Iwinna 2:38 - Edo Bible (E Baibol Ẹdo) Version 1996

³⁸ Pita tama iran wẹẹ, “Dọmwadẹ ọghọe vbe uwu uwa zẹ obọ vbe orukhọ ne a ru ne a do sa amẹ ne uwa, vbe eni Jesu Kristi, ne a miẹn ehe na ya orukhọ uwa bọ uwa, wa gha vbe mwẹ Orhiọn Ne Ọ Huanrẹn ne Osanobua gha ya ru uwa ẹse.

Iwinna 2:38 ပူးပေါင်းရင်းမြစ်များ

Aizaia 32:15

Sokpan, Osanobua gha dọlegbe rhie orhiọn rẹn gie ima. Avbe otọ ni te fafaa gha dọlegbe gha maa emwiokọ, ugbo ghi vbe gha maa emwiokọ ẹsẹsẹmwẹse.

Aizaia 59:20

E Nọyaẹnmwa tama emwa irẹn wẹẹ, “I gha rrie Jerusalẹm ne I do gbinna ne uwa, kevbe ne I do miẹn uwa hia ni zobọ vbe orukhọ uwa fan: Te imẹ ghi gu uwa ta ile na:

Aizaia 59:21

I rhie ẹtinmwẹ kevbe iruẹemwi mwẹ ne uwa, ne ọ gha re ọghe uwa ẹdẹdẹmwẹdẹ, ke ẹghẹ na gha rae te uwa ra gha họn ẹmwẹ mẹ, wa ghi ma ivbi uwa, kevbe ivbi uniẹn uwa ẹre ne iran gha họn ẹmwẹ mẹ ẹdẹdẹmwẹdẹ.”

Ezikiẹl 39:29

I gha hihiẹ orhiọn mwẹ yan ivbi Izrẹl, I i ghi dọlegbe fi iyeke gbe iran ọvbehe. Mẹ ne Nọyaẹnmwa ne Udazi ọ re ọ tae.”

Zẹkaraia 12:10

“I gha ye orhiọn itohan kevbe orhiọn erhunmwu vuọn ivbi uniẹn e Devid ni rre Jerusalẹm kevbe ivbi Jerusalẹm ọvbehe. Iran gha ghe ọmwa ne a ya agbada bi gbe ua, iran gha vbe khiẹ ọre vbe ọmwa ne ọ khiẹ ukpọmọkpa ne ọ mwẹ. Iran gha viẹ eve orriara zẹ vbe ọmwa ne ọmọdiọn rẹn nokpia wu.

Matiu 28:19

Wa bu emwa hia gha rrie ehe hia ne uwa ya gha ya iran khian erhuanegbe mwẹ, wa gha samẹ ne iran vbe Eni ọghe Erha, kevbe Ọmọ kevbe ọghe Orhiọn Ne Ọ Huanrẹn.

Matiu 3:2

“Wa zobọ vbe orukhọ ne a ru rhunmwuda Arriọba ẹrinmwi sotọ fo.”

Matiu 3:6

Iran miẹn Orukhọ iran kue. Ọ keghi samẹ ne iran vbe ẹzẹ Jọdan.

Matiu 4:17

Ke ẹghẹ ni kpao ọre Jesu na suẹn gha kporhu, ọ wẹẹ, “Wa ro iro fi uyinmwẹ werriẹ, rhunmwuda Arriọba ẹrinmwi sẹ otọ fo.”

Iyẹn ne ọ Maan Ọghe Mak 1:15

Ọ wẹẹ, “Ẹghẹ wa sẹ nẹ nian, Arriọba Osanobua sẹ otọ fo! Wa zobọ vbe orukhọ ne a ru, ne uwa vbe do ya Iyẹn Ne ọ maa yi.”

Iyẹn ne ọ Maan Ọghe Mak 16:16

Ọmwaikọmwa ne ọ yayi, a na vbe samẹ nẹ ẹn, ọ gha miẹn imiẹnfan. Ọmwaikọmwa ne ọ ma yayi, a gha bu abe gbẹe.

Iyẹn ne ọ Maan Ọghe Luk 24:47

Kevbe wẹẹ, eni ẹnrẹn ọre a gha ya kpe orhu a roiro fi uyinmwẹ werriẹ kevbe a yabọ orukhọ ma uhunmwu ẹvbo hia, Jerusalẹm ọre a gha ke suẹ ọnrẹn.

Iyẹn ne ọ Maan Ọghe Luk 3:10

Avbe emwa ni keghi nọ rẹn wẹ, “Vbe ua wẹ ne ima ru?”

Iwinna 10:43

Avbe akhasẹ hia ta ẹmwẹ ọnrẹn wẹ ọmwaikọmwa ne ọ rhirhi a yae yi, a gha ya orukhọ ẹre hia bọ ẹe la ekpa ẹtin eni ẹnrẹn.”

Iwinna 10:48

Rẹn keghi yi iyi wẹ ne a ya eni Jesu Kristi sa amẹ ne iran. Iran keghi wẹ ne ọ gbe ikpẹdẹ eso vbe ehe ne iran ye.

