Hibru 11:32 - Edo Bible (E Baibol Ẹdo) Version 1996

³² Ne I ye gha kọ ẹre khian ra? Ẹghẹ i ghi sẹ mwẹ ya kpa itan ọghe Gidiọn, Barak, Samsin, Jẹfta, Devid, Samuẹl kevbe avbe akhasẹ.

Hibru 11:32 ပူးပေါင်းရင်းမြစ်များ

Psalm 99:6

Ohẹn ọnrẹn ọ re Mosis kevbe Errọn gha khin, e Samuẹl kevbe re ọmwa, ne ọ gha na erhunmwu ghe ẹre; iran kpe tie Nọyaẹnmwa.

Jerimaia 15:1

Ẹre Nọyaẹnmwa na tama mwẹ wẹẹ, “Ọ gha khọnrẹn ne a miẹn wẹ e Mosis kevbe Samuẹl ọ re ọ mudia vbe emwa na gha rinmwian mwẹ, I i sẹtin tohan emwa na hiehiere. Wẹ ne iran ladian, wẹ ne iran kpao hin odaro mwẹ rre.

Matiu 5:12

Wa gha ghọghọ, wa gie ẹko gha sẹ uwa ọyẹnmwẹ rhunmwuda, ere nọkhua ọre ọ rre otọ khẹ uwa vbe ẹrinmwi. Erriọ zẹe emwa vbe ya obọ dan mu avbe akhasẹ ni ke odaro ne uwa.

Iyẹn ne ọ Maan Ọghe Luk 13:28

Eve kevbe irriakọn nọkhua khian gha nọ vbe uwẹ a ya bẹghe Ebraham, Aizik, kevbe Jekọb deba avbe akhasẹ hia vbe Arriọba Osanobua, vberriọ, a sẹ uwẹ rae ye ore.

Iyẹn ne ọ Maan Ọghe Luk 16:31

Sokpan Ebraham wanniẹn wẹẹ, ‘Deghẹ iran ma rhie ẹmwẹ ne Mosis kevbe avbe akhasẹ ta, ọmwa gha rhe rhiọrre vbe orinmwi ya gu iran guan, iran i vbe rhie.’ ”

Iyẹn ne ọ Maan Ọghe Jọn 21:25

Emwi ọvbehe wa ye bun ne Jesu ru. Akpawẹ te a gbẹnnẹ ehia ye otọ ọkpọkpa, mẹ ma yayi ighẹ agbọn na hia gha gua ebe ne a gbẹnnẹ ọẹn yi.

Iwinna 10:43

Avbe akhasẹ hia ta ẹmwẹ ọnrẹn wẹ ọmwaikọmwa ne ọ rhirhi a yae yi, a gha ya orukhọ ẹre hia bọ ẹe la ekpa ẹtin eni ẹnrẹn.”

Iwinna 13:20

Ọ kegha yerriọ vbe omwa ukpo ekigbesiyeha yan uri eva (450). “Vbe iyeke ọnii, ọ keghi viọ ni bu ohiẹn ne iran ọ te do sẹ ẹghẹ Samuẹl ne akhasẹ.

Iwinna 3:24

Avbe akhasẹ hia, ya sẹ egbe Samuẹl, kevbe iran ni rre vbe iyeke ẹre, ne ọ ghi mwẹ ẹmwẹ ne ọ ra ta nẹ, te iran hia ta ẹmwẹ ẹghẹ ne a ye na ye otọ.

Ebe ne Pọl gbẹẹn gie emwa Rom 3:5

Sokpan a deghẹ a ghi miẹn wẹ emwi ne ima baku ru ọre ọ zẹẹ ighẹ a rẹn vbene Osanobua ru emwi ẹse hẹ vbo? Vbe ima gha ghi kha hẹ? Wẹ Osanobua ma ru ẹe ẹse vbe ọ gha rri ima oya? (Vbene emwa ne agbọn guan ọre I guan na.)

Ebe ne Pọl gbẹẹn gie emwa Rom 4:1

Vbe ima gha kha hẹ khekherriọ vbe ekpa ọghe Ebraham ne erha mwa odede? Vbekpa emwi ne ọ sunu vbe egbe ẹre.

Ebe ne Pọl gbẹẹn gie emwa Rom 6:1

Vbe ima ghẹ ghi kha hẹ yi khekherriọ. Te ima ghẹ ghi gha kakabọ ru orukhọ yọ ra ne ẹse ọhẹ Osanobua miẹn ehe na gha muan yọ?

Ebe ne Pọl gbẹẹn gie emwa Rom 7:7

Vbe a ghẹ ghi ta ẹ hẹ yi khekherriọ? We nene Uhi tobọ ẹre ighẹ emwi orukhọ nọ ra? Hiehie re. sokpan nene Uhi ọre ọ ma mwẹ emwi ne ọ re orukhọ, rhunmwuda mẹ i ghẹ te rẹn emwi ne ọ re a ya aro ye emwi ẹrrẹ, akpawẹ nene Uhi ma kha wẹẹ, “Ghẹ ye aro ye emwi ẹrrẹe.”

