Itan 3:3 - Edo Bible (E Baibol Ẹdo) Version 1996

³ Ghẹ rhie obọ hin agba ẹko ọmwa kevbe ekhọe esi rre, viọ iran kinnọ urhu, gbẹnnẹ iran ye ekhọe ruẹ.

Itan 3:3 ပူးပေါင်းရင်းမြစ်များ

II Samuẹl 15:20

Ọ ma he kpee. ne u sẹ edinran, vbe i a ghẹ ghi na vbe guẹ gha zozo lele mwẹ khian hẹ. Mẹ ma rẹn ehe ne I rrie. Viọ ivbi ẹvbo ruẹ, ne u werriegbe. Te Nọyaẹnmwa gha tohan uwa ne ọ mudia ke uwa.

Psalm 119:11

Mẹ rhie uhi ruẹ ye ekhọe mwẹ, ne I ghẹ miẹn ehe na rukhọ ghe ruẹ.

Psalm 25:10

A gia mu ẹtin yan, kevbe aho ẹmwẹ ọmwa, ọ re ọ ya su iran ni rhie iyi ẹre mwẹ, kevbe ni vbe ya uhi ẹre ru emwi.

Psalm 85:10

Ahoẹmwọmwa kevbe aguobọ egbe gha miegbe, ẹmwata kevbe ọfumwegbe gha mu egbe dede.

Ẹksọdọs 13:9

Iruemwi na ghi yevbe ama ne u vin ye obọ ra emwi ayere vbe uharo ruẹ ne ọ gha ye ruẹ rre ne u miẹn ehe na gha ta ẹmwẹ uhi e Nọyaẹnmwa rhunmwuda ẹtin nọkhua ọre Nọyaẹnmwa ya rhie ruẹ hin otọ Igipt rre.

Ẹksọdọs 34:6

E Nọyaẹnmwa kegha gberra vbe odaro ẹre, ọ keghi datie wẹẹ, “Mẹ ne Nọyaẹnmwa, ọrọre Osanobua ne ọ vuọn ne agiẹngiẹn ne a i sẹtin rherhe ya ohu mu, ne ọ mwẹ aho ẹmwẹ ne ẹ i beghe kevbe amuẹntinyan.

Itan 1:9

Emwi ne iran ma ruẹn re gha dọlọ uyinmwẹ ruẹn yi zẹ vbene ọza uhunmwu ra ọghe ẹyaẹn ne ọ mose, dọlọ egbe ne u mu yi.

Itan 14:22

Adeghẹ uwẹ winna ne emwi gha maa, emwa ọvbehe ghi gha mu ẹtin yan ruẹn, iran ghi vbe gha ya ọghọ ne uẹn; adeghẹ emwi dan wẹ mu aro yi, u ba odẹ ku.

Itan 16:6

Gha re ne ọ gie a mu ẹtin yan kevbe ne ọ guobọmwa, e Nọyaẹnmwa gha ya orukhọ ruẹ bọọ. Gha ya ọghọ ne Nọyaẹnmwa, emwi dan rhọkpa i ra vbe sunu vbe egbe ruẹ.

Itan 20:28

Ọba gha ye gha rre asẹ la inu ẹghẹ ne asẹ ọre ya gha re ne ẹ i ru ero, ọghe ẹmwata, kevbe ne ọ ya obọ okpa mu emwa hia.

Itan 6:21

Rhie ẹmwẹ iran mwẹ vbe ẹghẹ hia, kọ ẹe ye ekhọe ruẹ.

Itan 7:3

Rhie emwi ne I ma ruẹn re mwẹ vbe ẹghẹ hia, gbẹn ọẹn ye ekhọe ruẹ.

Jerimaia 17:1

E Nọyaẹnmwa keghi kha wẹẹ, “Ivbi e Juda, ukeke ematọn ọ re a ya gbẹnnẹ orukhọ uwa yotọ, emwi ne ọ mwẹ ukpe ọghe ẹdaimọn ọ re a ya gbẹnnẹ ọẹn ye uwa ẹkoko udu, a keghi kaa ẹre ye efẹn Ogiukpo uwa.

Hozia 4:1

E Nọyaẹnmwa mwẹ ẹzọ ne ọ gu emwa ni rre otọe na gui. Izrẹl, danmwehọ vbe ne ọ kha hẹ, “Uyinmwẹ esi ra aho ẹmwẹ ọmwa i zẹdẹ rre otọe nii, avbe emwa nii, ma vbe tie mwẹ Osanobua.

Malakai 2:6

Iran wa gha ma emwa emwi ne ọ kere ighe ẹire emwi ne ọ ma gba. Iran wa gha gun mwẹ rrọ vbe ọfumwegbe, ẹire wẹ te iran tobọ iran wa gha ru emwi ne ọ gbae ọkpa, sokpan iran keghi gha yi emwa nibun obọ ne iran rhie obọ hin emwi dan ne a ru rre.

Matiu 23:23

“U miẹn agbọn ne uwa ye, enimaemwa Uhi kevbe Farisi, ayunukpaegbe. Wa ghi zẹ a ghae ye ihe igbe ebe uwọnmwẹ ne giẹrẹ hia, vbe ne avbe akpọkọ, ihiehie kevbe ebe aranmwọkhọ ye, vberriọ, wa sẹ emwi kpataki ni rre uwu Uhi rae, zẹ vbe a i bu eku, itohan, kevbe ne a i na sẹ ni dekẹe rae.

II Kọrinti 3:3

Aro dae wẹ, Kristi tobọ ẹre ọre ọ gbẹn ebe na, ọ na rhie ẹre ne ima rhie rre. Ẹ i re ne a ye ẹmu gbẹnnẹ ye uhanhan okuta, sokpan ekhọe emwa ne agbọn ọre a ya Orhiọn Osanobua ne ọ rrọọ gbẹnnẹ ọẹn yi.

Ẹfisọs 5:9

Rhunmwuda, uwanmwẹ ọre ọ rhie otọ ne avbe emwi esi, vbene umamwẹ, emwi ne ọ gbae kevbe ẹmwata ye, ne a mọ ọmọ wọrhọwọrhọ.

Diuteronomi 6:8

Gbalọ ẹe ginna obọ, u ghi vbe dele ẹe ye uharo ruẹ ne u ya gha ye ẹre rre,

Hibru 10:16

“Ọna ọre ile ne I gha gu iran ta vbe iyeke a vbe ẹdẹrriọ, erriọ Nọyaẹnmwa khare: I gha rhie uhi mwẹ ye iran ekhọe, I ghi vbe gbẹn ọẹn ye iran orhiọn.”