Giọgis 3:10 - Edo Bible (E Baibol Ẹdo) Version 1996

¹⁰ Orhiọn e Nọyaẹnmwa keghi hin yan ẹnrẹn, ọ keghi gha re ọkaolotu Izrẹl. Otniẹl kegha rrie okuo, e Nọyaẹnmwa keghi gie ẹe khọn ọba Mẹsopotamia miotọ.

Giọgis 3:10 ပူးပေါင်းရင်းမြစ်များ

I Krọnikol 12:18

Orhiọn Osanobua keghi hin yan ọkpa vbọ, Amasai ne ọ ghi khian ọkaolotu nọkhua ọghe “Iran ne Ọgban” ọ keghi wẹẹ, “E Devid ne ovbi e Jese, otu ruẹ ma ye Ọ dunna ẹn ọ re ọwuẹ kevbe iran ni yuọ obọ Wẹ ọ re Osanobua yaba.” E Devid keghi rhan obọ miẹn iran, ọ na viọ iran ye ukpo vbe ivbiyokuo ẹre.

II Krọnikol 15:1

Orhiọn e Nọyaẹnmwa keghi tuorre yan Azaraia ne ovbi Odẹd.

II Krọnikol 20:14

Orhiọn e Nọyaẹnmwa keghi hin yan e Livai ọkpa vbe uwu ẹbu nii, a tie eni ẹnrẹn Jahaziẹl ne ovbi e Zẹkaraia, ovbi ẹwae Asaf nọ, uniẹn ọghe Matanaia, Jeiẹl kevbe Benaia nọ vbe obọ ọghe Asaf.

Psalm 51:11

Ghẹ kan mwẹ fua hin ehe ne u ye rre ghẹ vbe miẹn mwẹ orhiọn ne ọ huanrẹn ruẹn.

Nọmbas 11:17

I gha tuorre do guẹ guan vbe evba, I gha rhie vbe orhiọn ne I rhie ne uwẹ nẹ, I ghi rhie ne iran. Ẹghẹ nii iran ghi gha ru iyobọ ne uẹn ya gha gbe aro ghe avbe emwa na, ne ọ ghẹ ghi gha re wẹ wẹ ọkpa ọ re ọ mu uhunmwu da ẹre.”

Nọmbas 11:25

E Nọyaẹnmwa keghi la okuku tuorre do gu e Mosis guan. Ọ keghi rhie vbe ẹtin ne ọ rhie ne Mosis nẹ, ọ na rhie ne avbe arhin ekigbe siyenẹ ni re ekaolotu nii. Ugbẹn vbe orhiọn nii ghi tuorre yan iran, iran kegha vannọ sokpan zẹ vbe avbe akhasẹ, ọ ma ghi kpẹe ọ keghi dobọyi.

Nọmbas 11:29

E Mosis keghi wanniẹn wẹẹ, “Ohanmwẹ i to uwẹ ra? Ọ gha wa ye mwẹ akpawẹ e Nọyaẹnmwa gha rhie orhiọn na ne emwa rẹn hia ne iran hia gha guan zẹ vbe akhasẹ.”

Nọmbas 24:2

Ọ na bẹghe ivbi Izrẹl vbe ehe ne dọmwadẹ ẹwae na bu agọ. Orhiọn Osanobua ke hin yan rẹn.

Nọmbas 27:18

E Nọyaẹnmwa keghi tama e Mosis wẹẹ, “Rhie Jọsua ne ovbi e Nọn, okpia ne ọ sẹ ihe ne u viọ obọ ruẹ yan ẹre uhunmwu.

Hibru 6:4

Rhunmwuda, vbe a ra ya viọ iran ni dele hin iyayi rre dọlegbe gha dee hẹ yi, ne iran do ro iro fi ekhọe werriẹ? Iran ka gha rre uwu uwanmwẹ Osanobua vbe ẹghẹ ọkpa yi. Iran danmwẹ ghe vbe ọhẹ ọghe ẹrinmwi, iran keghi vbe ghae vbe Orhiọn Ne Ọ Huanrẹn.

