Hibru 13:6 - Edo Bible (E Baibol Ẹdo) Version 1996

⁶ Rhunmwuda ọnii, wa gie ima din ne a kha wẹẹ, “Nọyaẹnmwa ọrọre ne ọ yọ mwẹ obọ, ohan ighi mu mwẹ. De emwi ne ọmwa gha sẹtin ru mwẹ re?”

Hibru 13:6 ပူးပေါင်းရင်းမြစ်များ

Gẹnẹsis 15:1

Vbe iyeke ọnọna, Ebram keghi miẹn umian, ọ na họn vbe Nọyaẹnmwa guẹe guan wẹẹ, “Ghẹ mu ohan Ebram, Mẹ ọ re asa ne ọ gha degue ruẹ I gha ruẹ ẹse nọkpọlọ ẹsẹse.”

I Ọba 17:8

Ẹre Nọyaẹnmwa na tama Elaija wẹẹ,

Psalm 124:8

Ehe ne Nọyaẹnmwa ye ọ re iyobọ mwa ke rre, rọẹn ọ re ọ yi ẹrinmwi kevbe agbọn.

Psalm 146:3

Wa ghẹ mu ẹtin yan ekaolotu emwa nagbọn; ọmwa nagbọn i ra sẹtin miẹn ruẹn fan.

Psalm 27:9

Ghẹ rhie egbe lẹre mẹ ghẹ muohu mwẹ, ghẹ khu ọguọmwadia ruẹ werriegbe, wẹ ọrọre ne ọ yọmwẹ obọ de ẹdẹ, ghẹ sẹ mwẹ rae, ghẹ fi iyeke gbe mwẹ, Osanobua ọmiọnmwafan mwẹ.

Psalm 33:20

Ma mu ẹtin mwa yan e Nọyaẹnmwa, rẹn ọrọre ne ọ degue mwa, kevbe ne ọ yi ima obọ.

Psalm 40:17

Ovbiogue kevbe nọ ma wegbe ọ re imẹ khin Nọyaẹnmwa. Sokpan, wẹ ma he mianmian mwẹ. Wẹ ọrọre ọmiọnmwafan mwẹ kevbe Osanobua mwẹ zẹgiẹgiẹ do yọmwẹ obọ.

Psalm 54:4

Sokpan, Osanobua ọrọre ne ọ yọmwẹ obọ, Nọyaẹnmwa ọrọre ne ọ gbinna mẹ.

Psalm 56:4

Mẹ mu ẹtin yan Osanobua ohan ighi mu mwẹ. Mẹ rho ẹre, rhunmwuda eyan ne irẹn yan rẹn, demwi ne ọmwa kẹkan gha sẹtin ru mwẹ re.

Psalm 63:7

Rhunmwuda, we ọ re ọ yọmwẹ obọ vbe ẹghẹ hia vbe ototọ aghọnghọn ifuẹn ruẹn ọ re I na so ihuan oghọghọ.

Psalm 94:17

Akpawẹ ẹ i re Nọyaẹnmwa ne ọ mudia mẹ te I gha ya ulẹ lao otọe iran ni rhie obọ nọ fu yan egbe.

Ẹksọdọs 18:4

Ọ kevbe kha wẹẹ, “Osanobua avbe erha mwẹ ọre ọ yọmwẹ obọ, ọ na miẹn mwẹ fan vba obọ umozo ọba Igipt”; ọre ọ na he ovbi ẹre ne okpia nọkpa Eliezẹ.)

Aizaia 41:10

Wa ghẹ fian afianma, I gu uwa rrọọ. Mẹ ọrọre Osanobua uwa, wa ghẹ gie emwikemwi mu uwa ohan. I gha ya uwa wegbe, I gha yi uwa obọ I gha degue uwa, I ghi miẹn uwa fan.

Aizaia 41:14

E Nọyaẹnmwa ke kha wẹẹ, “A gha rhe miẹn wẹ wa kanmwa, wa ma vbe wegbe Izrẹl, wa ghẹ mu ohan, I gha yi uwa obọ. Mẹ ne Osanobua nọhuanrẹn ọghe Izrẹl mẹ ọrọre ọmwa ne ọ miẹn uwa fan.

Matiu 10:28

Wa ghẹ mu ohan iran ni gbe ikinnegbe ne ẹ i sẹtin gbe orhiọn, sokpan wa mu ohan Osanobua ne ọ sẹtin fuẹn egbe kevbe orhiọn uan vbe ẹrinmwi nehianmwivin.

Ebe ne Pọl gbẹẹn gie emwa Rom 8:31

Ugbẹn vbe a ghi miẹn nian wẹ erriọ ọre emwi hia ye, vbe ima gha ghi kha hẹẹ? Deghẹ ma ọre Osanobua deba, de ọmwa ne ọ gha sẹtin mu aro da ima?

Ẹfisọs 3:12

Vbe uwu a ku egbe mwa gbe ba irẹn nẹ, kevbe rhunmwuda iyayi ne ima mwẹ vbe uwu irẹn, te ima ghi sẹtin sẹ odaro Osanobua nian vbe ne a i na fian afianma.

Diuteronomi 33:26

“Wa ne ivbi Izrẹl, ẹbọ ne ọ yevbe Osanobua uwa i rrọọ, ne ọ ye ose nọkhua hin fian iso rra, ọ na hin la okuku amẹ do ye uwa obọ.

Diuteronomi 33:29

Izrẹl, a miẹn uwa ne u ghi ye ọmwa ne ọ yevbe ruẹ i rrọọ, ẹvbo ne Nọyaẹnmwa miẹnfan. E Nọyaẹnmwa tobọ re ọrọre asa kevbe umozo ọwua ne ọ gha degue ruẹ do khọnmiotọ ne uẹn. Eghian uwa gha rre do rinmwian ye itohan, wẹ gha ye owẹ rrilo iran mu otọ.”

Hibru 10:19

Rhunmwuda ọnii, etẹn mwẹ, vbe ekpa uwu ne Jesu wu, a fan obọ ẹre ne ima nẹ nian, ne ima wa gha la uwu Ehe Ne ọ Huan Sẹẹ Ehia nii.

Hibru 4:16

Rhunmwuda ọnii, wa gie ima din khekherriọ, ne a gha die odaro ẹkete Osanobua, ehe ne ẹsọhẹ ye. Evba nii i ọre ima gha na miẹn itohan rhie kevbe ẹsọhẹ ne ọ gha yi ima obọ vbe ẹghẹ ne a na gualọe zẹẹ.

I Samuẹl 23:17

E Jonatan keghi tama rẹn wẹẹ, “Ghe gie ohan mu ẹẹn, e Sọl ne erha mwẹ i ra sẹtin ru uẹ emwirhọkpa, U gha rriọba vbe Izrẹl, mẹ ghi gha re ne ọ zẹ diake uwẹ zẹ vbene erha mwẹ tobọ ẹre wa vbe rẹn ẹsẹse.”