Iwinna 1:8 - Edo Bible (E Baibol Ẹdo) Version 1996

⁸ Sokpan Orhiọn Ne Ọ Huanrẹn gha ghi hin yan uwa nẹ, ẹtin nọkhua ghi gha gue uwa, wa ghi ya sẹ osẹe mẹ vbe Jerusalẹm kevbe Judia hia, kevbe Sameria, kevbe rhinrin ya sẹ ehe ne agbọn sẹe.”

Iwinna 1:8 ပူးပေါင်းရင်းမြစ်များ

Psalm 22:27

Agbọn ẹvbo hia gha ye Nọyaẹnmwa rre, iran gha ke igienenẹ agbọn, bu ẹre rre. Ivbi ẹvbo ughughan gha rho ẹre.

Psalm 98:3

Ọ ru zẹ vbene ọ ve ivbi Izrẹl re, vbe amuẹtinyan kevbe aho ne ẹ i beghe ne iran emwa hia ni rre ehe hia, miẹn akhọnmiotọ Osanobua mwa nẹ.

Aizaia 42:10

Wa so ihuan ọgbọn ghe Nọyaẹnmwa wa so ihuan urhomwẹ ọnrẹn, wa ne otọ agbọn hia. Wa rho ẹre, wa ni gua khian vbe okun wa rho ẹre, wa ne emwi ni rre amẹ, wa so ihuan, wa ne otọe urria kevbe emwa ni rrọọ hia.

Aizaia 49:6

E Nọyaẹnmwa keghi tama mwẹ wẹẹ, “I mwẹ iwinna ne ọ sẹ ọna ne I wa ye otọ khẹ ruẹ ọguọmwadia mwẹ. Ẹire ne u viọ ivbi Izrẹl ni ghi kẹe werriegbe ye ihe ukpọlọmwẹ ọkpa; sokpan, I gha vbe ya a ru uwanmwẹ, ọghe avbe uhunmwu ẹvbo ne a sẹtin miẹn otọ agbọn hia fan.”

Aizaia 52:10

E Nọyaẹnmwa gha lo ẹtin ẹnrẹn nọhuanrẹn ọ gha miẹn rẹn fan agbọn na hia gha vbe miẹn ọẹn.

Aizaia 66:19

iran ghi vbe rẹn wẹ mẹ ọ re ọ rri iran oya. Sokpan, I gha sẹ eso rae vbọ, I ghi viọ iran gha rrie ẹvbo urria, iran ni ma he họn otiti mwẹ ra ne iran miẹn ukpọlọmwẹ kevbe ẹtin mwẹ. Avbe e Spen, e Libya kevbe Lidia ne emwa ni guara fi uhanbọ, kevbe gha rrie Tubal kevbe Gris. Iran gha ya na iyẹn ukpọlọmwẹ mwẹ ma avbe uhunmwu ẹvbo na.

Jerimaia 16:19

E Nọyaẹnmwa, wẹ ọrọre ọmwa ne ọ degue mwẹ kevbe ne ọ rhie ẹtin mẹ wẹ ọ re ọ yọmwẹ obọ vbe ọghe ibaro. Avbe uhunmwu ẹvbo gha ke ufomwẹ agbọn bu ruẹ rre do kha wẹẹ, “Avbe erha ima odede i mwẹ emwi rhọkpa gberra ẹbọ ohoghe, emwirhọkpa i rrọọ gberra amazẹ ne ẹ i mwẹ asa.

Maika 3:8

Sokpan, zẹ vbe ọghomwẹ e Nọyaẹnmwa ya orhiọn rẹn kevbe ẹtin ẹnrẹn vuọn mwẹ ọ vbe rhie mwẹ ne I gha rẹn emwi ne ọ re ohiẹn ẹmwata, kevbe udinmwẹ ne I gha ya gha tama ivbi Izrẹl orukhọ ne iran ru.

Zẹkaraia 4:6

Odibosa nii keghi tama mwẹ ne I ta uhunmwu ne Nọyaẹnmwa gie gie Zerubabẹl na ma rẹn wẹẹ, “U gha khọnmiotọ, sokpan, ẹ i re vbe ekpa ẹtin ivbiyokuo ra ẹtin ọghe obọ ruẹ sokpan, orhiọn mwẹ.

Matiu 24:14

A gha kporhu Iyẹn Ne ọ maa ọghe Arriọba na la otọ agbọn hia nẹ zẹ vbe osẹe ghe emwa hia, iyeke ọnii, ufomwẹ ghi do rre.

Matiu 28:19

Wa bu emwa hia gha rrie ehe hia ne uwa ya gha ya iran khian erhuanegbe mwẹ, wa gha samẹ ne iran vbe Eni ọghe Erha, kevbe Ọmọ kevbe ọghe Orhiọn Ne Ọ Huanrẹn.

Iyẹn ne ọ Maan Ọghe Mak 16:15

Ọ tama iran wẹẹ, “wa gha rrie uwu agbọn hia ne uwa vbe ya kpe orhu iyẹn ne ọ maa ma emwa hia.

