Iwinna 14:26 - Edo Bible (E Baibol Ẹdo) Version 1996

²⁶ Evba nii i ọre iran ghi ke gua okọ gha die Antiọk, ehe ne a na ka rhie iran ne ẹsọhẹ Osanobua gha gbe aro ghe vbe uwu iwinna ne iran ghi do winna fo na.

Iwinna 14:26 ပူးပေါင်းရင်းမြစ်များ

Iwinna 11:19

Ukpokpo ne ọ suẹn rẹn vbe iran gbe Stivin nẹ, kegha zagha emwa ni hia kua. Eso vbe uwu iran keghi khian ya sẹ Fonisia, Saiprọs kevbe Antiọk, iran kegha kpe orhu ma avbe Ju ọkpa.

Iwinna 11:20

Sokpan ivbi iyayi eso ni ke Saiprọs kevbe Sairin rre kegha rrie Antiọk, iran keghi vbe ya kpe orhu ma emwa eso ne ẹ i re Ju, iran kegha ta ẹmwẹ Iyẹn Ne ọ maa ọghe Nọyaẹnmwa Jesu ma iran.

Iwinna 11:23

U gbẹn vbe ọ ghi sẹ evba, ọ keghi miẹn vbene Nọyaẹnmwa fiangbe emwa nii hẹ, ẹko keghi rhiẹnrhiẹn ọẹn ẹsẹse, ọ keghi bu iran ude wẹ ne iran ya ekhọe iran hia mu ẹtin yan Nọyaẹnmwa ne iran vbe gha ga ẹe.

Iwinna 11:26

Ugbẹn vbe ọ ghi miẹn ọẹn, ọ keghi rhie ẹre gha die Antiọk. Vbe ukpo hoho gbalaka, iran eva kegha gu emwa esọsi do iko, iran kegha ma otu ni bun emwi. Antiọk ọre a na ka gha tie avbe erhuanegbe ivbi Otu e Kristi.

Iwinna 11:27

Ẹghẹ nii avbe akhasẹ eso keghi ke Jerusalẹm gha rrie Antiọk.

Iwinna 14:19

Avbe Ju eso keghi ke Antiọk ne ọ rre otọ Pisidia kevbe Aikọniọm gha dee, iran ruẹn ẹmwẹ ye emwa nii ẹko ya viọ iran ba egbe, iran keghi filo okuta gbe Pọl, iran na hiọrọ ẹe fua hin adesẹ ore ẹvbo rre, iran te ro ighẹ ọ wu nẹ.

Iwinna 14:21

Pọl kevbe Banabas keghi kpe orhu Iyẹn Ne ọ maa vbe Dẹbi, iran keghi miẹn emwa ni bun viọ ba egbe vbe evba. Iran keghi werriegbe gha rrie Listra kevbe Aikọniọm kevbe Antiọk ne ọ rre Pisidia.

Iwinna 14:23

Iran keghi mannọ ọdiọn lele dọmwadẹ esọsi ne iran. Iran keghi ye aguẹ kevbe erhunmwu rhie iran yan Nọyaẹnmwa ne iran mu ẹtin yan obọ.

Iwinna 15:22

Ẹghẹ nii ọre avbe Apọsol kevbe avbe ediọn deba esọsi hia na ghi ta ẹe wẹ ne iran zẹ emwa eso vbe uwu iran ne iran gie iran lele Pọl kevbe Banabas gha rrie Antiọk. Iran keghi zẹ Judas ne a tie ẹre Banabas kevbe Sailas, emwa ne a ye ọghọ na vbe uwu ẹbu avbe etẹn.

Iwinna 15:30

Iran ghi gbe okhian ẹwerẹ ne iran nẹ, iran ne a gie ẹre uhunmwu nii kegha rrie Antiọk, iran keghi si avbe emwa ni yayi hia koko, iran na rhie ebe ni ne iran.

Iwinna 15:40

Pọl keghi zẹ Sailas, ọ na kpao, avbe etẹn keghi rhie ẹre yan ẹsọhẹ Osanobua obọ ne ọ gha gbe aro ghe ẹre.

Iwinna 20:32

“Wanwanna, I viọ uwa ne Osanobua gha su deba ẹmwẹ ẹsọhẹ ọghọe. Rẹn gha sẹtin ye uwa digiẹ, ọ ghi vbe rhie afiangbe ne ọ viọ khẹ emwa rẹn hia ne uwa.

Ebe ne Pọl gbẹẹn gie emwa Rom 15:19

La ekpa ẹtin, ama kevbe iwinna ọyunnuan kevbe ẹtin ọghe Orhiọn. Ọre a na miẹn wẹẹ I ke Jerusalẹm khian ya sẹ Ilirikọm. I kegha na ọna ọre ọ na fo ighẹ Iyẹn Ne ọ maa vbe ekpa Jesu Kristi.

II Kọrinti 1:12

Emwi ne ima ya ghagha ọ na khin: ekhọe mwa tama mwa wẹ, uyinmwẹ mwa vbe agbọn na, ibiba vbe ne ima vbe uwa gba ya ye egbe khian hẹ, a ta ẹmwata kevbe a i zẹ ibeleku ọrọre okpo ne ọ da ẹe yi, vbe ekpa ẹtin ẹsọhẹ Osanobua nọ, ighẹ ẹ i re vbe ekpa iguemwi emwa ne agbọn.

Galatia 2:11

Ugbẹn vbe Pita sẹ Antiọk, uwu ẹbu ọre I na gha gu ẹe gui, rhunmwuda emwi ne ọ ru ma kei hiehiere.

Kọlose 1:25

Osanobua vbe ya mwẹ ru ọguọmwadia esọsi nẹ, ọmwa ne ọ mu iwinna na mẹ winna, ne umamwẹ uwa. Ne iwinna ọrọre ne a gha ta ẹmwẹ nene iyẹn ne ọ maa ọta fo.

Kọlose 1:28

Rhunmwuda ọnii, ọre ima na kpe orhu Kristi ma emwa hia, ma ghi gha tama emwa hia ye otọ, ma ghi gha ma iran emwi vbe odẹ ẹwaẹn hia, ne a sẹtin lo, ne a miẹn ehe na rhie edọmwadẹ ọghọe gha die odaro Osanobua zẹ vbe ọmwa ne ọ si uwan nẹ, vbe uwu a ya egbe ba Kristi.

Kọlose 4:17

Wa khama Akipọs wẹ, “Ghẹ i mwẹ u ma winnaẹn fo ighẹ okhuo ne a fian nuẹn vbe iwinna Nọyaẹnmwa.”

II Timoti 4:2

Gha kpe orhu nene ẹmwẹ, mu yan rẹn wẹ, ne a gha ta ẹe, deghẹ ẹghẹ ke yọ, ra ọ ma ke yọ ne u gha yae la emwa ekhọe, ne u gha gu ọmwa gui, ne u gha rhie igiẹdu ne emwa, kevbe ne u gha ye i ziengbe ma emwa emwi.