Itan 27:22 - Edo Bible (E Baibol Ẹdo) Version 1996

²² Ọ gha khọn ruẹn, gbe ọzuọ ne ọ kẹ ekherhe ne ọ wu, u i sẹtin gbe ukọnmwẹ ọnrẹn hin ẹre ẹko rre.

Itan 27:22 ပူးပေါင်းရင်းမြစ်များ

I Ọba 13:33

E Jeroboam ne ọba Izrẹl ma zobọ vbe emwi dan ne ọ ru, sokpan ọ keghi ye gha ma avbe ohẹn vbe ẹgbẹe kẹkan ne iran gha ga vbe aka ne irẹn bọ ẹe. Ọ keghi ma ọmwaikọmwa ne ọ rhirhi a gha ho, ohẹn.

Ẹksọdọs 12:30

Vbe asọn nii ọba Igipt ke ẹe kevbe ekhaẹmwẹ ọnrẹn kevbe ivbi Igipt hia keghi gua kpao vbe asọn nii, eve keghi gba ehe hia vbe Igipt, rhunmwuda a ma miẹn owa ọkpa ne ọmọ okpia ma na wu.

Ẹksọdọs 14:5

Ugbẹn vbe a ghi khama ọba Igipt wẹ emwa nii lẹ kua, ke irẹn kevbe avbe ekhaẹmwẹ ọnrẹn keghi fi ekhọe werriẹ vbe ekpa iran, iran keghi kha wẹẹ, “Vbe ọna khun emwi ne ima ru na yi? Ma gie ivbi Izrẹl lẹ kua hin ehe ọviẹn ne iran ye ne ima rre!”

Ẹksọdọs 15:9

Eghian keghi kha wẹẹ, ‘I gha khu iran, I gha vbe mu iran; I gha ghae ẹfe iran, I gha miẹn iran emwi ne I ho hia; I gha yuo umozo mwẹ ladian, I gha ya ẹtin mwẹ viọ emwi hia ne iran mwẹ.’

Itan 14:24

Ẹfe ọ re a ya san avbe umẹwaẹn ẹse; sokpan, ukọnmwẹ iran ọ re a ya rẹn avbe akpa.

Itan 23:35

U ghi do kha wẹẹ, “Te iran fi mwẹ emwi, te emwa eso koko gbe mwẹ, I ma ghi ye rre. Vbọzẹ ne I ma na sẹtin rhiọrre yi? I ye ho ne I da ayọn.”

Itan 26:11

Ọzuọ ne ọ yin uyinmwẹ okpa yan egbe ukpogieva, te ọ yevbe ekita ne ọ vbe rri ekpa ne ọ kpae.

Aizaia 1:5

Vbọzẹ ne uwa na sọtẹ khian vberriọ yi? Te uwa ho ne a ye rri uwa oya sẹẹ ọna ra? Izrẹl, ghe vbe ẹtẹ gba uwa uhunmwu hia. Orhiọn kevbe ekhọe uwa khuọnmwi.

Jerimaia 13:23

Ọmwa nekhui gha sẹtin fi ikpakpa egbe ẹre werriẹ ra, ra ne ogioha khiẹn ekẹnnẹkẹnnẹ ne ọ rre egbe ẹre kua. Adeghẹ iran gha sẹtin, ẹghẹ nii ọ re uwa ne ọ ma rẹn vbe a ru emwi ọvbehe hẹ gberra orukhọ, gha na vbe sẹtin ruẹ vbene a ru emwi ne ọ kere hẹ.

Jerimaia 5:3

Vbe ẹmwata, emwi ne Nọyaẹnmwa gualọ ọrọre ayekhọe ga. Ọ fi uwa emwi sokpan wa ma zẹ yọ, ọ rẹnkhẹẹn uwa, sokpan, wa ma ye mwẹ ẹwaẹn wa keghi yin ehọ, wa ma vbe zobọ vbe orukhọ ne uwa ru.

I Samuẹl 19:21

Ugbẹn vbe Sọl ghi họn ẹmwẹ na, ọ keghi vbe gie otu ọvbehe gha khian, iran na kevbe suẹn gha ku, iran na gha vannọ, ọ keghi vbe gie emwa ukpogieha erriọ ọre ọ vbe sunu vbe egbe iran.