Giọgis 11:39 - Edo Bible (E Baibol Ẹdo) Version 1996

³⁹ Uki eva ghi gba nẹ, rẹn keghi dọlegbe bu erha ẹe gha dee. Rẹn keghi ru vbene ọ yan ma e Nọyaẹnmwa. Ọmọ okhuo nii keghi wu ye uvbi ne ọ ma rẹn okpia. Erriọ ọ re ọ ya suẹn vbe Izrẹl ne a na miẹn wẹẹ,

Giọgis 11:39 ပူးပေါင်းရင်းမြစ်များ

II Krọnikol 35:25

E Jerimaia ne akhasẹ vbe gbẹn ihuan ya viẹ e Josaia ne ọba. Ihuan na ọ re iran ni so ihuan, ikpia kevbe ikhuo ghi ya khiẹ ọre vbe iran a gha khiẹ ọre. Te ọ ghi do khian iyi otọ ne iran gha ru ẹe vberriọ. Ihuan na rre usun avbe ihuan akhiẹ ne a si koko.

Aizaia 66:3

Vbene ọ yẹ avbe emwa ni ọ re iran ru. A deghẹ ẹkhuia ẹmila ọ re iran ya zọ ese ra ọmwa nagbọn nọ, ọkpa ehia khin vbe aro iran. Adeghẹ oteghe ohuan ọ re iran ya zọ ese ra ekita ọ re iran bun ẹnrẹn ẹyaẹn; adeghẹ ọka ọ re iran do ya yo imuohan, adeghẹ eturari ọ re iran ya yo imuohan ra te iran gha na erhunmwu ghe amazẹ; ọkpa ehia khin vbe aro iran. Te ugamwẹ ne ọ sọnnọ ne iran ru wa yẹ iran.

Diuteronomi 12:31

Wa ghẹ ga e Nọyaẹnmwa Osanobua rua vbene iran ya gho ẹbọ iran, rhunmwuda, iran gha gho ẹbọ iran, iran ghi ru emwi osọnnọ hia ne ọ sọnnọ e Nọyaẹnmwa. Uhin ighẹ te iran ya ivbi iran zọ ese vbe uhunmwu aka iran.

Giọgis 11:31

I gha ke okuo nii dee, ọmwaikọmwa ne ọ ka ke owa mwẹ ladian do khian vba mwẹ, I gha giẹn ọnrẹn uan ya zọ ese nuẹn.”

Giọgis 11:38

Rẹn keghi tama rẹn ne ọ gha khian, ọ keghi gie ẹe gha khian vbe uki eva. Ke irẹn kevbe avbe esiọre kegha rrie uhunmwu oke, iran keghi ya khiẹ rhunmwuda, uvbi ne ọ ma rẹn okpia ọre ọ ra wu yi.

Giọgis 11:40

ukpukpo ọ re ikhuo vbe Izrẹl ya gha gbe ikpẹdẹ enẹ vbe uhunmwu oke gha khiẹ ne ovbi e Jẹfta ne ovbi Giliad.

I Samuẹl 1:11

E Hanna keghi ye ekhọe kekhọe ru eyan wẹẹ, “Oghodua Nọyaẹnmwa, ghe mwẹ, mẹ ne ọguọmwadia ruẹ. Ghe ukpokpo ne I mwẹ, ne u ye mwẹ rre. A deghẹ u rhie ọmọ okpia mẹ, I yan rẹn ighẹ I gha yae fi ohan nuẹn ne ọ gha re ọwuẹ vbe ẹdẹ agbọn rẹn hia, ẹ i ra vbe gbe eto ẹre.”

I Samuẹl 1:22

Sokpan, e Hanna ma yo. Ọ keghi tama ọdọ ẹre wẹẹ, “Ọmọ na gha ghi wa fian ewẹn nẹ, I ghi rhie ẹre gha rrie owa Osanobua, ọ ghi ya gha rre evba vbe ẹdẹ agbọn rẹn hia.”

I Samuẹl 1:24

Ugbẹn vbe ọ ghi fian ẹre ewẹn nẹ, ọ keghi rhie ẹre gha rrie Siailo, ọ keghi mu ẹkhuia ẹmila ne ọ rre ukpo eha mwẹ kevbe ọduẹki irhuarhua kevbe ọgọ ohian ayọn ọkpa vbene ọ ru ọvbokhan sẹ nii, ọ keghi rhie ẹre gha rrie owa e Nọyaẹnmwa vbe Siailo.

I Samuẹl 1:28

Rhunmwuda ọnii, te imẹ ghi ra ya ẹe fi ohan ne Nọyaẹnmwa. Ẹghẹ ne ọ rhirhi ya vbe agbọn, ọ ghe Nọyaẹnmwa rẹn khian gha khin.” Ẹre iran na ga e Nọyaẹnmwa vbe evba.

I Samuẹl 2:18

E Samuẹl ne ọmọ okpia nii, kegha ga e Nọyaẹnmwa vbe Siailo, ọ ghi mu adaghọ eto ovbiohuẹ rhuan.