Hibru 8:13 - Edo Bible (E Baibol Ẹdo) Version 1996

¹³ Vbene ọ ghi na guan kan ile ọgbọn nian, Osanobua ye ne okaro khian ọwiẹyi nẹ. Emwi ne ọ ghi khian ọmaẹn nẹ ighẹ ọ vbe rẹnhuan nẹ, ẹ i ghi kpẹe a ke ho ẹre bẹkun.

Hibru 8:13 ပူးပေါင်းရင်းမြစ်များ

Aizaia 51:6

Wa tọn aro mu ghe odukhunmwu, wa ghe otọ agbọn! A gha ho avbe odukhunmwu bẹkun zẹvbe ighogho; agbọn wiẹn uan zẹvbe ukpọn ne ọ khian ọmaẹn emwa ni rrọọ hia gha wulo zẹvbe ikian. Sokpan, imiẹnfan ne I rhie dee, etẹbitẹ nọ akhọnmiotọ mwẹ ọ re ọ ra gha re ufomwẹ ehia.

Matiu 24:35

Ẹrinmwi kevbe agbọn gha gberra, sokpan, ẹmwẹ mwẹ i ra gberra.

Iyẹn ne ọ Maan Ọghe Luk 22:20

Erriọ zẹẹ ọre ọ vbe mu ukpu ne iran, vbe iran rri evbare ota wẹ, “Ukpu na ọrọre ile ọgbọn ọghe Osanobua ne a ya esagiẹn mwẹ ne a gbe ye otọ ne uwa yi ẹre okhi!”]

I Kọrinti 13:8

Aho ẹmwẹ ọmwa, etẹbitẹghori nọ, ẹmwẹ ne a guan ne ọ la ọmwa uhunmwu rrọọ, sokpan ẹghẹ kherhe ọre ọ ya vbe otọ. A vbe ya ẹmwẹ ne a guan we ọmwa sokpan, ọ gha vbe dobọ yi, irẹnmwi rrọọ sokpan, ọ gha ru ọghọe gberra.

II Kọrinti 3:6

Rhunmwuda, rẹn ọre ọ ru ẹe ne ima sẹtin gha ga ile nọgbọn, ne ẹ i re uhi ne a gbẹnnẹ ye otọ, sokpan, ọghe Orhiọn. Uhi ne a gbẹnnẹ ye otọ uwu ọre ọ si rre, sokpan arrọọ ọre Orhiọn rhie ne ọmwa.

II Kọrinti 5:17

Ọmwaikọmwa gha yegbe ba Kristi nẹ, ọmwa ọgbọn ghi nọ, emwi nẹdẹ hia rrie, emwi ọgbọn rre nẹ.

Hibru 1:11

A gha ho ehia bẹkun, sokpan wẹ gha rrọọ. Ehia gha vbe khian ọmaẹn vbe ukpọn.

Hibru 12:24

Wa keghi bu Jesu gha dee, ọmwa ne ọ mwamwa ile ọgbọn nii ye otọ kevbe esagiẹn ne agbe kha kha, ne ọ vbe ta ẹmwẹ emwi ni maa sẹ esagiẹn ọghe Ebẹl.

Hibru 7:22

Alughaẹn ne ọ rrọ na, keghi rhie maa nian wẹ, Jesu ọrọre ama ne aro ya dae wẹ, ile ne ọ maa sẹ ọre ọ na khin.

Hibru 8:6

Sokpan vbene ọ ye na, a mu iwinna ohẹn ne ọ kpọlọ sẹẹ ọ ghe iran ẹsẹse ne Jesu nẹ, zẹ vbene ile ne irẹn mwamwa ẹn ye ẹkpo Osanobua kevbe emwa ne agbọn, vbe maa sẹ, rhunmwuda, emwi ne a ve ne ọ vbe maa sẹ, ọre a hẹnhẹn ọẹn yan.

Hibru 8:8

Sokpan te Osanobua miẹn emwi ne a ma ru ẹse vbe obọ emwa rẹn, ọre ọ na kha wẹẹ, “Ẹdẹ dee, erriọ Nọyaẹnmwa khare. Ne I gha gu emwa Izrẹl ta ile ọgbọn, debe emwa Juda.

Hibru 9:15

Rhunmwuda ọnii, ọre a na miẹn wẹ, Kristi ọre ọ mwamwa ile ọghọgbọn, ne afiangbe etẹbitẹ ne Osanobua ve, miẹn ehe na sẹ iran obọ ighẹ avbe emwa ne Osanobua tie re. Te ọna ghi gia ru nian, rhunmwuda, ọmwa ọkpa wu, ne ọ fannọ emwa hin orukhọ ne iran ru ẹghẹ ne iran na gha rre ototọ ile ne okaro rre.