Hibru 9:12 - Edo Bible (E Baibol Ẹdo) Version 1996

¹² Ẹghẹ ne Kristi na la Ọgua ukpọn ni gberra, ne ọ na vbe la uwu esagiẹn ẹwe ra ẹmila, ne ọ ya zọ ese, sokpan, ọ keghi mu esagiẹn ọghe egbe ẹre, ọ na rhie imiẹnfan ẹtẹbitẹ gie ima.

Hibru 9:12 ပူးပေါင်းရင်းမြစ်များ

Daniẹl 9:24

“Ukpo ekigbesiyenẹ vbe ihe ihinrọn ọ re Osanobua bu yọ ne ọ gha na do fannọ emwa ruẹn kevbe ẹvbo ruẹ nọhuanrẹn hin obọ orukhọ kevbe ọkhọ rre. A gha ya orukhọ bọ emwa, a ghi mu ẹmwata etẹbitẹ gbọọ, ẹghẹ nii umian nii, kevbe ẹmwẹ akhasẹ nii ghi do sẹ, a ghi do do ugie ya dọlegbe rhie Ọgua Osa ye ihe.

Levitikọs 16:15

Vbe iyeke ọnii, ọ ghi gbe ẹwe izọese orukhọ ọghe emwa nii, ọ ghi mu esagiẹn ọnrẹn gha die Ehe Nọhuansẹ Ehia, ọ ghi sanmwẹ ọẹn yan ugue ẹkpẹti nii kevbe odaro Ẹkpẹti Ile nii, zẹ vbene ọ vbe ru esagiẹn ẹkhuia ẹmila nii.

Levitikọs 4:3

Adeghẹ Ogie Ohẹn ọre ọ ru orukhọ ne ọ na mu abe gie emwa nii, ọ ghi mu ẹkhuia ẹmila ne ẹ i mwẹ okan ya zọ ese ghe Nọyaẹnmwa ye orukhọ ẹre.

Levitikọs 8:2

“Rhie Errọn kevbe ivbi ẹre gha rrie onurho Owa Ukpọn Ile, u ghi vbe viọ avbe ẹwu ohẹn rre, ofigbọn ne a sa ye emwa uhunmwu, ovbi ẹkhuia ẹmila ne a ra ya zọ ese orukhọ, ogho eveva ke ẹe kevbe okhuae ebrẹd ne ọ ma hue.

Levitikọs 9:15

Vbe iyeke ọnii, ọ keghi viọ izọhẹ emwa nii gha dee. Ọ keghi mu ẹwe ne a ra ya zọ ese ye orukhọ emwa nii, ọ gbe ẹe, ọ keghi ya ẹe ru izọhẹ zẹ vbene ọ vbe ru izọhẹ orukhọ ọghọe.

Zẹkaraia 3:9

I ra mu okuta ne ọ mwẹ aro ihinrọn ye odaro Jọsua. I gha gbẹn emwi yọ, I gha viọ orukhọ otọe na kua vbe ikpẹdẹ ọkpa kẹkan.

Iyẹn ne ọ Maan Ọghe Mak 3:29

Sokpan ọmwa ne ọ kpa unu ghe Orhiọn Ne Ọ Huanrẹn, a i ra ya bọ ẹe ẹdẹdẹmwẹdẹ rhunmwuda orukhọ etẹbitẹ ọre ọ ru.”

Iyẹn ne ọ Maan Ọghe Luk 1:68

“Wa gie a rho Nọyaẹnmwa Osanobua ọghe Izrẹl. Rhunmwuda ọ do ye emwa rẹn obọ, ọ keghi fan iran vbe irri.

Iwinna 20:28

Wa gha gbe aro ghe egbe uwa kevbe ohuan hia ne Orhiọn Ne Ọ Huanrẹn viọ ne uwa gha su, wa gha re ọsuohuan esọsi Osanobua ne ọ ya uwu Ovbi ẹre ya khian oghẹ ẹe.

Ẹfisọs 1:7

Rhunmwuda, vbe ekpa uwu Jesu Kristi, a keghi fannọ ima ye otọ, ọnii nọ wẹ a keghi vbe ya avbe orukhọ mwa bọ mwa. U miẹn vbe ẹsọhẹ, Osanobua kpọlọ hẹ,

Kọlose 1:14

Ọmwa ne ọ miẹn ima fan, ọ na vbe ya avbe orukhọ mwa bọ mwa.

I Tẹsalonaika 1:10

Kevbe ne uwa do gha diakhẹ Ovbi ẹre ne ọ ke ẹrinmwi tuorre gha dee, Jesu ne Ovbi ẹre, ọmwa ne irẹn huẹn kpaegbe vbe orinmwi, ọmwa ne ọ miẹn ima fan vbe obọ ohu Osanobua ne ọ dee.

Taitọs 2:14

Rẹn keghi rhie egbe ẹre ne ima, khian emwa ne ẹ i mwẹ iruẹn, ne ọ re ọghe irẹn ọkpa, kevbe ne ho ne iran gha ru emwi esi.

Hibru 1:3

Awanwan ọghe uyi Osanobua ọre irẹn ya fi wainwain, rẹn ọrọre ama ọghe vbene Osanobua wa ye zẹẹ, ọ keghi vbe ya ẹmwẹ unu ọghọe ne ọ mwẹ ẹtin mu agbọn vbe ẹrinmwi mwẹ. Ọ ghi kpe emwa ne agbọn huan hin orukhọ iran rre nẹ, ọ keghi ya tota vbe ẹrinmwi vbe obọ erha ọmwa Osanobua ne Ẹtin ne ọ sẹẹ ehia.

