Giọgis 17:10 - Edo Bible (E Baibol Ẹdo) Version 1996

¹⁰ E Maika keghi kha wẹẹ, “Tota ke mwẹ, gha re ne ọ gunmwẹ zẹ iro kevbe ohẹn, I gha ha ruẹ igho erọnmwọ igbe vbe ukpo kevbe ukpọn eso deba evbare ruẹ.”

Giọgis 17:10 ပူးပေါင်းရင်းမြစ်များ

Gẹnẹsis 45:8

Rhunmwuda ọnii, ẹ i re uwa ọre ọ gie mwẹ gha die edinran sokpan Osanobua nọ. Ọ keghi ya mwẹ ru zẹ vbe ihe erha ne ọba, mẹ ọ re ọ gbearoghe ẹvbo ẹre hia kevbe ne ọ khaemwisẹ yan Igipt hia.”

II Ọba 13:14

Elaisia ne akhasẹ kegha khuọnmwi obọ kegha da ẹe ẹsẹse, ọ ghi lovbiẹ vbe ọ ghi ra kpan udu, e Jehoas ne ọba Izrẹl kegha khian ya tuẹ ọe. Ugbẹn vbe ọ ghi viẹ ọ keghi kha wẹẹ, “Erha mwẹ ne erha, wẹ ọrọre ọwegbe ne ọ tan obọ gue Izrẹl.”

II Ọba 2:12

Elaisia bẹghe ẹre, ọ na datu tie Elaija wẹẹ, “Erha mwẹ, erha mwẹ! Ọwogbe ne ọ gbinna ne Izrẹl! U rriei!” Ọ ma ghi dọlegbe miẹn Elaija ọvbehe. Elaisia keghi ye akhiẹ sọ agbada ẹwu ẹre ye ihe eva.

II Ọba 6:21

Ọba Izrẹl ghi miẹn ivbi e Siria na, ọ ke nọ Elaisia wẹẹ, “Enọwanrẹn, ne I gbele iran an ra? Ne I gbele iran an?”

Job 29:16

I keghi mudia ye ihe erha ne ivbiogue, I na gha mu ẹzọ orhunmwuyẹn ne ẹ i mwẹ evbare gui.

Aizaia 22:21

I ghi viọ ẹwu kevbe ugbẹkun irriegie ruẹ ne ẹẹn, I ghi vbe mu asẹ hia ne uwẹ te ka gha mwẹ ne ẹẹn. Rẹn ghi do yevbe erha ne emwa hia ni rre Jerusalẹm kevbe Juda.

Ezikiẹl 13:19

Wa sirra emwa mwẹ yagha mwẹ ne iran miẹn ehe na zẹ uguobọ ọka eso ne uwa, ne iran vbe viọ iku ebrẹd eso ne uwa. Wa gbele avbe emwa ne uwu ma khẹ ke, emwa ni ma khẹke ne iran gha rre agbọn, wa ghi sẹ iran rae. Erriọ wa ya ta ohoghe ma emwa mwẹ, iran ghi vbe gha rhie ẹmwẹ uwa.”

Matiu 26:15

Ọ tama iran wẹẹ, “I gha rhie Jesu ye uwa obọ, de emwi ne uwa gha rhie mẹ?” Iran keghi ka agiẹghẹ igho ẹrọnmwọ ọgban hẹ ye orre obọ.

Iyẹn ne ọ Maan Ọghe Jọn 12:6

Ọ ta ẹmwẹ na ẹ i re rhunmwuda ighẹ ọ mwẹ ẹnina ivbiogue vbe ekhọe, sokpan rhunmwuda ighẹ oyi nọ, rẹn ọ mu ẹkpo igho mwẹ, ọ ghi gha duẹe hẹ ya ru enegbe ẹre.

I Timoti 6:10

Rhunmwuda aho ẹmwẹ igho ọre emwi dan ughughan ke zọ ladian. Ẹmwẹ ne a gha mwẹ ọnrẹn mu emwa eso sẹrriọ wẹ, te iran ghi fi iyeke gbe iyayi, iran keghi ya akhiẹ ni bun guọghọ ekhọe iran uan.

I Pita 5:2

Wa gha re Ọsuohuan avbe oghẹn ohuan ne Osanobua viọ ne uwa, wa gha ye aho ne ọ ke uwu ekhọe rre gbe aro ghe iran, vbene Osanobua ho ne uwa gha ru ẹe, ẹ i re ne a gbe omaro omaro ru. U ghi gha winna iwinna ruẹn, ẹ i re rhunmwuda ne a miẹn ehe na ha ruẹ osa kẹkan, sokpan aho ne a winna ne ọ ke ekhọe rre.

Giọgis 17:11

Igbama e Livai na keghi kue yọ ne ọ tota ke Maika ne ọ vbe gha ye vbe ọmọ nẹ ẹn.

Giọgis 17:9

E Maika keghi nọ rẹn wẹẹ, “Vbe u a ke rre?” Rẹn keghi wanniẹn wẹẹ, “E Livai ne ọ ke Bẹtlẹhẹm ne ọ rre Juda rre ọ re I khin, ehe ne I gha dia ọ re I gualọ.”

Giọgis 18:4

Rẹn keghi wanniẹn tama iran wẹẹ, “Mẹ vbe Maika guan kugbe nẹ, te imẹ winna ne ẹẹn zẹ vbe ohẹn, ọ vbe ha mwẹ osa.”

I Samuẹl 2:36

Iran ni ghi miẹn uhunmwu vbe avbe ivbi uẹ, iran ghi ya gha nọ ohẹn igho kevbe evbare, iran ghi vbe rinmwian ne a gie iran gha ye avbe ohẹn obọ ne iran ma kue miẹn evbare unu gha re.”