II Timoti 3:2 - Edo Bible (E Baibol Ẹdo) Version 1996

² Rhunmwuda, emwa ghi khian ni rẹn enegbe iran ọkpa, iran ghi gha zuan, kevbe orhuọ, a ghi gha ya obọ so udu, iran ghi gha filo unu, iran i ghi họn ẹmwẹ evbibiẹ iran, emwa ẹse oghodan, iran i ghi ga Osanobua.

II Timoti 3:2 ပူးပေါင်းရင်းမြစ်များ

Psalm 10:3

Ọmwa dan ya emwi dan ne ọ khọnrẹn ghagha. Ọmwa uzuanmwẹ kpa unu ghe Osanobua, ọ keghi vbe he ẹe ye otọ.

Psalm 49:6

Kevbe avbe emwa dan ni mu ẹtin yan ẹfe ne iran na vbe ya ẹfe iran ghagha.

Psalm 52:1

Okpọmwa, vbọzẹ ne u na ya emwi dan rhuọ yi? Aho ẹmwẹ ọmwa Osanobua; etẹbitẹ nọ.

Aizaia 10:15

Sokpan, e Nọyaẹnmwa khare wẹẹ, “Ughanmwa gha kha ighe rẹn ọ re ọ sẹ ọmwa ne ọ ya ẹe winna ra? Ọsara ọ re ọ vbe kpolo sẹẹ ọmwa ne ọ yae va erhan ra? Orhokhua i tọn ọmwa mu, ọmwa ọ re ọ tọn orhokhua mu.”

Daniẹl 11:36

Ọba e Siria ghi gha da gbe da mu, ọ ghi gha rhuọ we rẹn kpọlọ sẹẹ avbe ẹbọ, kevbe wẹ rẹn sẹ Osanobua ne ọ kpọlọ Sẹehia. Ọ gha sẹtin gha ru avbe emwi na ọ te do sẹ ẹghẹ ne Osanobua gha ya rria ẹre ikhi. Osanobua gha ru zẹ vbene ọ mwamwaẹn zẹẹ.

Daniẹl 7:25

Ọ gha ye ukpẹ sakan Osanobua ne ọ Sẹehia, ọ ghi gha khulo emwa Osanobua khian. Ọ gha ho ne ọ fi uhi ugamwẹ kevbe emwiukpo ne iran ru werriẹ. Emwa Osanobua ghi vbe gha rre ototọ ẹtin ẹnrẹn vbe ukpo eha vbe ukhiọnmwẹ.

Matiu 15:6

ohan i ghi gi ẹe dọlegbe ya ẹe mu ọghọ ye erha e ra iye ẹe egbe. Erriọ ọre uwa ya zẹ uhi Osanobua kọ, ne uwa miẹn ehe na mu ọghe uwa sẹ.

Iyẹn ne ọ Maan Ọghe Luk 12:15

Rẹn keghi tama iran hia wẹẹ, “Wa mwẹ ẹwaẹn ne uwa vbe gha ba egbe vbe egbe arovbẹmwẹ. Rhunmwuda, vbene ọmwa arhirhi yan fe sẹ, ẹ i re emwi ne ọ mwẹ ọrọre Orhiọn rẹn.”

Iyẹn ne ọ Maan Ọghe Luk 16:14

Avbe Farisi eso ni họn avbe ẹmwẹ na kegha vin ihue ye Jesu akhọe, rhunmwuda iran ho ẹmwẹ igho ẹsẹse.

Iyẹn ne ọ Maan Ọghe Luk 6:35

Ẹ i re rriọ! Gha ho ẹmwẹ eghian ruẹn, vbe gha ru iran ẹse, rhie ne emwa mọmọ, ghẹ ghi vbe rhie aro ye odẹ khẹ emwi rhọkpa. A gha san ruẹn ẹse nọkhua, u ghi vbe gha re ovbi Osanobua Ne Ọ Yo Sẹ, rhunmwuda te irẹn maa ne emwa ẹse oghodan kevbe emwa dan.

Iwinna 5:36

Vbe nẹdẹ eso, Tiudas ladian ọ wẹ a ma he miẹn egbe irẹn ẹdẹ, emwa ni sẹ uri eva keghi ye egbe ba ẹre. Sokpan, a ghi gbe ẹe rua nẹ, emwa ni te lele ẹe khian keghi zagha, otu ne ọ mu gbọọ keghi wiẹghẹ ua.

