II Tẹsalonaika 3:4 - Edo Bible (E Baibol Ẹdo) Version 1996

⁴ Nọyaẹnmwa ne ọ gie ima ya uwa ye ẹro, aro ima da ẹe ighẹ vbene ima ta ma uwa ọre uwa ru, kevbe wẹ erriọ uwa khian vbe gha ru ẹe khian.

II Tẹsalonaika 3:4 ပူးပေါင်းရင်းမြစ်များ

Matiu 28:20

Wa ma iran ẹre ne iran gha yin zẹ vbene I yi ẹre iyi ne uwa. Wa yerre wẹ I gha gu uwa gha rrọọ vbe ẹghẹ hia rhinrin ya sẹ ufomwẹ agbọn.”

Ebe ne Pọl gbẹẹn gie emwa Rom 15:14

Etẹn mwẹ, mẹ rẹnrẹn wẹ te emwi ni maa hia wa gba uwa obọ, kevbe wẹ wa rẹn emwi ẹsẹse, ighẹ wa gha sẹtin gha ma egbe uwa emwi.

Ebe ne Pọl gbẹẹn gie emwa Rom 15:18

I gha si agbada vbe unu guan kan ẹmwẹ emwi ọkpa kẹkan, ọnii ọrọre emwi ne Kristi ru, ne ọ na ya mwẹ viọ iran ne ẹ i re Ju do gha họn ẹmwẹ ne Osanobua, la ekpa ẹmwẹ ne a guan kevbe emwi na ru.

Ebe ne Pọl gbẹẹn gie emwa Rom 2:7

Emwa eso rrọọ ni winna iwinna esi khian, iran ghi gha gualọ uyi, kevbe ọghọ, kevbe ẹfe etẹbitẹ, Osanobua gha rhie ẹfe etẹbitẹ ne iran.

I Kọrinti 14:37

Deghẹ ọmwaikọmwa ro ighẹ odibo Osanobua rẹn khin ra ighẹ a ya emwi ẹmwẹ orhiọn we irẹn, we ne a gi ẹe rẹn wẹ emwi ne I gbẹnnẹ na, iyi ọghe Nọyaẹnmwa tobọ ẹre nọ.

I Kọrinti 7:19

Rhunmwuda, a rhuẹre ra a ma rhuẹ i mwẹ esa ne ọ khin, emwi ne a kha ọrọre ne a gha họn ẹmwẹ Osanobua.

II Kọrinti 2:3

Ọna ọre ọ si ẹe ne I na gbẹn ebe nii gie uwa. I ma ho ne I gha dee ne a miẹn wẹ ọmwa ne ọ gha ya ẹko mwẹ rhiẹnrhiẹn, ọre ọ ghi rhia mwẹ ekhọe rua. Rhunmwuda aro mwẹ dae wẹ ẹko gha rhiẹnrhiẹn mwẹ ọre ẹko na vbe rhiẹnrhiẹn uwa.

II Kọrinti 2:9

Rhunmwuda, ọnii ọ zẹe ne I na gbẹn ebe ni gie uwa, te I gha ho ne I rẹn vbene uwa ghi ziengbe emwi hia sẹ hẹẹ, kevbe wẹ, deghẹ wa mu egbe ne uwa ya gha rhie ibude mwẹ vbe ẹghẹ hia.

II Kọrinti 8:22

Rhunmwuda ọnii, ma gie ọtẹn mwa lele iran dee, ma danmwẹ ọẹn ghe nẹ inugba ne ọ khin, a keghi miẹn wẹ, ọ rre ọre ekhọe ne ọ ru iyobọ. Ugbẹn vbe a ghi wa miẹn nian wẹ ẹmwẹ uwa la ẹre aro sẹrriọ, te ọ ghi wa bọbọ ẹre egbe ne ọ ru iyobọ.

Galatia 5:10

Sokpan I wa ye mu ẹtin yan uwa. Ne ima na re ọkpa vbe uwu Nọyaẹnmwa, gie ekhọe mwẹ muẹn wẹ, wa i ra roro ẹe la odẹ ọvbehe, kevbe wẹ, ọmwa ne ọ do gha rueghe uwa orhiọn na, emwa ne ọ khọnrẹn wẹ ne ọ gha khin, ighẹ Osanobua gha ru ẹre emwi.

Filipai 1:6

Rhunmwuda ọnii, aro mwẹ wa da ọna wẹ, Osanobua nọ suẹn iwinna esi na vbe uwu uwa, gha ru ẹe gha khian rhinrin a te do ru ẹe fo, vbe Ẹdẹ Kristi Jesu.

Filipai 2:12

Rhunmwuda ọnii, ọse mwẹ ni ghan, vbene uwa wa gha họn ẹmwẹ mẹ ẹghẹ ne I na rre ehe ne uwa ye, ẹghẹ na ọre ọ na mobọ ke nian ne uwa gha họn ẹmwẹ mẹ vbe ne a ghi na miẹn na ighẹ I i ghi rre ehe ne uwa ye. Wa gha ya ohan kevbe uguọmwẹ winna khian, ne uwa miẹn ehe na ru ẹmwẹ imiẹnfan uwa fo,

I Tẹsalonaika 4:10

Erriọ zẹẹ ọre uwa vbe gha yin ghe etẹn hia ni rre Masidonia. Te ima ghi rinmwian uwa na etẹn, ne uwa ru ne ọ sẹ ọnii.

II Tẹsalonaika 3:12

Eni Nọyaẹnmwa Jesu Kristi ọre ima ya yi iyi ne iran an, a keghi vbe ya obọ sa ekhae ne iran wẹ, ne iran gha ru emwi uhẹn, kevbe ne iran gha winna khuan ekhuan unu iran.

II Tẹsalonaika 3:6

Ma ya eni Nọyaẹnmwa Jesu Kristi yi iyi ma uwa etẹn mwa, wa gha bi egbe ne avbe etẹn ni lo ẹdẹ iran hia ye oroho ne a si, iran ne ẹ i ya ẹmwẹ ne ima tama iran ru emwi.

Failimọn 1:21

Aro mwẹ dae vbene I wa gbẹn ebe na wẹ, u gha ru vbene I khare, vbe ẹmwata, I rẹnrẹn ighẹ u gha ru gberra vbene I khare.