II Pita 1:12 - Edo Bible (E Baibol Ẹdo) Version 1996

¹² Ọna ọre ọ si ẹe ne I gha na gha ye uwa avbe ẹmwẹ na rre ẹghẹ hia, a gha rhe miẹn ighẹ wa ka rẹn ọnrẹn nẹ, kevbe wẹ, a wa ziẹn ẹnrẹn ye uwu ẹmwata ne uwa rhan obọ miẹn nẹ.

II Pita 1:12 ပူးပေါင်းရင်းမြစ်များ

Iwinna 16:5

Avbe esọsi keghi gha ye ọna wegbe sẹ ayọ vbe iyayi, iran na gha muan yọ ẹdẹgbegbe.

Filipai 3:1

Vbe ufomwẹ ehia, etẹn mwẹ, te Nọyaẹnmwa gha ye ọyẹnmwẹ nọ gbae sẹ uwa. Ẹ i ru mwẹ ẹsọn a deghẹ I vbe dọlegbe ta ẹmwẹ ne I ka ta yi, te a dọlegbe ya eẹ rhie uwa uhunmwu hin ẹbe rre.

Kọlose 1:5

Ẹghẹ ne ikporhu ẹmwata nii, ighẹ Iyẹn Ne ọ maa na ka sẹ ehe ne uwa ye, wa keghi họn vbene ọ rhie idaehọ ne ọmwa hẹ. Rhunmwuda ọnii, iyayi kevbe aho ẹmwẹ ọmwa keghi re ne ọ hẹnhẹn egbe yan emwi ne uwa danmwehọ ẹre, emwi ne a dọlọ yi ye otọ khẹ uwa vbe ẹrinmwi.

Kọlose 2:7

Wa gie inian uwa dinmwi ye uwu irẹn, wa hẹnhẹn ẹdẹ agbọn uwa yan irẹn, ne uwa gha wegbe yọ vbe uwu iyayi uwa, zẹ vbene a ma uwa ẹre. Wa gie ẹko uwa vuọn ne ekpọnmwẹ.

I Timoti 4:6

U ghi ma avbe etẹn emwi na, u ghi gha re ọguọmwadia ne ọ maa ọghe Kristi Jesu, vbene u na ya ẹmwẹ iyayi na, kevbe iruẹmwi ẹmwata ne uka lele khian, koko egbe uẹ, vbe ekpa ọghe orhiọn.

II Timoti 1:6

Rhunmwuda ọnọna, ọre I na ye ruẹ rre ne u yobọ da ẹe yi gbain ighe ọhẹ ne Osanobua ya wuẹ vbe ẹghẹ ne I na viọ obọ yan ruẹn uhunmwu.

Hibru 10:32

Wa roro vbe ne ọ gha ye uwa hẹ, ẹghẹ ne ọ gberra. Ẹkpo nii, vbe uwanmwẹ Osanobua ghi wan mu uwa nẹ, wa rri oya emwi ni bun, sevba ọlọghọmwa nii ma gbele uwa kua.

Hibru 13:9

Wa ghẹ gie iruẹmwi ughughan ne a ma he ka rẹn, bi uwa hin urodẹ ẹmwata rre. Ọ kere ne a ya ẹsọhẹ Osanobua ye orhiọn ima khian ni wo vbe egbe, i ghẹ ẹ i re a ru emwi ne uhi kha re vbe ekpa evbare, iran ni ka ru vbene avbe uhi nii khare yi, ma miẹn emwi ọkpa ne iran miẹn vbọ.

I Pita 5:10

Sokpan, u ghẹ ghi rri oya la ẹghẹ eso vberriọ nẹ, Osanobua ẹsọhẹ hia, ọmwa ne ọ tie ruẹ ne u do ghae vbe uyi etẹbitẹ ọghọe, vbe uwu a yegbe ba Kristi, gha tobọ ẹre ya uwẹ khian ne ọ gbae, ọ ghi rhie a mudia gbain nuẹn, ẹtin kevbe ẹyotọ ne ọ de ziẹn.

I Pita 5:12

Sailas, ọmwa ne ima ka ye ọtẹn ne ẹ i hiẹ ọmwa, ọre ọ gun mwẹ gbẹn ehe ne kherhe na gie uwa, I ho ne I rhie igiẹdu ne uwa, ne I vbe ya unu mwẹ ta ẹe ma uwa zẹ vbe ẹmwẹ obọ mwẹ wẹ, ẹsọhẹ ọghe Osanobua, ọre ọ na khin. Wa mudia yọ gbain.

II Pita 1:13

Mẹ yayi wẹ emwi ne ọ kei mẹ nọ ne I gha gua avbe emwi na kpao vbe uwu ayere uwa, omwa vbe ne a na miẹn ighẹ mẹ he ye rre agbọn.

II Pita 1:15

I gha lo ẹtin mwẹ hia khekherriọ, ne I ya zẹ urodẹ vbene uwa gha ya ye avbe ẹmwẹ na rre hẹ ẹghẹ hia vbe i a wu nẹ, ye uwa otọ.

II Pita 3:1

Wa ne avbe ọse mwẹ ni ghaan, ebe ne ọ huẹre ne ogieva ne I he gbẹn gie uwa ọre ọ na khin. Vbe ebe eva na, I keghi hia ne i gua uwa ekhọe kpao vbe ọghe iro ne ọ huanrẹn ne a roro, vbe ekpa ne a na ye uwa avbe emwi na rre.

II Pita 3:17

Sokpan wa ne ọse mwẹ rẹn ena nẹ, rhunmwuda ọnii khekherriọ, wa khẹ yegbe, ne ibibiodẹ emwa ne ẹ i lele uhi ru emwi ghẹ ya de uwa odẹ, ne uwa ghẹ ya dele hin ihe uwa ni de ziẹn nẹ rre.

I Jọn 2:21

Rhunmwuda ọnii, ẹ i re rhunmwuda ighẹ wa ma rẹn nene ẹmwata ọre ọ ya mwẹ gbẹn ebe gie uwa, sokpan rhunmwuda ighẹ wa rẹn ọnrẹn nọ, wa keghi vbe rẹn wẹ ohoghe i sẹtin ke uwu ẹmwata ladian ẹdẹ.

II Jọn 1:2

Rhunmwuda wẹ, ẹmwata rre uwu ima nẹ, ọ gha vbe gu ima gha rrọọ rhinrin ẹdẹ.

Ebe ne Jud gbẹẹn 1:17

Sokpan, wa ne ọse mwẹ, wa ghi ye rre o. Wa ye avbe emwi ne avbe ukọ Nọyaẹnmwa Jesu Kristi tama uwa ẹghẹ ne ọ gberra.

Ebe ne Jud gbẹẹn 1:3

Wa ne ọse mwẹ ni ghan, ẹghẹ ne I na wa gha hia ne I gbẹn ebe gie uwa, vbe ekpa imiẹnfan ne ọre ọghe ima hia, ọre ọ na wa do la mwẹ ekhọe ne I gbẹn ebe gie ua, ne I ya rhie igiẹdu ne uwa, ne uwa gha gbinna nẹẹn khian ighẹ iyayi ni ne Osanobua rhie ne emwa rẹn hia uhukpa nii.

Ebe ne Jud gbẹẹn 1:5

A gha rhe miẹn wẹ wa ka rẹn emwi na nẹ, I ho ne I ye ye uwa ẹre rre, vbene a miẹn wẹ Nọyaẹnmwa miẹn ivbi Izrẹl fan hin otọ Igipt rre hẹ, sokpan vbe okiekie, ọ keghi gbele iran ni ma yayi ni rrọọ ua.