Giọgis 11:29

Ẹre orhiọn e Nọyaẹnmwa na hin yan Jẹfta. Ọ keghi la Giliad ya sẹ Manasẹ, ọ na vbe werriegbe gha die Mizpa, vbe Giliad. Ọ na ke evba gha rrie Amọn.

Giọgis 11:32

Ẹre Jẹfta na fian ẹzẹ rra ne ọ ya gu emwa Amọn gbinna. E Nọyaẹnmwa keghi rhie akhọnmiotọ nẹ ẹn.

Giọgis 13:25

Orhiọn ọghe Nọyaẹnmwa kegha tuorre yan rẹn vbe ọ rre agọ ọghe Dan vbe ẹkpo Zora kevbe Estao.

Giọgis 14:19

Ẹre orhiọn e Nọyaẹnmwa na rhie ẹtin ye Samsin iwu, rẹn na gha rhie Askẹlọn. Ọ keghi gbele ikpia ọgban vbe evba, ọ na fu iran emwi viọ, ọ na viọ ukpọn iran ni mose ne emwa ni san ibo ẹre. Rẹn na ghi ya ohu guọn mwẹ egbe gha rrie ba ẹmwẹ emwi ne ọ sunu.

Giọgis 14:6

Sokpan orhiọn e Nọyaẹnmwa keghi rhie ẹtin ye Samsin iwu. Rẹn keghi ye obọ kẹkan yanghan ovbi oduma nii ye eva vbe ne a miẹn wẹ ovbi ẹwe nọ. Sokpan, ọ ma ta emwi ne irẹn ru ma erha ẹe ra iye ẹe.

Giọgis 15:14

Ọ ghi sẹ Lẹhi, ivbi e Filistia keghi wa gha vẹ bu ẹre dee, iran kegha go yan rẹn. Orhiọn e Nọyaẹnmwa keghi rhie ẹtin ne ẹẹn, ọ keghi giagia irri ne a ya gbalọ ẹre obọ gbalọ ẹre owẹ kua vbene a gha kha wẹ oru ne erhẹn giẹnrẹn ọ re nọ.

Giọgis 3:11

Ọfumwegbe kegha rre otọe ni la ukpo iyeva, ẹre Otniẹl ne ovbi Keniz ghi na wu.

Giọgis 3:8

Rhunmwuda ọnii, ohu Izrẹl kegha mu e Nọyaẹnmwa, ọ na gie Kusian Risiatem ne ọba Mẹsopotamia khọn iran miotọ. Iran keghi ya ukpo erẹnrẹn gha rre ototọ asẹ ọre.

Giọgis 6:34

Orhiọn e Nọyaẹnmwa keghi hin yan Gidiọn, ọ keghi si orhu ya tie emwa ẹwae Abiẹzẹ wẹ ne iran lele irẹn.

I Samuẹl 10:10

E Sọl kevbe ọguọmwadia ẹre ghi sẹ Gibea, otu akhasẹ ọkpa keghi do vba ẹre. Orhiọn Osanobua keghi hin yan rẹn udomwurri ọ na deba iran gha kuu, ọ kevbe gha go.

I Samuẹl 10:6

Orhiọn Osanobua gha hin yan ruẹn, u ghi deba iran gha ku, u ghi vbe gha go, u ghi gha ru vbe ọmwa ughaẹn fẹẹrẹ.

I Samuẹl 11:6

E Sọl ghi họn ẹmwẹ na, orhiọn Osanobua na hin yan rẹn, ohu nọkhua keghi mu ẹẹn.

I Samuẹl 16:13

E Samuẹl keghi mu ẹvbi ọliv nii, ọ keghi sirra etiọnrẹn hia nọnọ ori ye ọre uhunmwu. Orhiọn Nọyaẹnmwa na hin yan e Devid vbe ọwarọkpa nii, ọ na vbe guẹe gha rrọ ke ẹghẹ nii kpao. Ẹre Samuẹl na gha rrie Rama.