Iwinna 18:5 - Edo Bible (E Baibol Ẹdo) Version 1996

⁵ Ugbẹn vbe Sailas kevbe Timoti ghi ke Masidonia rre, Pọl keghi wa ya ẹghẹ ọre hia gha kpe orhu iyẹn ne ọ maa, ọ na gha tama avbe Ju wẹ Jesu ọrọre Mẹzaia.

Iwinna 18:5 ပူးပေါင်းရင်းမြစ်များ

Jerimaia 20:9

Sokpan, I gha kha wẹẹ, “I gha mianmian e Nọyaẹnmwa, I i ghi vbe dọlegbe guan vbe eni ẹnrẹn.” Ẹghẹ nii, uhunmwu ne u gie ghi yevbe erhẹn ne ọ giẹn vbe uwu imẹ I ghi gha hia ne I yẹn ọnrẹn muotọ, sokpan I i ghi sẹtin rhie ẹre lẹre.

Jerimaia 6:11

Ohu iran ne ọ mu ẹẹn wa vbe giẹn vbe erhẹn vbe uwu ime, Nọyaẹnmwa, I i ghi sẹtin zin ẹnrẹn ọvbehe.” Ẹre Nọyaẹnmwa na tama mwẹ wẹẹ, “Hihiẹ ohu mwẹ yan avbe ibiẹka vbe adesẹ ore, kevbe ye ehe ne avbe igbama na si koko. A gha viọ avbe ọdọ kevbe avbe amwẹ kpao, a i ra vbe sẹ avbe ọmaẹn rae.

Ezikiẹl 3:14

Orhiọn Osanobua keghi wa ya ẹtin nọkhua hin yan mwẹ, vbene orhiọn rẹn wa mu mwẹ khian nii, ẹko kegha rriara mwẹ, ohu na gha mu mwẹ.

Maika 3:8

Sokpan, zẹ vbe ọghomwẹ e Nọyaẹnmwa ya orhiọn rẹn kevbe ẹtin ẹnrẹn vuọn mwẹ ọ vbe rhie mwẹ ne I gha rẹn emwi ne ọ re ohiẹn ẹmwata, kevbe udinmwẹ ne I gha ya gha tama ivbi Izrẹl orukhọ ne iran ru.

Iyẹn ne ọ Maan Ọghe Luk 12:50

I mwẹ isamẹ ọkpa ne I gha yegbe miẹn. U miẹn vbe egbe mannọ mwẹ hẹẹ, ọ te do fo vbe otọ!

Iyẹn ne ọ Maan Ọghe Luk 16:28

I mwẹ etẹn ikpia isẹn, ne ọ wa yan ma iran ne iran ghẹ vbe gha di uwu obalọ na.’

Iyẹn ne ọ Maan Ọghe Jọn 1:41

Vbe ọwarọkpa nii, Andru keghi miẹn Saimọn ne ọtiọnrẹn, ọ keghi tama rẹn wẹẹ, “Ma miẹn nene Mẹzaia nẹ.” (Emwi ne a ya ọnii kha ọrọre “Kristi.”)

Iyẹn ne ọ Maan Ọghe Jọn 10:24

Avbe Ju keghi do lẹga ẹre, iran wẹẹ, “Vbe u a gha gie ima rhie aro ye odẹ kpẹe sẹ hẹ? Wa ta ẹmwata ne ọ rrọọ ma ima. Wẹ ọ gele re Mẹzaia ra?”

Iyẹn ne ọ Maan Ọghe Jọn 15:27

Wa ne arẹngbe gha vbe ta ẹmwẹ mwẹ rhunmwuda ma hia ọ gba gha khian ke otọ gha dee.”

Iyẹn ne ọ Maan Ọghe Jọn 3:28

Wa tobọ uwa ọrọre osẹe mwẹ ighe I tae wẹẹ, ‘Mẹ i re nene Mẹzaia, sokpan te a gie mwẹ ke odaro nẹẹn!’

Iwinna 10:42

Rẹn keghi yi iyi ne ima ne a ya kpe orhu Iyẹn Ne ọ maa ma emwa hia, ne a vbe sẹ osẹe ọre wẹ rẹn ọrọre ọmwa ne Osanobua zẹe ne ọ gha re ne ọbuohiẹn emwa ni rre agbọn kevbe ni wulo nẹ.

Iwinna 15:22

Ẹghẹ nii ọre avbe Apọsol kevbe avbe ediọn deba esọsi hia na ghi ta ẹe wẹ ne iran zẹ emwa eso vbe uwu iran ne iran gie iran lele Pọl kevbe Banabas gha rrie Antiọk. Iran keghi zẹ Judas ne a tie ẹre Banabas kevbe Sailas, emwa ne a ye ọghọ na vbe uwu ẹbu avbe etẹn.

Iwinna 16:1

Pọl kegha rrie Dẹbi kevbe Listra. Ovbi iyayi ọkpa ne a tie ẹre Timoti keghi rre evba, iye ẹe ne ọ vbe re ovbi iyayi keghi re Ju sokpan erha ẹe kegha re Grik.

Iwinna 16:12

Ma keghi vbe ke evba la uwu ẹre gha rrie Filipai, ẹvbo ne ọ rre ototọ Rom. Ma gbe sẹ omwa ikpẹdẹ eso vbe ẹvbo nii.

Iwinna 16:9

Asọn ii, Pọl keghi miẹn umian vbe uwu ne ọ na miẹn ovbi Masidonia ọkpa ne ọ mudia gha rinmwiaẹn wẹẹ, “Gha die Masidonia ne u do yi ma obọ!”

