Hibru 7:27 - Edo Bible (E Baibol Ẹdo) Version 1996

²⁷ Rẹn i yevbe avbe igie ohẹn nekpa, ẹ i vbe ka zọ ese ye orukhọ obọ ẹre nẹ ẹdẹgbegbe, zẹ vbe emwi ne ẹ i mwẹ a ma ru, ọ keghi do zọ ye ọghe emwa nekpa. Ọ zẹ ese nẹ uhukpa nii, ne emwa hia, vbe ẹghẹ ne ọ na ye egbe ẹre zọ ese.

Hibru 7:27 ပူးပေါင်းရင်းမြစ်များ

Ezikiẹl 43:19

Avbe ohẹn ni re ẹwae Livai, ni vbe re ivbi uniẹn Zadọk, iran ni ọkpa ọ re ọ gha rrie odaro mwẹ do gha ga mwẹ. Mẹ ne Nọyaẹnmwa ne Udazi ọ re ọ yi iyi na. U ghi mu ovbi ẹkhuia ẹmila ne iran ya zọ ese ye orukhọ.

Levitikọs 16:11

Errọn ghi gbe ẹkhuia ẹmila nii ye orukhọ ọghọe kevbe ọghe emwa rẹn,

Levitikọs 16:15

Vbe iyeke ọnii, ọ ghi gbe ẹwe izọese orukhọ ọghe emwa nii, ọ ghi mu esagiẹn ọnrẹn gha die Ehe Nọhuansẹ Ehia, ọ ghi sanmwẹ ọẹn yan ugue ẹkpẹti nii kevbe odaro Ẹkpẹti Ile nii, zẹ vbene ọ vbe ru esagiẹn ẹkhuia ẹmila nii.

Levitikọs 16:6

Ọ ghi ye ẹkhuia ẹmila zọ ese ye orukhọ ọghe emwa ẹgbẹe ẹre kevbe ọghe egbe ẹre.

Ebe ne Pọl gbẹẹn gie emwa Rom 6:10

Uwu ne ọ wu, te ọ wu ẹe hin orukhọ rre uhukpa ni fẹẹrẹ. Arrọọ ne ọ ghi rrọọ na nian, Osanobua ọre ọ ghi rrọọ na.

Ẹfisọs 2:22

Vbene a na ku egbe kugbe ba irẹn, wa tobọ uwa vbe khian ne a ghi bọ deba iran nekpa hia nian, ne ọ do khian owa ne Osanobua gha la ekpa Orhiọn irẹn gha dia.

Ẹfisọs 5:2

Wa gie aho ẹmwẹ ọmwa gha kha yan ẹdẹ agbọn uwa, zẹ vbene Kristi ho ẹmwẹ mwa, ne ọ na ya ẹdẹ agbọn rẹn fi ohan ne ima, zẹ vbe emwi imuohan kevbe emwi izọ ese ne ọ winhin, ne ọ yẹ Osanobua.

Taitọs 2:14

Rẹn keghi rhie egbe ẹre ne ima, khian emwa ne ẹ i mwẹ iruẹn, ne ọ re ọghe irẹn ọkpa, kevbe ne ho ne iran gha ru emwi esi.

Hibru 5:1

Ogie Ohẹn ke ogie ohẹn, ọkpa vbe uwu emwa nii, ọre a na zẹ ọe ne ọ do gha ga Osanobua ne iran hia. Rẹn ghi gha yo imuohan, ọ ghi vbe gha zọ ese ye orukhọ.

Hibru 5:3

Kevbe rhunmwuda ighẹ ọ ma vbe khia ne irẹn fo, ọ ghi gha zọ ese, ẹ i ghi re ọghe orukhọ avbe emwa nii ọkpa, sokpan kevbe ọghe irẹn tobọ ẹre.

Hibru 8:4

Akpawẹ agbọn na ọre ọ ye, ẹ i ghẹ gha re ohẹn hiehiere, rhunmwuda wẹ, avbe ohẹn rrọọ ni ye emwi mu ohan, zẹ vbe vbene Uhi avbe Ju mwamwa ẹn.

Hibru 9:12

Ẹghẹ ne Kristi na la Ọgua ukpọn ni gberra, ne ọ na vbe la uwu esagiẹn ẹwe ra ẹmila, ne ọ ya zọ ese, sokpan, ọ keghi mu esagiẹn ọghe egbe ẹre, ọ na rhie imiẹnfan ẹtẹbitẹ gie ima.

Hibru 9:14

Ugbẹn vbe a ghi miẹn wẹ ẹmwata ọna khin, Inuinu ọre ne esagiẹn Kristi gha ru ya kpọlọ sẹẹ! Ọ la ekpa Orhiọn etẹbitẹ nii ya egbe ẹre zọ ese ne ọ gbae ghe Osanobua. Esagiẹn ọnrẹn ọre ọ gha khuẹ ekhọe orhiọn mwa huan hin obọ iwinna ọrhiae rre, ne ima miẹn ehe na gha ga Osanobua ne ọ rrọọ.

Hibru 9:25

Ogie Ohẹn a vbe Ju, uhukpa vbe ukpo ọre ọ la uwu Ehe Ne ọ Huanrẹn, irẹn kevbe esagiẹn aranmwẹ ne ọ mu mwẹ. Sokpan Kristi ma la evba ya ye egbe ẹre zọ ese kugba kẹghẹrẹ.

Hibru 9:26

Akpawẹ erriọ nọ, ẹghẹ ni bun ọre ọ gha ya rri oya ke ne agbọn ya suẹn gha dee. Sokpan rẹn keghi ladian nian uhukpa ọghe ọfo vbe otọ, ne ọ do ya egbe ẹre zọ ese ya kpe orukhọ kua, vbe ẹghẹ na ne emwi hia ni rrọọ ghi na ye egbe rrie ufomwẹ.

Hibru 9:28

Erriọ vbe nọ zẹẹ, a keghi ya Kristi zọ ese uhukpa, ne ọ viọ orukhọ emwa ni bun gha rrie. Ọ gha ye vbe ya egbe ladian uhukpa, ẹ i ghi re ne ọ do guan ye ẹmwẹ orukhọ, sokpan ne Ọ do miẹn iran fan ighẹ avbe emwa ni mudia khẹ ọre.

Hibru 9:7

Sokpan Ogie Ohẹn ọkpa ọre ọ la Ọgua ukpọn ne ọ ke uwu ẹre, uhukpa ọre ọ vbe ru vberriọ vbe ukpo. Ọ ghi mu esagiẹn mwẹ, ọnii ọre ọ ya zọ ese ne egbe ẹre, kevbe ye orukhọ ne emwa ni hia ru, vbe ne iran ma na rẹn.