Ebe ne Pọl gbẹẹn gie emwa Rom 11:18

Rhunmwuda ọnii, wa ghẹ zan iran ne a giagia kua zẹ vbe abọ. De emwi ne uwa ya hio yi? Abọ ọre uwa khin kẹkan ẹ i re uwa ọre ọ da ẹzi erhan yi, inian ọre ọ da uwa yi.

II Kọrinti 5:15

Te ọ wu ne emwa, ne avbe emwa ni rre agbọn ghẹ ghi gha rre agbọn ne egbe iran ọvbehe, sokpan ne iran gha rrọọ ne irẹn nii ne ọ wu, ne a vbe huẹn kpaegbe vbe idin, rhunmwuda iran.

Filipai 2:21

Emwa nekpa hia, ẹmwẹ ne egbe iran ọre iran rhie aro daa, ẹ i zẹdẹ re ẹmwẹ iwinna Jesu Kristi.

Kọlose 3:5

Rhunmwuda ọnii, wa ghi gbe ẹe ua ighẹ orriarria emwi agbọn na ne ọ rre uwu uwa, avbe oghẹ, ohọhọ, ufifimwẹ, aro ne ọ viẹn ye emwi kevbe arovbẹmwẹ (rhunmwuda, te arovbẹmwẹ vbe ye vbe ẹbọ ne a gho.)

II Tẹsalonaika 2:4

Rẹn gha ghe odan ye emwi hia ne emwa ghi gho nẹ, kevbe emwi hia ne emwa ghi tie ẹre ne ọ huanrẹn. Rẹn ghi tọn egbe ẹre mu sẹ ehia fẹẹrẹ, uhin ọ ghi ya tota ye Ọgua Osa ọghe Osanobua, ọ ghi wẹ rẹn ọre ọ ghi re Osanobua!

I Timoti 1:20

Ne usun iran ye ighẹ Haimẹnọs kevbe Alẹkzanda, emwa ne I silo yan ẹtin e Setan obọ ne a miẹn ehe na ma iran emwi, ne iran ghẹ gha niẹn ukpẹ ghe Osanobua.

I Timoti 1:9

Sokpan, ọ kere ne a yerre wẹ, emwa ne a rhunmwuda ẹre yi uhi i re avbe emwata, sokpan avbe iran ni de iyi, kevbe izigan, iran ne ẹ i mu ohan Osanobua, kevbe emwa orukhọ, iran ne ẹ i zẹ ye ẹmwẹ ugamwẹ, ra emwi orhiọn, iran ni gbele erha kevbe iye iran uan, avbe izigha.

I Timoti 3:3

Ọ ma kei ne ọ gha re ọdayọn ra ne ọ fian ọkpannike, sokpan, ọ ghi gha re ọmẹhẹ kevbe ne ẹ i ho ẹmwẹ, ọ ma ke ne ọ gha ho ẹmwẹ igho.

I Timoti 6:10

Rhunmwuda aho ẹmwẹ igho ọre emwi dan ughughan ke zọ ladian. Ẹmwẹ ne a gha mwẹ ọnrẹn mu emwa eso sẹrriọ wẹ, te iran ghi fi iyeke gbe iyayi, iran keghi ya akhiẹ ni bun guọghọ ekhọe iran uan.

I Timoti 6:4

Uhiomwẹ ọre orhu ẹre aro, ọma rẹn emwi rhọkpa. Ẹmwẹ akuọkan ne a muan ye vbene a ta ẹe hẹ, ọre ọ rre ọre aro, ọna ọ si oya ọmwa da ọmwa rre kevbe ẹzọ, kevbe ihẹn ne a tie ne egbe, kevbe a i ghi gba ẹko egbe.

II Timoti 3:4

Iran ghi gha si uma isọtẹ, iran ghi gha zẹ esu, uhiomwẹ ghi zẹ iran udu ua. Iran ghi gha hoẹmwẹ egberọkhọmwẹ vbe ne iran i na hoẹmwẹ Osanobua.

Jems 2:8

Deghẹ wa mu uhi Arriọba nii sẹ, zẹ vbene ọ rre uwu ebe wẹ, “Hoẹmwẹ ogieva ruẹ zẹ vbe egbe ruẹ,” emwi esi wa ru.

Jems 4:16

Wanwanna nian, wa wa tọn egbe mu, wa keghi vbe rhuọ, egbe orhuọ vberriọ rhọkpa, ne ọ diae i rrọọ.

