II Samuẹl 24:1 - Edo Bible (E Baibol Ẹdo) Version 1996

¹ Vbe ẹghẹ ọkpa ohu Izrẹl kegha mu e Nọyaẹnmwa, ọ na sua e Devid ne ọ mu ọlọghọmwa gie iran. E Nọyaẹnmwa na tama rẹn wẹẹ, “Ya ka emwa Izrẹl kevbe Juda.”

II Samuẹl 24:1 ပူးပေါင်းရင်းမြစ်များ

Gẹnẹsis 45:5

Banbanna nian, wa ghẹ gie iro han uwa ra ne uwa gha gu egbe uwa gui rhunmwuda ighẹ wa khiẹn mwẹ gha die edinran. Osanobua ọ re ọ gie mwẹ ke aro ne uwa ne I sẹtin sinmwi emwa ye agbọn.

Gẹnẹsis 50:20

Te uwa te si uma ne uwa ru mwẹ emwi dan, sokpan Osanobua keghi fiẹe werriẹ yae khian emwi esi, ne ọ miẹn ehe na sinmwi emwa nibun ye agbọn, emwa na miẹn wẹ, ọnii ọ zẹe ne iran na rre agbọn ẹre na.

II Samuẹl 12:11

I vbe yan ma ruẹn nian wẹ I gha ru ẹe ne ovbi uwowa ruẹ gha si ọlọghọmwa ye uẹ egbe. U gha ye aro miẹn uẹn vbe I gha viọ avbe amwẹ ọẹn ne okpia ọvbehe, ọ ghi gha gu iran ru emwi ọdọ vbe amwẹ vbe ogiavan ogioghogho.

II Samuẹl 16:10

Ọba keghi khama Abisiai kevbe Joab ne ọtiọnrẹn wẹẹ, “Ọ ma zẹdẹ kan uwa, adeghẹ ọ rhovbiẹ mwẹ rhunmwuda wẹ e Nọyaẹnmwa ọ re ọ wẹ ne ọ rhovbiẹ mwẹ, gha ọ ghi ra rri ọre unu ẹnrẹn?”

II Ọba 3:6

Vbe ọwarọkpa nii, e Joram ne ọba keghi kpao vbe Sameria, ọ na ya si ivbi iyokuo ẹre si koko.

I Krọnikol 21:1

Esu keghi ho ne ọ si ẹti ye ivbi Izrẹl urhu, ọ na rhunmwuda ọnii ya Devid kha wẹ rẹn ra ka ẹvbo.

I Krọnikol 7:2

E Tola kegha mwẹ emọ ikpia ehan, ena kegha re Uzi, e Refaia, e Jeriẹl, e Jamai, Ibsam kevbe Siemuẹl. Iran na kegha re ọdiọnwere ọghe ẹgbẹe ni rre ẹwae Tola, iran kevbe gha re ivbiyokuo ni hin usi vbe ẹghẹ e Devid, ivbi uniẹn iran kegha re uri eha yan arriaisẹn eva yan ugie (22,600).

I Krọnikol 7:40

Ivbi uniẹn Asia ọ re iran na hia khin, iran kevbe gha re ọkaẹgbẹe ọghe ẹgbẹe iran, emwa ni gbinna ni hin usi kevbe olotu ne ya ghe. A kevbe miẹn arhin arriaisẹn enẹirrọvbọgban (26,000) ni sẹtin yo okuo vbe ivbi uniẹn Asia.

II Krọnikol 32:25

Sokpan, e Hẹzekaia keghi hio sẹrriọ wẹ ọ ma sẹtin kpọnmwẹ ye ẹse ne Nọyaẹnmwa ru ne ẹẹn, e Juda kevbe Jerusalẹm keghi rrioya ye emwi na ẹsẹse.

Ẹksọdọs 7:3

Sokpan, I gha ru ẹe ne ọba ze vbe udu, uhin vbe I gha ye winna iwinna ọyunnuan kevbe ọghe ama nibun nẹ vbe Igipt.

Ezikiẹl 14:9

“A deghẹ akhasẹ ghi vbe khian ne a rẹrẹe, ọ na ya gha rhie ewanniẹn ohoghe ne emwa, emwi ne ọ si ẹe ọrọre wẹẹ, Mẹ ne Nọyaẹnmwa ọ re ọ rẹrẹ ọe. I gha yuo ẹre hin uwu ẹbu ivbi Izrẹl rre.

Ezikiẹl 20:25

Vbe iyekọnii, I keghi do rhie uhi ne ẹ i ma ne iran, kevbe iyi ne ẹ i rhie arrọọ gie ọmwa.

Levitikọs 10:6

Ọre Mosis na tama Errọn kevbe avbe ivbi ẹre ighẹ Eliaza kevbe Itama wẹẹ, “Wa ghẹ sẹ eto uwa rae vbe ne a ma na salọ ẹe ra ne uwa yanghan ẹwu uwa ya rhie maa ighẹ te uwa rre akhiẹ. Wa gha ru vberriọ, wa gha wulo, e Nọyaẹnmwa gha vbe mu ohu emwa na hia sokpan, avbe etuẹn, kevbe avbe emwa Izrẹl hia, a fan obọ ẹre ne iran ne iran khiẹ uwu na ne ọ la ekpa erhẹn ne ọ ke obọ Nọyaẹnmwa rre.

Nọmbas 1:19

Zẹ vbene Nọyaẹnmwa khare. A ghi sẹ Ato Sainai, e Mosis keghi gbẹnnẹ eni emwa nii hia ye ebe.

Iwinna 4:28

Iran si egbe koko, ne iran ru avbe emwi ni ne uwẹ ya ẹtin ruẹn kevbe iho ọwuẹ ta ye otọ nẹ wẹẹ, ọ gha sunu.

II Tẹsalonaika 2:11

Rhunmwuda ọna, Osanobua keghi gie ẹtin idodẹ, ne ọ ya gha winna vbe uwu iran, iran na ghi gha ya emwi ohoghe yi.

Giọgis 2:14

Ohu Izrẹl keghi kakabọ mu e Nọyaẹnmwa, ọ na gie avbe ikpata gha mu bu iran yo ne iran vbe gha rha iran. Ọ keghi gie obọ avbe eghian ni lẹga iran gba iran. Ivbi Izrẹl ma ghi sẹtin da egbe iran yi hin obọ ẹbe.

Giọgis 2:20

Ohu Izrẹl keghi kakabọ mu e Nọyaẹnmwa, ọ na kha wẹẹ, “Avbe emwana rra uhi ne I rhie ne avbe erha iran odede ne iran ya gha ru emwi.

I Samuẹl 26:19

U ghi danmwehọ mwẹ, Umogun. A deghẹ e Nọyaẹnmwa ọ re ọ werriẹ ruẹ aro da mwẹ, a gha zọ ese imuohan gie ẹe, ọ gha fi ekhọe werriẹ, sokpan, a deghẹ emwa ne agbọn ọ re ọ ru ẹe, e Nọyaẹnmwa ọ re ọ gha fi iran unu. Rhunmwuda, iran khu mwẹ hin otọe e Nọyaẹnmwa rre. Iran wẹ ne I ya gha ga ẹbọ ẹrrẹe, kevbe ne I vbe gbe ihoi vbe otọe ne Nọyaẹnmwa mu ne emwa rẹn.