II Kọrinti 2:9 - Edo Bible (E Baibol Ẹdo) Version 1996

⁹ Rhunmwuda, ọnii ọ zẹe ne I na gbẹn ebe ni gie uwa, te I gha ho ne I rẹn vbene uwa ghi ziengbe emwi hia sẹ hẹẹ, kevbe wẹ, deghẹ wa mu egbe ne uwa ya gha rhie ibude mwẹ vbe ẹghẹ hia.

II Kọrinti 2:9 ပူးပေါင်းရင်းမြစ်များ

Ẹksọdọs 16:4

E Nọyaẹnmwa keghi tama e Mosis wẹẹ, “Mẹ ra ru ẹe ne ebrẹd gha dele ke odukhunmwu rre ne uwa hia, dọmwadẹ ọghọe vbe uwu avbe emwa nii ghi gha ladian ya gha rhọ ne ọ gha sẹ vbe ọghe ẹdẹ ọkpa. Vbe nian ọre I gha ya danmwẹ iran ghe, a deghẹ iran gha ya uhi mwẹ ru emwi.

II Kọrinti 10:6

Ugbẹn vbe uwa ghi rhie maa nẹ nian fẹẹrẹ ighẹ wa i re etẹ, te ima ghẹ ghi rri uyinmwẹ isọtẹ hia oya.

II Kọrinti 2:3

Ọna ọre ọ si ẹe ne I na gbẹn ebe nii gie uwa. I ma ho ne I gha dee ne a miẹn wẹ ọmwa ne ọ gha ya ẹko mwẹ rhiẹnrhiẹn, ọre ọ ghi rhia mwẹ ekhọe rua. Rhunmwuda aro mwẹ dae wẹ ẹko gha rhiẹnrhiẹn mwẹ ọre ẹko na vbe rhiẹnrhiẹn uwa.

II Kọrinti 2:4

Ekhọe ne ọ vuọẹn ne akhiẹ ẹsẹse kevbe iro nọkhua ọre I ya gbẹn ebe gie uwa kẹe kevbe amẹ eve, ẹ i re te I ho ne I rhia uwa ekhọe rua, sokpan ne I rhie maa uwa vbene I kakabọ ho ẹmwẹ uwa hẹẹ.

II Kọrinti 2:8

Wa lahọ, wa rhie ma rẹn ighẹ, wa ye mobọ ho ẹmwẹ ọnrẹn.

II Kọrinti 8:2

Ọlọghọmwa ne iran miẹn wa dan mwẹ iran ghe ẹsẹsẹmwẹse, sokpan ẹko keghi ye rhiẹnrhiẹn iran sẹrriọ wẹ iran keghi ye zẹ emwi obọ ya ru ẹse wọrhọ wọrhọ, egbe ne a ya miẹn wẹ iran rre uwu a i mwẹ.

II Kọrinti 8:24

Wa ye oghọghọ miẹn iran, ne aro esọsi hia miẹn ehe na da ẹe, ne iran vbe rẹn wẹ orhuọ ẹmwata ọre ima ye uwa rhuọ.

Diuteronomi 13:3

Ghẹ zẹdẹ zẹ ye ọ re hiehiere, e Nọyaẹnmwa Osanobua ruẹ ọ re ọ ya ẹe danmwẹ ọẹn ghe, ne ọ miẹn ehe na ghe a deghẹ wẹ ye ekhọe ruẹ hia kevbe orhiọn ruẹn hia ho ẹmwẹ Nọyaẹnmwa.

Diuteronomi 8:16

Ọ rhie mana ne uwa re vbe uwu ato, egbe evbare ne avbe erha uwa odede ma re ẹdẹ. Ọ keghi gie ọlọghọmwa gie uwa ne ọ miẹn ehe na danmwẹ uwa ghe, ne ọ miẹn ehe na ya emwi ne ọma fiangbe uwa vbe okiekie.

Diuteronomi 8:2

Wa ghi yerre vbene Nọyaẹnmwa Osanobua uwa su uwa vbe okhian ne ọ taẹn la uwu ato nii vbe ukpo iyeva ni gberra na, ọ na vbe gie ọlọghọmwa gie uwa ne ọ ya danmwẹ uwa ghe, ne ọ miẹn ehe na rẹn emwi ni rre uwa ekhọe, nẹ ọ miẹn ehe na vbe rẹn adeghẹ wa gha ya uhi ẹre ru emwi.

Filipai 2:12

Rhunmwuda ọnii, ọse mwẹ ni ghan, vbene uwa wa gha họn ẹmwẹ mẹ ẹghẹ ne I na rre ehe ne uwa ye, ẹghẹ na ọre ọ na mobọ ke nian ne uwa gha họn ẹmwẹ mẹ vbe ne a ghi na miẹn na ighẹ I i ghi rre ehe ne uwa ye. Wa gha ya ohan kevbe uguọmwẹ winna khian, ne uwa miẹn ehe na ru ẹmwẹ imiẹnfan uwa fo,

Filipai 2:22

Wa tobọ uwa miẹn vbene ọ vbe ta egbe ọmwa ne irẹn khin hẹ, vbe imẹ vbe ọre gba winna, zẹ vbe ọmọ vbe erha ye iwinna iyẹn ne ọ maa.

II Tẹsalonaika 3:14

Emwa eso sẹtin gha rre evba ne ẹ i ra zẹ ye ẹmwẹ ne ima gbẹnnẹ ye ebe na. A deghẹ ọ ye rriọ, wa ye ẹre ẹro ne uwa ghẹ gu ẹe mu obọ hiehie, ne ekhue miẹn ehe na muẹn.

Failimọn 1:21

Aro mwẹ dae vbene I wa gbẹn ebe na wẹ, u gha ru vbene I khare, vbe ẹmwata, I rẹnrẹn ighẹ u gha ru gberra vbene I khare.