ọka e Nọgbaisi.”

Iwinna 27:43

Sokpan ovbiyokuo ne ọ rre asẹ nii keghi ho ne irẹn sinmwi uhunmwu e Pọl, rhunmwuda ọnii, ọ ma gie iran ruẹe vberriọ. Ọ na ghi wẹ ne iran ni gua ra khuẹ vbọ sannọ fi ẹzẹ ne iran ka khuẹ gha rrie oke.

Iwinna 28:16

Ma ghi sẹ Rom, iran keghi sẹ Pọl rae ne ọ tobọ ẹre tota ye ihọkpa, iran rhie ovbiyokuo ọkpa wẹ ne ọ gha rhie aro lele ẹe.

Jọsua 19:28

Ebrọn, Rehọb, Hamọn, kevbe Kana rhinrin ya sẹ Saidọn.