Jems 5:10

Etẹn mwẹ, wa ye avbe akhasẹ, ni ya eni Nọyaẹnmwa guan rre. Wa ye iran ru ne a ghe ru vbene a ziengbe oya hẹẹ.

II Pita 1:21

Rhunmwuda, ẹmwẹ avbe akhasẹ hia, ọkpa i rrọọ ne a tae zẹ vbe iho ọghe ọmwa kẹkan, sokpan te a gha dia ọmwa khian vbe ekpa Orhiọn Ne ọ huanrẹn, vbe uwu ehe ne iran na ta ẹmwẹ ne ọ ke ehe ne Osanobua ye rre.

II Pita 3:2

I ho ne uwa ye avbe ẹmwẹ ne avbe akhasẹ tae ẹghẹ ne ọ kpẹe fua kevbe avbe iyi ni ke obọ Nọyaẹnmwa kevbe Ọmiọnmwafan mwa rre, zẹ vbene a vbe ukọ tae ma uwa.

Giọgis 13:24

Okhuo nii keghi biẹ ọmọ okpia, ọ na gha tie ẹre Samsin. Ọmọ nii keghi wan, e Nọyaẹnmwa na fiangbe ẹe.

Giọgis 15:20

E Samsin keghi su Izrẹl la ukpo ugie vbe avbe emwa Filistia kha yan iran.

Giọgis 4:1

Ehud ghi wu nẹ ivbi Izrẹl na vbe dọlegbe ru orukhọ ghe Nọyaẹnmwa.

Giọgis 6:1

Ivbi Izrẹl keghi ru orukhọ ghe e Nọyaẹnmwa, rhunmwuda ọnii, rẹn keghi gie emwa Midian gha khaemwisẹ yan iran la ukpo ihinrọn.

Giọgis 6:11

Ẹre odibo e Nọyaẹnmwa na do tota ye ototọ okan ne ọ rre igue ne a tie ẹre Ọfra ne ọ re ọghe Joas ne ovbi ẹwae Abiẹzẹ. Ovbi ẹre ighẹ Gidiọn kegha hẹko do khuọn ọka vbe okọ ne a na minọ ayọn ne emwa Midian i ghẹ bẹghe ẹre.

Giọgis 6:14

E Nọyaẹnmwa keghi tama rẹn wẹẹ, “Ye ẹtin ne u mwẹ hia gha khian ne u ya wọlọ ivbi Izrẹl hin obọ ivbi Midian rre. Mẹ tobọ mwẹ ọ re ọ gie ọ.”

I Samuẹl 1:20

Erriọ a miẹn ọẹn wẹ, ọ keghi hanmwa, ọ na biẹ ọmọ okpia. Ọ keghi he ẹre Samuẹl. Ọ wẹẹ, “Obọ e Nọyaẹnmwa ọre I na nọ rẹn.”

I Samuẹl 12:11

E Nọyaẹnmwa keghi gie Gidiọn, e Barak, e Jẹfta kevbe imẹ vbe okiekie ehia, iran ni wọlọ uwa hin obọ eghian uwa rre, wa na do gha rrọ vbe a i mwẹ ẹbe.

I Samuẹl 16:1

E Nọyaẹnmwa keghi tama e Samuẹl wẹẹ, “Inu ẹghẹ u ra khiẹ e Sọl la yi? Mẹ rhie ẹre hin ọba Izrẹl rre nẹ. Gualọ ẹvbi ọliv eso rhie mwẹ obọ. I gha gie uẹ gha rrie ọghe Jese ne ọ rre Bẹtlẹhẹm, rhunmwuda, I zẹ ọkpa vbe uwu ivbi ẹre nẹ ne ọ rriọba.”

I Samuẹl 16:13

E Samuẹl keghi mu ẹvbi ọliv nii, ọ keghi sirra etiọnrẹn hia nọnọ ori ye ọre uhunmwu. Orhiọn Nọyaẹnmwa na hin yan e Devid vbe ọwarọkpa nii, ọ na vbe guẹe gha rrọ ke ẹghẹ nii kpao. Ẹre Samuẹl na gha rrie Rama.

I Samuẹl 17:45

E Devid keghi wanniẹn wẹẹ, “Te uwẹ bu imẹ dee nian, ke uwẹ kevbe umozo, asoro kevbe ogala, sokpan, mẹ bu ruẹ dee vbe eni e Nọyaẹnmwa ne Udazi, ne ọ re Osanobua ivbiyokuo Izrẹl, ne uwẹ fara.

I Samuẹl 2:11

Ẹre Ẹlkana na werriegbe gha rrie Rama, sokpan, ọmọ okpia nii keghi tota vbe Silo, ọ kegha ga e Nọyaẹnmwa vbe ototọ Elai ne Ohẹn.

I Samuẹl 2:18

E Samuẹl ne ọmọ okpia nii, kegha ga e Nọyaẹnmwa vbe Siailo, ọ ghi mu adaghọ eto ovbiohuẹ rhuan.

I Samuẹl 2:4

A bunnọ uhanbọ ivbiyokuo ni wo, sokpan, nọma wegbe kegha wo yọ.