II Samuẹl 8:4 - Edo Bible (E Baibol Ẹdo) Version 1996

⁴ E Devid keghi khọn munọ arhin iyisẹn yan arria erẹnrẹn (1,700) vbe uwu iran ni hin ẹsin ẹnrẹn kevbe arriaisẹn ugie (20,000) vbe ivbiyokuo nii ya owẹ khian, ọ keghi vbe ya ẹsin nii si ikẹkẹ okuo ẹre khian uke, ọ na viọ ẹsin nii gha sẹtin si ikẹkẹ okuo iyisẹn (100) ye otọ vbọ.

II Samuẹl 8:4 ပူးပေါင်းရင်းမြစ်များ

Gẹnẹsis 49:6

Mẹ i ra mwẹ obọ vbe uma ẹkhokho iran mẹ i ra yo iko ne iran ko rhunmwuda, iran gbele emwa vbe ohu mu iran, iran keghi kun avbe ẹkhuia ẹmila use ya gha gbogiẹ.

I Ọba 10:26

E Solomọn kegha mwẹ ivbi iyokuo ne ikẹkẹ okuo arria ihinrọn (1,400) ye, kevbe ẹsin arriaisẹn iweva (12,000), a keghi viọ eso vbọ ye ẹvbo ẹre, ọvbehe vbe ikẹkẹ okuo nii, ni dekẹe kegha re ne irẹn wa tobọ ẹre kha yan vbe Jerusalẹm.

I Krọnikol 18:4

E Devid keghi khọn mu arriaisẹn (1,000) vbe avbe ikẹkẹ okuo ẹre deba iran ni hin ẹsin arriaisẹn ihinrọn (7,000) kevbe ivbiyokuo ni ye owẹ khian arriaisẹn ugie (20,000). Ọ keghi viọ ẹsin ni gha sẹtin si ikẹkẹ okuo iyisẹn (100) ye otọ, ọ na kun ni ghi dekẹe hia use.

Psalm 20:7

Arhin eso mu ẹtin yan ikẹkẹ okuo iran, eso vbe mu ẹtin yan ẹsin iran. Sokpan ma mu ẹtin yan ẹtin e Nọyaẹnmwa ne Osanobua ima.

Diuteronomi 17:16

Ọ ma kei ne ọba gha mwẹ ẹsin ni bun, ne ọ gha re ọghe ivbiyokuo ẹre, ọ ghẹ vbe gie emwa gha rrie Igipt ya dẹlẹ ẹsin rre, rhunmwuda, e Nọyaẹnmwa ta ẹe wẹ emwa irẹn i ra dọlegbe gha rrie odọ.

Jọsua 11:6

E Nọyaẹnmwa keghi tama e Jọsua wẹẹ, “Ghẹ gie ohan iran mu uẹn, vbe ọ te sẹ ẹghẹ na akhuẹ, I gha gbele iran hia fo ne ivbi Izrẹl. Wa ghi kun avbe ẹsin iran use, wa ghi giẹn ikẹkẹ okuo iran an.”

Jọsua 11:9

E Jọsua keghi ru iran vbe ne Nọyaẹnmwa khare: ọ keghi kun ẹsin iran use, ọ na giẹn ikẹkẹ okuo iran an.