Hibru 10:19

Rhunmwuda ọnii, etẹn mwẹ, vbe ekpa uwu ne Jesu wu, a fan obọ ẹre ne ima nẹ nian, ne ima wa gha la uwu Ehe Ne ọ Huan Sẹẹ Ehia nii.

Hibru 10:4

Rhunmwuda esagiẹn ẹmila kevbe ọghe ẹwe i sẹtin kpe orukhọ khua.

Hibru 13:12

Ọna ọ si ẹẹ ne Jesu na vbe wu ye vbe a lahin onurho ẹvbo rre nẹ, ne ọ miẹn ehe na ye esagiẹn ọnrẹn, khuẹ orukhọ emwa kua.

Hibru 5:9

Ugbẹn vbe a ghi ya ẹe khian enọgbae na nẹ, rẹn keghi do khian ehe ne imiẹnfan etẹbitẹ ke rre ne iran hia ni họn ẹmwẹ nẹẹn.

Hibru 7:27

Rẹn i yevbe avbe igie ohẹn nekpa, ẹ i vbe ka zọ ese ye orukhọ obọ ẹre nẹ ẹdẹgbegbe, zẹ vbe emwi ne ẹ i mwẹ a ma ru, ọ keghi do zọ ye ọghe emwa nekpa. Ọ zẹ ese nẹ uhukpa nii, ne emwa hia, vbe ẹghẹ ne ọ na ye egbe ẹre zọ ese.

Hibru 9:13

Esagiẹn ẹwe kevbe ẹmila nii, kevbe emuẹn ese ne a giẹn uan nii, a ghi bọnmwẹ ọẹn yan iran ni ma huan vbe ọghe ilawo iruemwẹ ugamwẹ, ọ ghi ya iran khian ni huanrẹn zẹ vbe ọghe ilawo iruemwi ugamwẹ.

Hibru 9:14

Ugbẹn vbe a ghi miẹn wẹ ẹmwata ọna khin, Inuinu ọre ne esagiẹn Kristi gha ru ya kpọlọ sẹẹ! Ọ la ekpa Orhiọn etẹbitẹ nii ya egbe ẹre zọ ese ne ọ gbae ghe Osanobua. Esagiẹn ọnrẹn ọre ọ gha khuẹ ekhọe orhiọn mwa huan hin obọ iwinna ọrhiae rre, ne ima miẹn ehe na gha ga Osanobua ne ọ rrọọ.

Hibru 9:15

Rhunmwuda ọnii, ọre a na miẹn wẹ, Kristi ọre ọ mwamwa ile ọghọgbọn, ne afiangbe etẹbitẹ ne Osanobua ve, miẹn ehe na sẹ iran obọ ighẹ avbe emwa ne Osanobua tie re. Te ọna ghi gia ru nian, rhunmwuda, ọmwa ọkpa wu, ne ọ fannọ emwa hin orukhọ ne iran ru ẹghẹ ne iran na gha rre ototọ ile ne okaro rre.

Hibru 9:19

Okaro, Mosis keghi talọ ẹmwẹ uhi na ma emwa nii, zẹ vbene a gbẹn ye nene Uhi. Vbe iyeke ọnii, ọ keghi mu esagiẹn ẹmila ke ẹe kevbe amẹ, ọ keghi ye hisọp kevbe iku oru ododo, sanmwẹ ọẹn ku ebe nene Uhi kevbe avbe emwa nii.

Hibru 9:28

Erriọ vbe nọ zẹẹ, a keghi ya Kristi zọ ese uhukpa, ne ọ viọ orukhọ emwa ni bun gha rrie. Ọ gha ye vbe ya egbe ladian uhukpa, ẹ i ghi re ne ọ do guan ye ẹmwẹ orukhọ, sokpan ne Ọ do miẹn iran fan ighẹ avbe emwa ni mudia khẹ ọre.

Hibru 9:7

Sokpan Ogie Ohẹn ọkpa ọre ọ la Ọgua ukpọn ne ọ ke uwu ẹre, uhukpa ọre ọ vbe ru vberriọ vbe ukpo. Ọ ghi mu esagiẹn mwẹ, ọnii ọre ọ ya zọ ese ne egbe ẹre, kevbe ye orukhọ ne emwa ni hia ru, vbe ne iran ma na rẹn.

Arhie Maan 1:5

Kevbe ke ehe ne Jesu Kristi ne ọre osẹe ẹmwata ye ghe dee, ọmọdiọn ne a biẹe kevbe ne a vbe huẹn kpao vbe idin, ọmwa ne ọre ne ọ khaemwisẹ yan avbe ọba ni rre otọ agbọn hia. Rẹn ho ẹmwẹ mwa, ọ keghi ya ekpa uwu ne ọ wu fannọ ima kua hin obọ orukhọ mwa rre.

Arhie Maan 5:9

Iran keghi so ihuan ọgbọn: “U sẹe ne ọ gha rhie ebe ne a kiri ni. Kevbe ne u giagia emwi ne a ya gbalọ ẹe rhunmwuda, a te gbe ua nẹ, u keghi ye uwu ruẹ dẹlẹ emwa ne agbọn gie Osanobua.