II Krọnikol 7:5 - Edo Bible (E Baibol Ẹdo) Version 1996

⁵ Ọ keghi ya ẹmila arriaisẹn eva yan ugie (22,000) zọ ese, kevbe ohuan arriaisẹn iyehan (120,000), erriọ ọ re rẹn kevbe emwa nii na do ya Ọgua Osa nii fi ohan.

II Krọnikol 7:5 ပူးပေါင်းရင်းမြစ်များ

I Krọnikol 29:21

Vbe ẹdẹ ne ọ lele ẹe, iran keghi gbele aranmwẹ kevbe emwi izọese, iran keghi ya ehia fi ohan ne Nọyaẹnmwa, iran na viọ ne emwa ne iran rri ọe. Iran kevbe gbele ẹkhuia ẹmila arriaisẹn ya zọ ese, kevbe ogho arriaisẹn kevbe oteghe ohuan arriaisẹn, ne iran wa giẹn ọnrẹn ohoho vbe uhunmwu Ogiukpo. Iran keghi vbe viọ ayọn rre do ya mu ohan.

II Krọnikol 1:6

Ọba keghi ga e Nọyaẹnmwa vbe ne ọ na gbele emwi izọese vbe uhunmwu aka oze nii, ọ keghi gbele ifi emwi arriaisẹn ọ na vbe giẹn eso ikun ẹnrẹn hia vbe uhunmwu nene aka.

II Krọnikol 15:11

Vbe ẹdẹ ne ẹdẹrriọ, iran keghi viọ vbe emwi ne iran fu hẹ gha dee do ya zọ ese ghe Nọyaẹnmwa, ena kegha re ẹmila iyisẹn ihinrọn (700) kevbe ohuan arriaisẹn ihinrọn (7,000).

II Krọnikol 2:4

I wa bọ Ọgua Osa nian ne I ya ya ọghọ ne Nọyaẹnmwa ne Osanobua mwẹ. Ehe ne ọ huanrẹn khian gha nọ, ehe ne avbe emwa mwẹ kevbe imẹ, gha na gha ga ẹe, vbene ima gha na gha giẹn eturari nọwinhin ghe ẹre, ehe ne ima gha na gha ye ebrẹd ne ọ huanrẹn yo imuohan giee vbe ne a i na dobọyi, ehe ne ima gha na gha zọ ese ne a giẹn uan ghe ẹre vbe owiẹ kevbe ota kevbe Ẹdẹ Ikẹtin hia fẹẹrẹ, emwiukpo Uki Ọgbọn, kevbe avbe ẹdẹ ni huanrẹn ne a ya gha ya ọghọ ne Nọyaẹnmwa ne Osanobua mwa. Rẹn ọ re ọ tama ivbi Izrẹl ne iran gha ru ọna khian ẹdẹdẹmwẹdẹ.

II Krọnikol 30:24

E Hẹzekaia ne ọba keghi viọ ẹkhuia ẹmila arriaisẹn (1,000) kevbe ohuan arriaisẹn ihinrọn (7,000) ladian ne emwa ni gbele ne iran gha re; avbe ekhaẹmwẹ kevbe viọ ẹkhuia ẹmila arriaisẹn ọvbehe (1,000) kevbe ohuan arriaisẹn igbe (10,000) ne emwa nii. Avbe ohẹn ni bun keghi yo ulamwẹ akpehuan.

II Krọnikol 5:6

E Solomọn ne ọba kevbe ivbi Izrẹl hia keghi si egbe koko vbe odaro Ẹkpẹti Ile, iran na ya ohuan kevbe ẹmila ni bun zẹ ese — ehia bu sẹrriọ wẹ ẹ i gia ka.

II Krọnikol 7:4

Ẹre Solomọn kevbe emwa nii hia na zọ ese ghe Nọyaẹnmwa.

II Krọnikol 7:6

Avbe ohẹn keghi mudia ye ehe ne a mwamwa ye otọ khẹ iran, avbe Livai keghi mudia viọ aro da iran, iran kegha ye emwi iku kevbe ihuan ne Devid viọ ye otọ gha rho e Nọyaẹnmwa, Iran kevbe gha so ihuan na, “Itohan rẹn i mwẹ ọfo!” zẹ vbe ne Devid ma iran re. Avbe ohẹn kegha kpe okpe vbene emwa nekpa hia na mudia.

Ezikiẹl 45:17

Iwinna irẹn nọ ne ọ mu aranmwẹ ne a ra gien uan rre, kevbe ọka imuohan kevbe ayọn ne a ya mu ohan ọghe otọe Izrẹl hia vbe ẹghẹ Emwiukpo Uki Ọgbọn kevbe Ẹdẹ Ikẹtin kevbe avbe emwiukpo ni ghi dekẹe. Rẹn ọ re ọ gha mu emwi imuohan ọghe orukhọ rre, kevbe ọghe ọka, emwi imuohan ne a ra wa gien ikun ẹnrẹn, kevbe emwi izọese ọghe isara, ne a ya kpe orukhọ ivbi Izrẹl kua.”

Maika 6:7

Ọ gha yẹ e Nọyaẹnmwa ra, adeghẹ I viọ ohuan arriaisẹn inu ne o khin gie ẹe ra ẹzẹ ne ẹ i ka ọghe ofigbọn oliv? Te I gha rhie ovbi mwẹ ne ọdiọn ya ha oko ne ẹẹn ra ne I ya ha osa orukhọ mwẹ?

Nọmbas 7:10

Avbe ọkaolotu keghi vbe viọ emwi rre do ya titi ugie ne a na ya aka nii fi ohan. Iran ghi suẹn gha viọ avbe emwi ihaoko nii rrie aka,

Iyẹn ne ọ Maan Ọghe Jọn 10:22

Ẹghẹ keghi sẹ ne a ya ru emwiukpo Ayafiohan vbe Jerusalẹm, ẹghẹ okhuakhua nọ.