Iwinna 13:38

Wa hia fẹrẹ, wa ne etẹn mwẹ, Ọ kere ne uwa rẹn nian vbe ne aro na da ẹe wẹ, Jesu ọre a la obọ ẹre rhie iyẹn a ya orukhọ bọ, bu uwa gha dee. Wa ghi vbe rẹn wẹ ọmwaikọmwa ne ọ yae yi, a fan ẹn fua nẹ hin obọ orukhọ hia rre, ehe ne Uhi e Mosis ma na sẹtin fannọ uwa kua.

Iwinna 16:15

A keghi sa amẹ ne ẹn ke ẹe kevbe owa ẹre. Rẹn keghi tama ima wẹẹ, “Deghẹ wa gele ka mwẹ ye ọmwa ne ọ ya Nọyaẹnmwa yi vbe ẹmwata, wa do di owa mwẹ ya.” Rẹn keghi rherhe ima viọ gha khian.

Iwinna 17:30

Osanobua ma ghi zẹ ye ẹmwẹ ẹghẹ ne emwa ne agbọn ma na rẹn nii, sokpan ẹghẹ na nian, ọ yi ẹre iyi ne emwa hia ni rre ehe hia wẹ ne iran lahin odẹ dan iran rre.

Iwinna 20:21

Iran ne Ju kevbe iran ne ẹ i re Ju, te I si agbada vbe unu ya tama emwa hia wẹẹ ne iran zobọ vbe orukhọ, ne iran bu Osanobua gha dee kevbe ne iran ya Nọyaẹnmwa Jesu yi.

Iwinna 22:16

Wanwanna nian, de emwi ne u ghi ye mudia khẹ? Kpaegbe ne a sa amẹ nuẹn ne a miẹn ehe na kpe orukhọ ruẹ kua vbe ekpa ne u na datie eni ẹnrẹn.’

Iwinna 26:18

U ghi rhan iran aro ne u gban iran uhunmwu hin ebiebi rre la uwu uwanmwẹ, kevbe hin ẹtin Setan rre ghe Osanobua. Vbene a gha na miẹn wẹ vbekpa ne iran na mu ẹtin yan mwẹ, a ghi ye orukhọ iran bọ iran, iran ghi rhie ihe iran vbe uwu ẹbu emwa ne Osanobua hannọ zẹ.’

Iwinna 26:20

I keghi suẹn gha kpe orhu, okaro vbe Damaskọs, vbe iyeke ọnii vbe Jerusalẹm kevbe la otọ Judia hia kevbe ma iran ne ẹ i re Ju wẹ ne iran fi uyinmwẹ werriẹ vbe ọghe orukhọ ne iran ru, ne iran bu Osanobua gha dee ne iran vbe gha ru emwi ne ọ gha rhie ma ighẹ iran gele fiwerriẹ.

Iwinna 3:19

Rhunmwuda ọnii nian, wa roiro fi uyinmwẹ werriẹ, wa bu Osanobua gha dee, ne ọ miẹn ehe na kpe orukhọ uwa hia kua.

Iwinna 5:31

Osanobua keghi tọn ẹn mu gha rrie obọ erha ọmwa ẹnrẹn zẹ vbe ọkaolotu kevbe Ọmiọnmwafan, ne ọ miẹn ehe na rhie ẹghẹ ne ivbi Izrẹl ya ro iro fi uyinmwẹ werriẹ, ne a miẹn ehe na ya orukhọ iran bọ iran.

Iwinna 8:12

Sokpan iran ghi ya ikporhu e Filip yi, ikporhu ọghe Iyẹn Ne ọ maa ọghe Arriọba Osanobua kevbe eni Jesu Kristi, a kegha sa amẹ ne iran, ke ikpia kevbe ikhuo.

Iwinna 8:20

Sokpan Pita wanniẹn tama rẹn wẹẹ, “Te uwẹ vbe igho ruẹ ra gba la ọrhiae rrie, ne u na gha ro ighẹ u gha sẹtin ya igho dẹ emwi ne Osanobua ya ru ọmwa ẹse.

Ebe ne Pọl gbẹẹn gie emwa Rom 6:3

Wa ma rẹn ra ighẹ, ẹghẹ ne a na sa amẹ ne ima ba Kristi Jesu, ighẹ te a sa amẹ ne ima kugbe ba uwu ne ọ wu.

Ẹfisọs 1:7

Rhunmwuda, vbe ekpa uwu Jesu Kristi, a keghi fannọ ima ye otọ, ọnii nọ wẹ a keghi vbe ya avbe orukhọ mwa bọ mwa. U miẹn vbe ẹsọhẹ, Osanobua kpọlọ hẹ,

Taitọs 3:5

Ọ keghi miẹn ima fan. Ẹ i re rhunmwuda iwinna esi ne ima tobọ mwa winna, sokpan, rhunmwuda itohan rẹn ọre ọ na miẹn ima fan, vbe ekpa akhuẹ ne Orhiọn Ne Ọ Huanrẹn ya dọlọ mwa biẹ, ọ na vbe rhie arrọọ ọghe ọgbọn ne ima.

I Pita 3:21

Amẹ na keghi re emwikemwi ne a ya gie isamẹ ne ọ miẹn uwa fan banbanna nian, ẹ i re vbe ekpa ne ọ na kpe iruẹn ne ọ rre ikinnegbe kua, sokpan vbe ekpa eyan ne a ya ekhọe ne ọ ma bu abe gbe ọmwa yan ma Osanobua. Te isamẹ la ekpa arhiọkpaegbe Jesu Kristi miẹn uwa fan.