Iwinna 16:19 - Edo Bible (E Baibol Ẹdo) Version 1996

¹⁹ Ugbẹn vbe iran ni yan rẹn ghi miẹn wẹ, emwi ne iran te ya miẹn igho rrie, iran keghi de obọ mu Pọl kevbe Sailas, iran na silo iran bu avbe eghaẹvbo vbe ihueada ẹvbo hoho.

Iwinna 16:19 ပူးပေါင်းရင်းမြစ်များ

Daniẹl 6:12

Iran hia keghi koko gha khian ya gu e Daniẹl gui. Iran wẹẹ, “U gha tọ u kpẹre Umogun, wẹ ọ re ọ rhie obọ ye ebe iyi ne ọ khare wẹ ọ te ya sẹ ikpẹdẹ ọgban ọmwaikọmwa ne ọ nọ ẹbọ ọvbehe ra ọmwa ọvbehe rhọkpa emwi vbe ọ gberra uwẹ, a gha fi ọmwa ni fi uwu uvun ne a viọ avbe oduma vuọn.” Ọba keghi wanniẹn wẹẹ, “Ẹmwata nọ, ọnii ọrọre uhi ni zẹ vbe uhi ivbi Medis kevbe Pẹsia ne ẹ i fiwerriẹ.”

Matiu 24:9

“A gha vbe munọ uwa, a ghi vbe viọ uwa gie emwa ni gha rri uwa oya. Emwa hia ghi gha khuiwu uwa ba ẹmwẹ mwẹ.

Iyẹn ne ọ Maan Ọghe Mak 13:9

“Wa tobọ uwa, wa ghi khẹ ye egbe. Rhunmwuda emwa gha dekun uwa gha munọ ye iko ẹzọ. Iran gha gbele uwa vbe Ọgua ediọn. Wa gha mudia vbe odaro avbe ọba kevbe ekhaẹmwẹ rhunmwuda mwẹ, ne uwa kpe orhu Iyẹn Ne ọ maa ma iran.

Iwinna 14:19

Avbe Ju eso keghi ke Antiọk ne ọ rre otọ Pisidia kevbe Aikọniọm gha dee, iran ruẹn ẹmwẹ ye emwa nii ẹko ya viọ iran ba egbe, iran keghi filo okuta gbe Pọl, iran na hiọrọ ẹe fua hin adesẹ ore ẹvbo rre, iran te ro ighẹ ọ wu nẹ.

Iwinna 14:5

Ẹghẹ nii ọre iran ne Ju kevbe iran ne ẹ i re Ju, deba avbe olotu iran, na wẹ ne iran rri avbe ukọ oya ne iran vbe filo okuta gbele iran uan.

Iwinna 15:22

Ẹghẹ nii ọre avbe Apọsol kevbe avbe ediọn deba esọsi hia na ghi ta ẹe wẹ ne iran zẹ emwa eso vbe uwu iran ne iran gie iran lele Pọl kevbe Banabas gha rrie Antiọk. Iran keghi zẹ Judas ne a tie ẹre Banabas kevbe Sailas, emwa ne a ye ọghọ na vbe uwu ẹbu avbe etẹn.

Iwinna 15:26

Emwa ne ọ wa rhunmwuda ugamwẹ Nọyaẹnmwa Jesu Kristi rhie uhunmwu da ẹbe.

Iwinna 15:40

Pọl keghi zẹ Sailas, ọ na kpao, avbe etẹn keghi rhie ẹre yan ẹsọhẹ Osanobua obọ ne ọ gha gbe aro ghe ẹre.

Iwinna 16:16

Ẹdẹ ọkpa, ma ghi rrie ehe ne a na na erhunmwu, ọvbokhan okhuo ọkpa, ne ọre ọviẹn, ne ọ vbe mwẹ orhiọn dan nọ yae miẹn aro, keghi khian vbe ima. Igho ọrhẹnrhẹn ọre ọ ye aro me ọ miẹn nii khuan ne enarẹn.

Iwinna 16:20

Iran keghi viọ iran bu avbe eghaẹvbo emwa Rom wẹ, “Ivbi e Ju iran na khin, iran do gha lighi ima ẹvbo.

Iwinna 16:25

Ọ ghi sẹ ogiasọn, Pọl kevbe Sailas kegha so ihuan, iran na gha na erhunmwu ghe Osanobua, avbe oleghan nekpa kegha danmwehọ iran.

Iwinna 16:29

Eseghan ni keghi wẹ ne iran mu ukpa rre, ọ keghi gbe egbe la owa, ọ keghi de fi akharha Pọl kevbe Sailas, ọ na gha guọ zẹzẹzẹ.

Iwinna 17:6

Ugbẹn vbe iran ma miẹn iran, iran keghi si Jasin deba eso vbe uwu avbe etẹn bu iran ni khaemwisẹ gha khian, iran keghi wa gha goo wẹẹ, “Iran na si otighi gba ehe hia, iran vbe gha die ẹvbo ima nian,

Iwinna 21:30

Adesẹ ore ẹvbo hia keghi wa tighi ua, iran hia keghi wa mu vẹ, iran gua Pọl rhie, iran na hiọrọ ẹe hin uwu Ọgua Osa rre. Vbe ọwarọkpa nii, iran na khui urho Ọgua Osa.

Iwinna 8:3

Sokpan e Sọl kegha hia ne ọ wa fuẹn esọsi rua fẹẹrẹ, ọ na gha ke owa ọkpa la ọvbehe, ọ na gha munọ emwa ni yayi hia ikpia kevbe ikhuo, ọ na gha hẹ iran ku ẹwẹdọ.

Iwinna 9:16

Mẹ gha tobọ mwẹ rhie ma rẹn oya ne ọ gha re rhunmwuda mwẹ.”

II Kọrinti 6:5

A gbe ima asan, a mu ima ye ẹwẹdọ, a ko gbe mwa, a ya ima miẹn ẹsọn, ma kegha rrọọ vbe ne a i na rri evbare kevbe ne a i na vbiẹ.

Filipai 1:30

Wanwanna nian, wa gha sẹtin gun mwẹ gbinna igbinna na, ọkpa nii ne uwa miẹn vbe I gbinna ẹghẹ ne ọ gberra nọ, ọnii ọ re I ye gbinna khian na, zẹ vbene uwa họẹn.

I Tẹsalonaika 2:2

Wa rẹn vbene a ru ima emwi oya hẹ, ne a na vbe fa ima uan vbe Filipai, ma keghi kpao bu uwa gha die Tẹsalonaika. Ọ rhe ye rriọ, Osanobua keghi ye rhie orhiọn ye ima iwu, ne ima ya kpe orhu iyẹn nii ma uwa, a gha rhe miẹn wẹ, vbe adesẹ igbodan nọkhua nọ.

I Timoti 6:10

Rhunmwuda aho ẹmwẹ igho ọre emwi dan ughughan ke zọ ladian. Ẹmwẹ ne a gha mwẹ ọnrẹn mu emwa eso sẹrriọ wẹ, te iran ghi fi iyeke gbe iyayi, iran keghi ya akhiẹ ni bun guọghọ ekhọe iran uan.

Jems 2:6

Sokpan, wa i ya ọghọ ne ivbiogue! De emwa ni zẹ uwa owẹ yi, ni vbe silo uwa gie enibuohiẹn? Ẹ i re iran ni fee nọ.