Giọgis 19:16 - Edo Bible (E Baibol Ẹdo) Version 1996

¹⁶ Vbe ẹghẹ ne a kha na, ediọnmwa ọkpa kegha dee, ọ winna iwinna ẹdẹ hoho nẹ vbe ugbo. Ẹvbo oke Ifreim ọ re ọ ke rre vbe okaro, sokpan Gibea ọ re irẹn ghi yin. (E Bẹnjamin ọre emwa ni rre evba ke rre.)

Giọgis 19:16 ပူးပေါင်းရင်းမြစ်များ

Gẹnẹsis 3:19

Te ọfọ gha fọọ ne u ya miẹn ẹsọn ne otọ miẹn ehe na mọ ọmọ ladian, u te dọlegbe ghe ekẹn ne a ya ma an, ekẹn nii u gha vbe dọlegbe khian.”

Psalm 104:23

Ẹghẹ nii, emwa ghi ladian ne iran ya winna iwinna iran, iran ghi gha winna rhinrin ọ te sẹ ota.

Psalm 128:2

Iwinna ruẹn gha rhie emwi ne u gha re nuẹn, ẹko gha rhiẹnrhiẹn ọn, agbọn gha vbe ma ruẹn.

Itan 13:11

Ẹfe ne ọ ma sọn ọ sẹ ọmwa obọ, ẹ i vbe sọn ọ kpao sẹ ọmwa rae, vbene ọ ya lọghọ a ke miẹn ọẹn, erriọ ọ re ọ vbe ya di ọmwa obọ ya.

Itan 14:23

Gha winna, u gha vbe khuan okhuan ẹdẹ ruẹ, adeghẹ te u tota gbe ọta khian, u gha khian ovbiogue.

Itan 24:27

Ghẹ bọ owa ruẹ ne u zọ urho ladian, vbe ẹ i re te ugbo ruẹ de mudia nẹ, aro ruẹ na vbe da ẹe ighe u gha sẹtin gha miẹn evbare unu.

Asan-Ibo 1:13

I keghi wa yan tae, I keghi vbe mu aro yọ wẹ, I gha gualotọ emwi hia ne a ru vbe agbọn na. Agbọn usẹ ọ re Osanobua mwamwa ne ima.

Asan-Ibo 5:12

Ọmwa ne ọ winna sẹtin miẹn evbare gha re, ugbẹnso, ẹ i vbe miẹn re. Vbene ọ rhirhi a gha ye hẹ, asọn gha rre ọ ghi miẹn ovbe vbiẹ khuẹrhẹ. Sokpan, emwi ne ọmwa ne ọ fe mwẹ bun sẹrriọ wẹ afianma ighi gie ẹe miẹn ovbe vbiẹ.

Hozia 9:9

Emwi ne iran ru i zẹdẹ maa hiehiere, zẹ vbene iran gha ye vbe Gibea. Osanobua gha ye orukhọ iran rre, ọ ghi rri iran oya yọ.

Ẹfisọs 4:28

Ọmwa ne ọ te ka rha yi, wẹ ne ọ dobọ oyi ne a rha yi, ne ọ suẹn gha winna, ne ọ miẹn ehe na gha khuan okhuan ne ai gbe ikhan yi ọghe obọ ẹre, kevbe ne ọ sẹtin vbe gha ye ne ẹ i mwẹ obọ.

II Tẹsalonaika 3:10

Ẹghẹ ne ima na gha rre ehe ne uwa ye, ma ta ẹe ma uwa wẹ, “Ọmwa ne ọ ma ho ne ọ winna, a ghẹ gi ẹe rri evbare.”

Giọgis 19:1

Vbe ẹghẹ nii, ẹkpo ne Izrẹl i na mwẹ ọba, e Livai ọkpa kegha rrọ vbe odẹ ehe ne ẹvbo oke ọghe Ifreim sẹe fẹẹrẹ, ọ keghi ya zẹ ọse ọkpa vbe Bẹtlẹhẹm ne Juda.

Giọgis 19:14

Ẹre iran na gberra Jebus, iran na gha khian. Owẹn ghi ra defua iran na sẹ Gibea. Ewae Bẹnjamin iran ni rre evba ke rre.

Giọgis 19:15

Iran keghi van obọ lele odẹ nii ne iran ya gbe asọn nii vbe evba. E Livai keghi ya tota ye adesẹ ughe ẹvbo na, sokpan a ma miẹn ọmwa ne ọ viọ iran la owa ne iran ya gbe asọn nii vbe evba.

Giọgis 19:17

Ediọnmwa keghi bẹghe avbe ekhẹn na vbe adesẹ ughe, ọ keghi nọ iran wẹẹ, “Vbe uwa ke dee? Vbe uwa rrie?”