Giọgis 8:5 - Edo Bible (E Baibol Ẹdo) Version 1996

⁵ Ọ ghi sẹ Sukọt, rẹn keghi tama ivbi e Sukọt, wẹẹ, “Wa lahọ, wa viọ ebrẹd eso ne emwa mwẹ rhunmwuda egbe wọ iran nẹ, te I khu e Zẹba kevbe Zalmuna ne avbe ọba Midian khian.”

Giọgis 8:5 ပူးပေါင်းရင်းမြစ်များ

Gẹnẹsis 14:18

E Mẹlkizẹdẹk ne ọba Salẹm kevbe ne ọ vbe re ohẹn ọghe Osanobua Nọyosẹ keghi viọ ebrẹd kevbe ayọn gie Ebram,

Gẹnẹsis 33:17

Sokpan e Jekọb kegha rrie Sukọt ehe ne ọ na ya bọlọ owa ne egbe ẹre kevbe irhu ne avbe emwirri ẹre. Ọnii ọ siẹe ne a na tie evba nii Sukọt.

Psalm 60:6

Osanobua guan ke uwu ehe ne ọ huanrẹn ọghọe rre wẹẹ, “Vbe uwu akhọnmiotọ I gha ghae Siẹkẹm I gha vbe ghae Iya e Sukọt ne iran ne emwa mwẹ.

Diuteronomi 23:4

“Ẹghẹ ne uwa na gha kpao vbe Igipt rre, iran ma rhie evbare ne uwa, iran ma sa amẹ ne uwa wọn, iran ke ya tie Balam ne ovbi Beọ ne ovbi Petọ ne Mẹsopotamia rre ne ọ do fi uwa unu.

Giọgis 5:23

Erriọ odibo e Nọyaẹnmwa khare, “Wa fi e Mẹrẹz unu. ihẹn, ihẹn vbe uhunmwu iran ni rre evba. Iran ma ye Nọyaẹnmwa obọ, iran ma rre vbe ivbi iyokuo gbinna ne ẹẹn.

Giọgis 8:10

E Zẹba kevbe Zalmuna kegha rre Kakọ, iran kevbe ivbi iyokuo iran. Vbe uwu ivbi iyokuo ẹwae ni ke ato rre, arriaisẹn ekesugie (15,000) ọre ọ ghi ke ẹe, a gbele arriaisẹn iyehan (120,000) vbe uwu iran.

Giọgis 8:12

Avbe ọba Midian eva nii, e Zẹba kevbe Zalmuna, keghi lẹ kua, sokpan rẹn keghi khu iran ọ na munọ iran. Ọ na fian otighi fi ivbi iyokuo iran egbe.

Giọgis 8:15

Ẹre Gidiọn na bu emwa Sukọt, ọ na khama iran wẹẹ, “Wa ye rre ẹghẹ ne uwa na yagha mwẹ! Wa na tama mwẹ wẹ, wa i rhie evbare ne avbe ivbi iyokuo mwẹ ne egbe wọ nẹ rhunmwuda obọ mwẹ ma he vba Zẹba kevbe Zalmuna. Banbanna nian, wa ghe iran!”

I Samuẹl 25:18

Abigẹl keghi zẹgiẹgiẹ viọ ududu ebrẹd uri, ẹkpo ohian ayọn eva ohuan ne a ranmwẹ isẹn, ititi ọmọ azara ne a ka re iyisẹn, ududu ọmọ ohọ ne a ka re uri, ọ na kuẹn ehia yan ekẹtẹkẹtẹ.