Jems 4:6

Sokpan, uhin ighẹ ẹsọhẹ ne Osanobua rhie ne ọmwa, ọre ọ wo vbe egbe sẹ. Rhunmwuda ebe khare wẹ, “Te Osanobua mu aro ne ọkhọ da iran ni tọn egbe mu, sokpan ọ ghi gha rhie ẹsọhẹ ne iran ni mu egbe rriotọ.”

I Pita 5:5

Erriọ vbe nọ zẹẹ, wa ne igbama, wa gha gbe uhunmwu ke otọ ne avbe eniwanrẹn. Wa hia fẹẹrẹ ghi rhie ukugba imuegberriotọ gba, ne uwa ya gha ru ne egbe rhunmwuda ebe khare wẹẹ, “Osanobua mu aro igbinna da e nọ tọn egbe mu, sokpan ọ ghi gha rhie ẹsọhẹ ne ne ọ mu egbe rri otọ.”

II Pita 2:10

Ibiba avbe emwa ni lele orriarria emwi ohọhọ egbe iran, iran na vbe yagha ẹtin Osanobua. Avbe emamwaemwi ohoghe na keghi re emwa itengbemu, ni vbe ze vbe udu. Iran i ya ọghọ ne emwi ni rrọ ni mwẹ uyi, ni rre odukhunmwu, sokpan, iran ghi gha ya ukpẹ sakan iran.

II Pita 2:12

Egbe ne ọ ma ọmwa emwi, ọre iran na lele ru emwi zẹ vbene iran wa ye ighẹ avbe aranmwẹ oha ne a biẹlẹ ne a miẹn gha mu gbele re. Iran ghi gha ya ukpẹ sakan emwi ne iran ma rẹn otọ ẹre. Te a ra fuẹn iran hia, zẹ vbe aranmwẹ oha.

II Pita 2:18

Iran ghi gha ya unu ta ẹmwẹ itengbemu akpa, iran ghi gha ya emwi orriarria egbe alama, khuẹn ifi munọ avbe emwa ni he da lẹfe hin uwu ẹbu emwa ni rre uwu abakuru rre.

II Pita 2:3

Vbe uwu uzuanmwẹ iran, avbe emamwaemwi ohoghe na ghi gha ya okha ne iran tobọ iran ya rre, miẹn uwa emwi. Ọ kpẹre ne Ne ọ bu ohiẹn iran ghi mu egbe ye otọ. Ne ọ ra fuẹn iran uan i vbe vbiẹ hiehiere.

Ebe ne Jud gbẹẹn 1:16

Ẹzọ uwu unu ọre iran na gui vbe ẹhi, iran ghi gha ba emwa ọvbehe ifi ẹzọ, emwi dan ni rre iran ekhọe ọre iran ru, iran ghi gha ya unu kpa egbe iran, iran ghi gha ya unu lalọ emwa ọvbehe egbe, ne obọ iran miẹn ehe na vba emwi ne iran ho.

Arhie Maan 13:1

Iyeke ọnii, I keghi ya bẹghe aranmwẹ oha ọkpa vbe ọ ke uwe okun ladian dee, ọ keghi mwẹ igho igbe kevbe uhunmwu ihinrọn. Ẹdẹ keghi rre ọkpọkpa vbe uwu avbe igho na, a keghi gbẹn eni uyinmwẹ dan ye ọre uhunmwu.

Arhie Maan 16:11

Iran keghi ya ẹbọ yan Osanobua ne ọ rre ẹrinmwi rhunmwuda ẹtẹ kevbe obaloọ iran, sokpan, iran ma ladian vbe odẹ dan ne iran ye.

Arhie Maan 16:21

Okuta isan avan ẹrẹkhẹrẹ ne ọkpọkpa vbọ gha sẹ omwa uwan iyisẹn, kegha ke iso werriẹ gbe emwa. Emwa keghi ye ihẹn yan Osanobua rhunmwuda egboghogbogho isan avan nii, rhunmwuda ugborrirri wa gha nọ ighẹ nene egboghogbogho.

Arhie Maan 16:9

Owowo ọhanabe ni kegha giẹn emwa uan, iran keghi ya ẹbọ yan eni Osanobua ọmwa ne ọ mwẹ asẹ vbe uhunmwu avbe egboghogbogho na hia, sokpan iran ma zobọ vbe orukhọ, ne iran rhie urhomwẹ ne ukpọlọmwẹ ọnrẹn.