Iwinna 18:24 - Edo Bible (E Baibol Ẹdo) Version 1996

²⁴ E Ju ọkpa ne a tie eni ẹnrẹn Apọlọs, ne a biẹe vbe Alẹkzandria kegha die Ẹfisọs. Ọmwa ne ẹmwẹ ma ẹre unu nọ, ọ keghi vbe rẹn Ebe ni ẹsẹse.

Iwinna 18:24 ပူးပေါင်းရင်းမြစ်များ

Ẹzra 7:12

“Atakzaziz ne Ọgbaisi ọ re ọ gbẹnnẹ avbe ẹmwẹ na gie Ẹzra ne ohẹn ne ọ vbe re ọrẹnbe ọghe Uhi e Nọyaẹnmwa ne Osanobua Ẹrinmwi.

Ẹzra 7:6

Ẹzra kegha re ọgbẹn ebe ne ọ wa rẹn ọnrẹn ẹsẹse ighẹ Uhi ne Nọyaẹnmwa ne Osanobua Izrẹl rhie ne Mosis. Rhunmwuda ne afiangbe Nọyaẹnmwa ne Osanobua ẹre na gha rre Ẹzra egbe, Nọgbaisi keghi wa viọ emwi hia ne ọ nọrẹn ne ẹẹn. Ọ ghi rre ukpo ihinrọn ne Atakzaziz la ẹkete, Ẹzra keghi viọ ivbi Izrẹl eso ba egbe ke Babilọn gha die Jerusalẹm, avbe ohẹn eso kevbe Livai, avbe ọsian Ọgua Osa, iran ni khẹ Ọgua Osa kevbe emwa ni winna eso kegha rre nene usun.

Ẹksọdọs 4:10

Sokpan, e Mosis keghi tama Nọyaẹnmwa wẹẹ, “Lahọ ghẹ gie mwẹ, Nọyaẹnmwa, mẹ ma he guara guan vbe ẹbu ẹdẹ, kevbe ne u vbe ya suẹn gha gu mwẹ guan gha dee, I ma he vbe ye guẹ, Nọyaẹnmwa. I i gua ra guan, te I ta ẹe lọkọlọkọ, I ghi vbe gha ba ẹmwẹ.”

Aizaia 3:3

avbe ekaolotu ivbiyokuo iran kevbe avbe ọkaolotu ni i re ivbiyokuo, iran ni gbinna igbinna ẹvbo iran, kevbe iran ni ya ẹbo awan kha vbene emwi gha de hẹ.

Matiu 13:52

Ọ keghi dọlegbe tama iran wẹẹ, “Ọnii rhie ma wẹ deghẹ ọma emwa Uhi ọkpa do khian ọrhuanegbe vbe uwu Arriọba ẹrinmwi, rẹn ghi do yevbe ọdafẹn nọyan owa, ọ ghi vbe gha viọ emwi ọgbọn kevbe emwi ọwiẹyi ke uwu aza ẹre ladian.”

Iyẹn ne ọ Maan Ọghe Luk 24:19

Ọ nọ rẹn wẹẹ, “Vbọ khun emwi?” Iran wanniẹn wẹẹ, “Avbe emwi ni sunu vbe egbe Jesu ne ovbi e Nazarẹt nọ vbe gha re akhasẹ, ne Osanobua kevbe emwa ne agbọn ka ye ọmwa nọkhua vbe ẹmwẹ ne a guan kevbe emwi ne a ru.

Iwinna 18:19

Iran ghi sẹ Ẹfisọs, Pọl keghi sẹ Priskila kevbe Akuila rae vbe evba, ọ kegha rrie Ọgua ediọn, ọ keghi ya gha gu avbe Ju guan.

Iwinna 18:21

Sokpan, ọ ghi ra kpao ọ tama iran wẹ, “A deghẹ Osanobua ho ro, I gha dọlegbe bu uwa rre,” ọ na la okọ kpao vbe Ẹfisọs.

