II Samuẹl 16:22 - Edo Bible (E Baibol Ẹdo) Version 1996

²² Ẹre iran na ya ukpọn kuẹ iwowo ye odukhunmwu egedege ẹguae. Absalọm keghi wa la uwu ẹre ya gha gu avbe egbakhian erhae ru emwi ọdọ vbe amwẹ vbe sirra emwa hia.

II Samuẹl 16:22 ပူးပေါင်းရင်းမြစ်များ

Gẹnẹsis 35:22

Ẹghẹ ne Jekọb na gha rre ẹvbo nii, e Riubẹn keghi gu e Bilha ne ọkpa vbe uwu egbakhian erhae ru emwi, e Jekọb ghi họn, ohu ke muẹn ẹsẹsẹmwẹse, emọ iweva ọre Jekọb biẹlẹe.

II Samuẹl 11:2

Ẹdẹ ọkpa, vbe ẹdẹ ghi ye egbe rrie odẹ ẹdogbota nẹ, e Devid keghi kpaegbe vbe ovbe avan ne ọ vbiẹre, ọ keghi hin egedege ẹguae. Ọ kegha hẹko khian lẹga vbe odukhunmwu nii, evba ọ re ọ na ya bẹghe okhuo ne ọ khuẹ. Okhuo na keghi wa mose ẹsẹse.

II Samuẹl 15:16

Ẹre ọba na kpao, ke ẹe kevbe ẹgbẹe ọre hia kevbe avbe ekhaẹmwẹ ọnrẹn, sokpan ama wẹ egbakhian igbe ne ọ sẹ rae ne iran gha gbe aro ghe owa.

II Samuẹl 20:3

Ẹre Devid na la ẹguae ẹre vbe Jerusalẹm, ọ keghi viọ avbe egbakhian igbe ne ọ sẹrae ne ọ gha gbe aro ghe ẹguae, ọ na viọ ye igbedia. Ọ kegha koko iran, sokpan, ọ ma gu iran ru emwi ọdọ vbe amwẹ. Ọ keghi wa mu iran ye igbedia vbe ẹdẹ agbọn iran, zẹ vbe ikhuo ni dẹgbẹ.

Aizaia 3:9

Ẹmwẹ ne iran rhie ye ekhọe ọ re a ra ya gu iran gui. Te iran ghi wa rhan ma orukhọ zẹ vbene emwa Sọdom ghaa ye. Ọghe iran fo ne, obọ iran ọ re iran ya sii ẹe gie egbe iran.

Jerimaia 3:3

Ọnii ọ re ọ sii ẹe ne a na wẹ ne amẹ ghẹ rhọ, ne amẹ ahọ orhọ ma na ghi rhọ. Te uwe wa yevbe ebabotu, ekhue i vbe mu ẹẹn.

Jerimaia 8:12

Wa ne emwa mwẹ, ekhue mu uwa yọ ra vbe uwa ru ẹkẹkhẹrhẹ na? Hiehiere! Ekhue ma zẹdẹ mu uwa. Wa ma kue rẹn vbene emwi gbe ọmwa egbe hẹ. Rhunmwuda ọnii, wa gha dele zẹ vbene emwa nekpa vbe dele. I gha rri uwa oya, ọnii ọ re ọ khian gha re ufomwẹ uwa. Mẹ ne Nọyaẹnmwa taa ẹe nẹ.

Ezikiẹl 24:7

Iran de izigha vbe adesẹ ore ẹvbo, sokpan, iran ma gbe esagiẹn ọnrẹn ye ehe ne ebubẹ gha na degue ẹre, iran keghi wa gbe ẹe yan okuta ne ọ kpe yotọ.

Nọmbas 25:6

Ehe ne iran na mudia vbe onurho Owa Ukpọn Ile gha khiẹ nii, ọkpa vbe uwu ivbi Izrẹl keghi sirra e Mosis kevbe avbe emwa nii hia rhie okhuo Midian ọkpa la uwu owa ukpọn rẹn.

Filipai 3:19

Ẹrinmwi erhẹn ọre iran ra na mu omẹ, orriarria egbe iran ọrọre ẹbọ ne iran gho, emwi ne ọ kere ne ekhue ẹre gha mu iran ọre iran ya ghagha, ẹmwẹ emwi agbọn na ọkpa ọre iran mu roro.