II Kọrinti 8:3 - Edo Bible (E Baibol Ẹdo) Version 1996

³ Ne I tama uwa wẹ, ekhọe obọ iran ọre iran ya rhie emwi ladian vbene ẹtin ira sẹe, uhin gberra vbene obọ iran sẹe.

II Kọrinti 8:3 ပူးပေါင်းရင်းမြစ်များ

I Krọnikol 29:9

Emwa nii keghi ya ekhọe obọ iran viọ emwi gie Nọyaẹnmwa, iran keghi ghọghọ wẹ emwi ne a viọ rre bun sẹ vberriọ. Ẹko keghi kakabọ rhiẹnrhiẹn e Devid ne ọba tobọ ẹre.

Psalm 110:3

Ẹdẹ ne u gha gu avbe eghian ruẹn gbinna, emwa ruẹn gha tobọ iran la igbinna, zẹ vbe evbu owiẹ vbirrivbirri avbe igbama ruẹn gha bu ruẹ gha die uhunmwu oke ne ọ huanrẹn ni.

Ẹksọdọs 35:29

Ikpia kevbe ikhuo hia ni rre Izrẹl, ni vbe ho ne iran mwẹ obọ vbe iwinna ne Nọyaẹnmwa gie Mosis do kha wẹ ne a ru, keghi viọ emwi izọhẹ iran gie Nọyaẹnmwa.

Ẹksọdọs 35:5

Wa ghi zọhẹ gie Nọyaẹnmwa. Dọmwadẹ ọghọe ne ọ rhirhi gha ho ne ọ ru vberriọ ghi viọ emwi izọhẹ na rre: Igoru, esiliva, oze.

Iyẹn ne ọ Maan Ọghe Mak 14:8

Ọ ru emwi ne ọ gha sẹtin ru nẹ, ọ tue ori ne ọ winhin na yan mwẹ egbe ne ọ ya dọlọ ẹe ye otọ khẹ ẹghẹ irorinmwi.

Iwinna 11:29

Avbe erhuanegbe keghi ta ẹe wẹ dọmwadẹ ọghọe vbe uwu iran gha rhie vbene obọ ẹre sẹe ya ru iyobọ gie etẹn iran ni rre Judia.

Ebe ne Pọl gbẹẹn gie emwa Rom 10:2

Rhunmwuda I gha wa sẹ osẹe ne iran. wẹ ẹmwẹ Osanobua wa rre iran ekhọe ẹsẹse. Sokpan, vbene ẹmwẹ ọnrẹn rre iran ekhọe ma lele uviẹn ọghe ọmwa ne ọ rẹn emwi ẹse.

I Kọrinti 16:2

Vbe ikpedẹ ne okaro ọghe uzọla hia, dọmwadẹ ọghọe ghi fian igho rhie ye otọ zẹ vbene igho ne ọ khuaẹn vbe sẹ, ne a ya ẹe gbakhua hin, a i rẹn vbe I gha rre, ne a ghẹ ghi vbe gha gbẹn okhuo igho ne a koko.

I Kọrinti 9:17

A deghẹ ekhọe obọ mwẹ ọre I ya winna, I sẹtin rhie aro yọ wẹ a gha ha mwẹ osa, sokpan ugbẹn vbe a miẹn wẹ iwinna ne ọ khẹ ke mwẹ nọ, ọnii rhie maa wẹ te I ru ẹe zẹ vbe okhuo ne a fian mẹ.

Galatia 4:15

Te ọyẹnmwẹ te gha sẹ uwa! Vbe ọ mobọ ghi ye hẹ na yi? Mẹ gha sẹtin tobọ mwẹ ta ene unu uwa wẹ, akpawẹ te ọ gie uwa ru, wa gha wọlọ aro uwa viọ mẹ.

Filipai 2:13

rhunmwuda Osanobua ọre ọ winna vbe uwu uwa ne ọ miẹn ehe na guẹ gha ho, kevbe ne u sẹtin gha ru vbene ọ rre irẹn ekhọe.

Kọlose 4:13

I gha wa sẹtin sẹ osẹe yọ ighẹ iwinna nọkhua ne ọ winna ne uwa, kevbe ne emwa Laodisia kevbe Hirapolis.

I Tẹsalonaika 2:8

Sokpan, rhunmwuda aho ẹmwẹ ọmwa ne ima mwẹ ghe uwa, ma keghi wa mu egbe ne a gha ya ghae ne uwa, ẹ i re vbe nene Iyẹn Ne ọ maa ọkpa ọghe Osanobua, sokpan kevbe ẹdẹ agbọn ima ba re. Wa kegha ghan ne i ma ẹsẹse.

Failimọn 1:14

Vbene ọ rhirhi gha ye hẹ, I ma ho ne I ya obọ yẹn ruẹn ehọ gha ru iyobọ mẹ, sokpan, I ho ne u ye ekhọe obọ ruẹ ru ẹe. Rhunmwuda ọnii, I i ra ru emwi rhọkpa vbe ẹ i re te u kue yọ nẹ.

I Pita 4:11

Ne ọ kpe orhu, we ne ọ gha kpe orhu ẹmwẹ Osanobua, ne ọ ga emwa ọvbehe, we ne ọ gha ya ẹtin ne Osanobua rhie nẹẹn hia ga, ne a miẹn ehe na miẹn wẹ, vbe uwu emwi hia, te a ghi la ekpa Jesu Kristi rhie urhomwẹ ne Osanobua, ọmwa ne ọ yan ẹtin kevbe uyi ẹdẹ kevbe ẹdẹdẹmwẹdẹ. Isẹ.

I Pita 5:2

Wa gha re Ọsuohuan avbe oghẹn ohuan ne Osanobua viọ ne uwa, wa gha ye aho ne ọ ke uwu ekhọe rre gbe aro ghe iran, vbene Osanobua ho ne uwa gha ru ẹe, ẹ i re ne a gbe omaro omaro ru. U ghi gha winna iwinna ruẹn, ẹ i re rhunmwuda ne a miẹn ehe na ha ruẹ osa kẹkan, sokpan aho ne a winna ne ọ ke ekhọe rre.