Iwinna 17:3

Ọ kegha rhan otọ ẹre, ọ kegha rhie ma wẹẹ ẹ i mwẹ ne Mẹzaia ghẹ rri oya kevbe ne a vbe huẹn ọnrẹn kapo vbe idin. Pọl keghi kha wẹẹ, “Jesu na ne I ta ẹmwẹ ọnrẹn ma uwa na, ọrọre nene Mẹzaia.”

Iwinna 18:28

Rhunmwuda, ọ keghi ya imuan ẹmwẹ ọnrẹn ne ọ wo vbe egbe ya avbe Ju rhie obọ gue unu iran, vbe iran a vba egbe vbe ẹbu emwa, ọ keghi ya ẹmwẹ Ebe ni rhie ma wẹ, Jesu ọrọre nene Mẹzaia.

Iwinna 2:36

“Rhunmwuda ọnii, wa ne ivbi Izrẹl, wa hia rẹn nian wẹẹ, Jesu nii ne uwa kan mu ugbugbe, Osanobua ya ẹe khian Nọyaẹnmwa kevbe Mẹzaia nẹ.”

Iwinna 20:21

Iran ne Ju kevbe iran ne ẹ i re Ju, te I si agbada vbe unu ya tama emwa hia wẹẹ ne iran zobọ vbe orukhọ, ne iran bu Osanobua gha dee kevbe ne iran ya Nọyaẹnmwa Jesu yi.

Iwinna 20:23

Emwi ọkpa I rẹnrẹn wẹ ẹvbo ne I rhirhi a sẹ ọre Orhiọn Ne Ọ Huanrẹn na tama mwẹ wẹ eghian kevbe ukpokpo dia khẹ mwẹ.

Iwinna 20:24

Sokpan mẹ wa ka uhunmwu mwẹ ye ne ẹ i mwẹ esa, ne I miẹn ehe na khain okhian ne ọ wa mẹ sẹ otọ, ne I vbe winnaẹn fo ighẹ iwinna ne Nọyaẹnmwa Jesu wa mẹ ne I ru, ọnii nọ wẹ ne I ya wewe Iyẹn Ne ọ maa ọghe Ẹsọhẹ Osanobua.

Iwinna 4:20

Rhunmwuda, ẹ i gie ima ru wẹ emwi ne aro ima sẹe nẹ, ehọ mwa vbe họn ẹn nẹ, ne a ghẹ ghi ta ẹe ladian.”

Iwinna 9:22

Sokpan orhu ne Sọl kpe keghi wa dọlegbe gha mu otọ sẹ ayọ. Ẹmwẹ ne ọ ta ya rhan otọ ẹre ighẹ Jesu ọrọre nene Mẹzaia keghi la ehọ sẹrriọ wẹẹ a ma miẹn Ju ọkpa ne ọ sẹtin guee muan ẹnrẹn vbe Damaskọs.

II Kọrinti 1:19

Rhunmwuda, Jesu Kristi, ne Ovbi Osanobua ne Timoti Sailas kevbe imẹ kpe orhu ẹre ma uwa, ẹ i re ọmwa nọ re “Ẹn” kevbe “Ẹn o.” Sokpan rẹn ọrọre “Erriọ nọ” ọghe Osanobua.

II Kọrinti 11:9

Ẹghẹ ne I na gha rre ehe ne uwa ye, a deghẹ igho i gue mwẹ, I ma vbe ya ye uwa egbe, rhunmwuda, etẹn ni ke Masidonia rre viọ emwi ne I i te mwẹ hia gun mwẹ. Zẹ vbe ne I ka ru ẹe, vbe ẹghẹ ne ọ gberra, erriọ I ra ye gha ru ẹe vbe ẹghẹ ne a ọ dee. I i ra kun enegbe mwẹ yan uwa.

II Kọrinti 5:14

Rhunmwuda, aho ẹmwẹ ọmwa ne Kristi mwẹ ghe mwa, ọre ọ da kha yan mwa, ugbẹn vbe ima ghi do rẹn nẹ nian wẹ, orhiọnkpa wu ne emwa hia, ne ọ rhie maa wẹ, emwa hia mwẹ oghae vbe uwu ẹre.

Filipai 1:23

Te aro mwẹ ghi rre eran rre eran. Ọ wa khọn mwẹ ne I sẹ agbọn na rae ne I ya tota ke Kristi, ọnii ọ wa re emwi ne ọ maa sẹ ẹsẹse.

I Tẹsalonaika 3:2

Ne ima gie Timoti bu uwa gha dee, ọtẹn mwa, ọmwa ne ọ gu ima winna ne Osanobua vbe ekpa ne ọ na kpe orhu nene Iyẹn Ne ọ maa ọghe Kristi. Ma gi ẹe bu uwa gha dee ne ọ do yi uwa obọ kevbe ne ọ vbe rhie iyobọ ne iyayi uwa.

I Tẹsalonaika 3:6

Banbanna nian, e Timoti ke ehe ne uwa ye rre do vba ima nẹ, ọ keghi vbe do na iyẹn esiesi ọghe iyayi kevbe aho ẹmwẹ ọmwa uwa. Ọ tama ima wẹ, ẹko ima wa ma uwa ẹghẹ hia, kevbe wẹ, vbene ima ho ne ima miẹn uwa, erriọ wa vbe ho ne uwa miẹn ima.

I Pita 5:12

Sailas, ọmwa ne ima ka ye ọtẹn ne ẹ i hiẹ ọmwa, ọre ọ gun mwẹ gbẹn ehe ne kherhe na gie uwa, I ho ne I rhie igiẹdu ne uwa, ne I vbe ya unu mwẹ ta ẹe ma uwa zẹ vbe ẹmwẹ obọ mwẹ wẹ, ẹsọhẹ ọghe Osanobua, ọre ọ na khin. Wa mudia yọ gbain.