Iwinna 18:28

Rhunmwuda, ọ keghi ya imuan ẹmwẹ ọnrẹn ne ọ wo vbe egbe ya avbe Ju rhie obọ gue unu iran, vbe iran a vba egbe vbe ẹbu emwa, ọ keghi ya ẹmwẹ Ebe ni rhie ma wẹ, Jesu ọrọre nene Mẹzaia.

Iwinna 19:1

Ẹghẹ ne Apọlọs na gha rre Kọrinti, e Pọl keghi khian la uwu otọ ẹvbo nii, ọ keghi lae do sẹ Ẹfisọs. Rẹn keghi vbe miẹn erhuanegbe eso vbe evba.

Iwinna 27:6

Evba ọre ne ọ rre asẹ na miẹn okọ ne ọ khian gua gha rrie Itali, ọ na rhunmwuda ọnii viọ ima la rọ.

Iwinna 6:9

Sokpan emwa eso kegha kpankan ẹre ẹmwẹ, iran na kegha re emwa Ọgua ediọn Eniyan Egbe iran (zẹ vbene emwa tie iran) uwu iran na ọre avbe Ju ni ke Sameria kevbe Alẹkzandria rre ye. Iran na kevbe avbe Ju eso ni ke Silisia kevbe Asia rre keghi suẹn gha muan Stivin ẹmwẹ.

Iwinna 7:22

A keghi vbe ma ẹre irẹnmwi Igipt hia. Rẹn keghi khian ọkpọmwa vbe ẹmwẹ kevbe emwi ne a ru.

I Kọrinti 1:12

Gu mwẹ wa tae vbe nian wẹ ẹmwẹ ughughan wa hia ta. Orhiọnkpa ghi wẹ, “Otu e Pọl mẹ ye,” ọmwa ọvbehe ghi vbe wẹẹ, “Otu Apọlọs mẹ ye.” Eso ghi vbe wẹ, “Otu e Pita mẹ ye,” eso ghi vbe wẹ, “Otu e Kristi mẹ ye.”

I Kọrinti 16:12

Ẹn hẹn, vbe ekpa ọghe ọtẹn mwẹ ighẹ Apọlọs, ọ kpẹre ne I kegha kpikpi ẹe ne irẹn vbe etẹn nekpa do tuẹ uwa, sokpan, ọ ma he mu ẹre ekhọe ne ọ rre vbe ẹghẹ na, vbene ọ rhirhi gha ye hẹ, ọ gha miẹn obọ, ọ gha rre.

I Kọrinti 4:6

Rhunmwuda uwa, etẹn mwẹ, ẹmwẹ Apọlọs kevbe egbe mwẹ ọre I ta na. Te I ya egbe mwa ru igiemwi ne uwa miẹn ehe na rẹn emwi ne a ya ẹmwẹ na kha wẹẹ, “Wa gha ru vbene a yi ẹre iyi.” Ọmwa rhọkpa vbe uwu uwa ghẹ gha ya ọmwa ọkpa ghagha, ne ọ gha zan ọmwa ọvbehe.

II Kọrinti 10:10

Emwa eso gha kha wẹẹ, “Ebe ne Pọl gbẹnnẹ khua, ọ keghi vbe wo vbe egbe, sokpan ọ gha gu ọmwa mudia, ọ ghi ye vburriẹ, ẹmwẹ ọnrẹn i vbe gbe emwi.”

Kọlose 3:16

Wa gie ikporhu Kristi ke ẹe kevbe uvuọnmwẹ ọnrẹn gha rre ekhọe uwa. Wa gha ye ẹwaẹn ma egbe emwi, ne uwa vbe gha ya ẹe bu egbe ude. Wa gha ye Psalm so ihuan, wa gha so ihuan kevbe ihuan ni huanrẹn, wa gha ye ekhọe oghọghọ so ihuan ghe Osanobua uwa.

Taitọs 3:13

Hia ne u ru iyobọ ne Zenas ne ulaya, ke ẹe kevbe Apọlọs, ne iran ya suẹn okhian iran, u ghi miẹn wẹ, a viọ emwi ne iran gha lo hia ne iran.