Hibru 4:15 - Edo Bible (E Baibol Ẹdo) Version 1996

¹⁵ Ogie Ohẹn ọghomwa, ẹ i re ne ẹnina ọmwa i sẹtin la ẹre ekhọe vbe ẹmwẹ evburriẹ mwa. Sokpan Ogie Ohẹn ọghomwa keghi re ne avbe la odẹ hia danmwẹ ghe zẹ vbene ima ye, sokpan ọ ma ru orukhọ.

Hibru 4:15 ပူးပေါင်းရင်းမြစ်များ

Ẹksọdọs 23:9

“Wa ghẹ ye obọ dan mu orhunmwuyẹn, rhunmwuda wa rẹn agbọn ne orhunmwuyẹn ye rhunmwuda wa te vbe gha re orhunmwuyẹn yi vbe Igipt.

Aizaia 53:9

A keghi mu ẹẹn ye idin ba emwa dan, a ree ẹre ba iran ni fe, egbe ne a ya miẹn wẹ ọ ma ru emwi khọ ẹdẹ ra ne ọ ta ohoghe.”

Hozia 11:8

“Vbe I a ghi ra he uwẹ fua hẹ Izrẹl? Vbe I a ghi ra sẹtin fi iyeke gbuẹ hẹ? Mẹ gha sẹtin fuẹn uwẹ ua zẹ vbe Adma ra? Ra ne I ru uẹ vbene I ru Zẹboim? Ekhọe i sẹ mwẹ ya ru ẹe ahoẹmwọmwa mwẹ ghe ruẹ kpọlọ gbe.

Matiu 12:20

Rẹn i ra bun ovbi erhan ne ọ vbokho nẹ fo, ra ne ọ dọ ukpa ne ọ ba ruẹ ruẹ yọ. Rẹn i ra hẹwẹ rhinrin ẹmwata te do khọnmiotọ,

Matiu 4:1

Ẹghẹ ni, Orhiọn keghi gban Jesu uhunmwu ghe uwu ẹgbo ne Esu ya danmwẹ ọẹn ghe.

Iyẹn ne ọ Maan Ọghe Luk 22:28

“Wa ọre ọ mudia ke mwẹ vbe ẹghẹ edanmwẹ hia.

Iyẹn ne ọ Maan Ọghe Luk 4:2

Ehe ne Esu na ya danmwẹ ọẹn ghe la ikpẹdẹ iyeva. Vbe uwu ẹghẹ na hia, ọ ma rri evbare rhọkpa, sẹrriọ ne ohanmwẹ ghi na gha gbe ẹe vbe a ghi do ehia fo nẹ.

Iyẹn ne ọ Maan Ọghe Jọn 8:46

Gha ọ lẹ orukhọ ginna mwẹ obọ vbe uwu uwa? Adeghẹ ẹmwata ọre I ta, vbọzẹ ne uwa ma na ya mwẹ yi?

Ebe ne Pọl gbẹẹn gie emwa Rom 8:3

Emwi ne Uhi ma sẹtin ru, rhunmwuda ne ọmwa ma na wo vbe egbe vbe a yiẹe, Osanobua ru ẹe nẹ. Rẹn keghi bu ohiẹn gbe orukhọ ne ọ rre egbe ọmwa zẹ vbe ne a yiẹe, vbe ne ọ na gie Ovbi ẹre ne ọ mu akpa egbe ọmwa ne ọ mwẹ orukhọ yọ gha dee, ne ọ miẹn ehe na do gbe ukhu orukhọ ua.

II Kọrinti 5:21

Kristi ma gha mwẹ orukhọ, sokpan Osanobua keghi ghae nẹ vbe orukhọ ima, ne a miẹn ehe na miẹn wẹ, ma gha ye egbe ba irẹn nẹ, ma ghi vbe ghae vbe ọmwa ẹmwata ne Osanobua khin.

Hibru 4:14

Rhunmwuda ọnii, wa gie ima dae yi gbain ighẹ iyayi ne ima tobọ mwa lao, rhunmwuda ma mwẹ ogie ohẹn nọkhua ne ọ kpao gha rrie odaro Osanobua zẹẹ, ọnii ọre Jesu ne Ovbi Osanobua.

Hibru 5:2

Rhunmwuda ighẹ odẹ ni bun ọre irẹn ma na gba, rẹn tobọ ẹre ọ ghi gha ye obọ nekhuẹrhẹ mu iran ni ma rẹn ne a ye, kevbe ni ha emwi ku ru.

Hibru 7:26

Rhunmwuda ọnii nian, Jesu ọrọre Ogie Ohẹn ne ọ sẹe ne a gha ye enegbe mwa yan! Ọmwa ne ọ huanrẹn nọ, rẹn i mwẹ a baku ru ra orukhọ vbe obọ ẹre, a wannọ ẹn ye efẹn ọkpa hin ehe ne emwa orukhọ ye rre, a keghi vbe tọn ẹn mu yo sẹ a vbe ẹrinmwi.

Hibru 9:28

Erriọ vbe nọ zẹẹ, a keghi ya Kristi zọ ese uhukpa, ne ọ viọ orukhọ emwa ni bun gha rrie. Ọ gha ye vbe ya egbe ladian uhukpa, ẹ i ghi re ne ọ do guan ye ẹmwẹ orukhọ, sokpan ne Ọ do miẹn iran fan ighẹ avbe emwa ni mudia khẹ ọre.

I Pita 2:22

Ọ ma ru a i ghẹ ru, a ma vbe miẹn ọmwa ne ọ họẹn ẹmwẹ ohoghe ọkpa vbe unu ẹnrẹn.

I Jọn 3:5

Wa rẹnrẹn wẹ, te Kristi rre ne ọ miẹn ehe na do viọ orukhọ emwa gha rrie, kevbe wẹ, orukhọ i rre uwu irẹn.