Iyẹn ne ọ Maan Ọghe Luk 1:35

Odibosa ni keghi wanniẹn wẹẹ, “Orhiọn Ne Ọ Huanrẹn gha rhuẹ yan ruẹn. Ẹtin Osanobua gha hin yan ruẹn. Rhunmwuda ọnọna, a gha tie ọmọ ne ọ huanrẹn ni Ovbi Osanobua.

Iyẹn ne ọ Maan Ọghe Luk 10:19

Wa danmwehọ, I rhie ẹtin ne uwa nẹ ne uwa ya gha rrilo ekpakpahuangan kevbe ẹyẹn muotọ, kevbe ẹtin vbe uhunmwu ẹtin hia ne Oghian ni mwẹ. Emwi ọkpa ne ọ gha kuan uwa, ẹ i rrọọ.

Iyẹn ne ọ Maan Ọghe Luk 24:29

Sokpan iran keghi daeyi wẹẹ, “Gu ima tota, te ebi ghi ra ro, ebiebi vbe so nẹ.” Rhunmwuda ọnii rẹn keghi la owa ne ọ ya tota ke iran.

Iyẹn ne ọ Maan Ọghe Jọn 15:27

Wa ne arẹngbe gha vbe ta ẹmwẹ mwẹ rhunmwuda ma hia ọ gba gha khian ke otọ gha dee.”

Iwinna 1:5

Rhunmwuda, amẹ ọre Jọn ya sa amẹ ne emwa, sokpan vbe ọ ma he kpẹe wan, a gha ya Orhiọn Ne Ọ Huanrẹn sa amẹ ne uwa.”

Iwinna 13:31

Vbe ikpẹdẹ ni bun, iran ni lele ẹe ke Galili gha die Jerusalẹm miẹn ọẹn. Iran na ọre ọ ghi re osẹe ọre vbe odaro ivbi Izrẹl.

Iwinna 2:32

“Jesu ne a kha na, Osanobua huẹn ọnrẹn kpao vbe idin, ma na hia ọre osẹe ne aro ẹre sẹ ọe.

Iwinna 22:15

Rhunmwuda osẹe oghẹ ẹe ọre u khian gha khin ne u ya tama emwa hia emwi ne u miẹn kevbe ne u họẹn.

Iwinna 3:15

Erriọ ọre uwa ya gbe ẹe rua ighe Ayi ne ọ yi arrọọ. Sokpan Osanobua huẹn ọnrẹn kpaegbe vbe idin, ma ọrọre osẹe ne aro ẹre sẹ emwi na.

Iwinna 4:33

Avbe ukọ keghi gha ya ẹtin nọkhua sẹ osẹe arhiọkpaegbe ọghe Nọyaẹnmwa Jesu. Osanobua keghi wa vbe gha tue afiangbe yan iran hia.

Iwinna 5:32

Ma ọrọre osẹe emwi na hia, ma kevbe Orhiọn Ne Ọ Huanrẹn ne Osanobua ya ru emwa hia ni họn ẹmwẹ ọnrẹn ẹse.”

Iwinna 6:8

E Stivin keghi re ọmwa ne Osanobua fiangbe ẹsẹse kevbe ne ọ vbe mwẹ ẹtin, rẹn keghi winna iwinna ama, kevbe ọyunnuan ni bun vbe ẹbu emwa nii.

Iwinna 8:1

Ọ keghi wa yẹ Sọl wẹ a gbe ẹe rua. Ẹdẹ ne ẹdẹrriọ zẹẹ ọre esọsi ne ọ rre Jerusalẹm suẹn gha miẹn ukpokpo. Emwa ni yayi hia keghi zagha lele iwewe Judia kevbe Sameria hia, avbe ukọ ọre ọ ghi de kẹe.

Ebe ne Pọl gbẹẹn gie emwa Rom 10:18

Sokpan ọta ne I mẹ nọ rẹn ọna khin: Iran ma gele họn nene ẹmwẹ ra? Ẹsẹse, iran wa họn, zẹ vbene ebe khare: “Urhu iran la otọ agbọn hia, ẹmwẹ iran sẹ ehe ne agbọn sẹe.”

Ebe ne Pọl gbẹẹn gie emwa Rom 15:19

La ekpa ẹtin, ama kevbe iwinna ọyunnuan kevbe ẹtin ọghe Orhiọn. Ọre a na miẹn wẹẹ I ke Jerusalẹm khian ya sẹ Ilirikọm. I kegha na ọna ọre ọ na fo ighẹ Iyẹn Ne ọ maa vbe ekpa Jesu Kristi.

Kọlose 1:23

Ne ẹ i mwẹ a ma ru nọ khekherriọ, ne uwa gha mwẹ iyayi khian vbe uhunmwu ẹyotọ ne ọ de ziẹn kevbe ne gbain, ne uwa ghẹ gie a bẹghe uwa hin idaehọ ne uwa miẹn rhie ẹghẹ ne uwa na họn iyẹn ne ọ maa. Iyẹn ne ọ maa na ọre imẹ ne Pọl khian ọguọmwadia ẹre, iyẹn ne ọ maa na ne a kpe orhu ẹre ma emwa hia ni rre agbọn na nẹ.