II Samuẹl 24:13 - Edo Bible (E Baibol Ẹdo) Version 1996

¹³ e Gad keghi bu ẹre gha khian, ọ na ya tama rẹn vbene Nọyaẹnmwa kha hẹẹ, ọ keghi nọ rẹn wẹẹ, “De ne u ho vbọ? Ne ukhunmwu fi la ikpiia vbe otọe ruẹ? Ne avbe eghian ruẹn gha khuẹ khian la uki eha? Ra ne egboghogbogho ya ikpẹdẹ eha lomi vbe otọe ruẹ? Banbanna nian, rorẹe ne u rhie ewanniẹn mẹ rhie gie Nọyaẹnmwa.”

II Samuẹl 24:13 ပူးပေါင်းရင်းမြစ်များ

II Samuẹl 21:1

Ukhunmwu nọkhua ọkpa keghi do fi vbe ẹghẹ ne Devid na gha rre ẹkete, ikpiia gbalaka ọ re ọ wa ya vbe otọ. Ẹre Devid na nọ otọ ẹre vbe obọ e Nọyaẹnmwa, e Nọyaẹnmwa keghi kha wẹẹ, “E Sọl kevbe ẹgbẹe ọre diyi izigha, ọ gbele ivbi e Gibiọn rua.”

II Ọba 8:1

Elaisia keghi tama okhuo nii ne ọ rre Siunẹm, ne irẹn huẹn ovbi ẹre kpaegbe vbe ẹrinmwi wẹ e Nọyaẹnmwa ra ru ẹe ne ohanmwẹ fi la ukpo ihinrọn, kevbe wẹ ne ọ kpao ya di ẹvbo ọvbehe ya la ukpo ihinrọn ke ẹe kevbe ẹgbẹe ẹre.

I Krọnikol 21:12

Ne ukhunmwu fi la ikpiia ra ne u ya uki eha lẹ ne ivbiyokuo eghian ni khuẹ khian ra ikpẹdẹ eha vbe wu ne Nọyaẹnmwa gha na ya umozo ẹre yan ruẹn, ọ ghi fi egboghogbogho fi ẹvbo ruẹ, ọ ghi gie odibo ẹre ne ọ rhie uwu gha die otọ Izrẹl hia? De ewanniẹn ne I gha rhie ne Nọyaẹnmwa?”

Psalm 91:6

Ra egboghogbogho ne ọ fi emwi vbe ebiebi ra emwi dan ne ọ gbe ọmwa vbe ogiavan.

Ẹksọdọs 7:25

Ikpẹdẹ ihinrọn ọre ọ yae vbe Nọyaẹnmwa ghi fi ẹzẹ emwi nẹ.

Ezikiẹl 14:13

“Ovbi ọmwa, uhunmwu ẹvbo okpa gha rukhọ ighẹ ọ ma mudia ẹse ghe mwẹ, I gha nien obọ ladian, I ghi guọghọ ehe ne ọ la miẹn evbare kua. I gha gie ukhunmwu, I ghi gbele emwa nagbọn kevbe avbe aranmwẹ ba ẹre.

Levitikọs 26:20

Ẹsọn ne uwa gha miẹn hia, ọma ọkpa i ra kọe ladian, rhunmwuda, otọ ruẹ i ra ma emwiokọ, erhan ruẹn i ra vbe mọ.

Levitikọs 26:25

I ghi si okuo yi uwa egbe ne I ya rri uwa oya ye ne uwa na rhie obọ gberra ile ne ima gba ta, wa na ya si egbe koko ye ẹvbo uwa ne obọ ghẹ vba uwa, I ghi gie emianmwẹ nẹ i mwẹ ukhunmwu gie uwa, ẹ i re aro sẹẹnrẹn wa gha ya de ye igue vbe odaro avbe eghian uwa.

Iyẹn ne ọ Maan Ọghe Luk 4:25

Wa danmwehọ mwẹ, wa rẹnrẹn wẹ avbe ẹgbẹ wa bu vbe Izrẹl vbe ẹghẹ Elaija, ẹkpo ne amẹ ma na rhọ vbe ukpo eha vbe ukhiọnmwẹ, ne ukhunmwu nọkhua na vbe gha fi vbe otọe nii hia.

Diuteronomi 28:22

E Nọyaẹnmwa ghi tue emianmwẹ ne ọ ke egbe ẹmwẹ ọkpa la egbe ọmwa ọvbehe ku uwa kevbe egbe ne ọ hinmwian kevbe ọnii, ọ gha ru ẹe ne amẹ ghẹ rhọ ọ ka uwa hia ghi so hie kevbe irhunrhun, ne ọ ya ẹe fuẹn emwiokọ uwa hia a. Ọfuan na ghi gu uwa gha rrọọ wa te ya wulo.

Diuteronomi 28:25

E Nọyaẹnmwa ghi gie eghian uwa gha khọn miẹn uwa otọ. Wa gha la odẹ ọkpa mu igbinna gie iran, sokpan wa ghi la odẹ ihinrọn lẹ hin ehe ne iran ye rre. Afianma ghi gha fian emwa ni rre agbọn hia vbe iran a miẹn emwi ne ọ sunu vbe egbe uwa.

Diuteronomi 28:27

E Nọyaẹnmwa gha tue uruvba ku uwa, zẹ vbene ọ ru ivbi Igipt. Ọ ghi gie ẹtẹ gha salọ ladian vbe egbe uwa. Egbe uwa hia ghi gha bolo ikpakpa. Otọlọ ghi la uwa egbe sokpan a i ra miẹn ukhunmwu ẹnrẹn.

Diuteronomi 28:35

E Nọyaẹnmwa ghi gie ẹtẹ obalọ ne ẹ i mwẹ ukhunmwu gba owẹ uwa hia, uruvba gha gba uwa egbe kevbe uhunmwu ya sẹ atataowẹ.

Diuteronomi 28:52

Iran gha mu igbinna la ẹvbo hia ni rre otọe nii ne Nọyaẹnmwa Osanobua rua ra mu ne uwa, avbe ekẹn ne a gbe ni yo ne a ya ru ọkhẹ ne uwa mu ẹtin yan gha de rẹnkhẹn uan.

I Samuẹl 25:17

Ya roro ẹmwẹ na ne u rẹn vbene u gha ru ẹe hẹ. Emwi nọkhua sẹtin la ekpa ọna rre do degbe arowa ima kevbe ẹgbẹe ọre. Ọ rhia sẹrriọ wẹ ẹ i danmwehọ ọmwa rhọkpa!”