Gẹnẹsis 8:21 - Edo Bible (E Baibol Ẹdo) Version 1996

²¹ Uwinhinmwẹ ọnrẹn keghi yẹ Nọyaẹnmwa, ọ keghi tae wẹẹ, “Mẹ i ghi dọlegbe fi agbọn unu rhunmwuda uyinmwẹ emwa nagbọn, mẹ rẹnrẹn wẹ ke ẹghẹ ọvbokhan rẹn kpao, iro dan ọre ọ rre ekhọe ẹre, Mẹ i ghi dọlegbe fuẹn emwi hia, zẹ vbene I ruẹe ẹdẹnẹrẹ.

Gẹnẹsis 8:21 ပူးပေါင်းရင်းမြစ်များ

Gẹnẹsis 3:17

Rẹn keghi tama okpia nii wẹẹ, “Wẹ ke danmwehọ ọvbokhan-an, u na rri ọmọ erhan ne I wẹ ne u ghẹ re. Rhunmwuda emwi ne u ru na, otọ gha khian ne a fi ẹre unu. Ẹsọn u gha ya ẹdagbọn ruẹn hia miẹn, ne ọ miẹn ehe na mọ ọmọ ne ọ gha suẹ re.

Gẹnẹsis 4:12

U gha mu ugbo, u na kọ emwi yọ, otọe, ẹi gha ma ẹnrẹn. Ehevbehevbe ke enọkpolugho ọre u gha khian vbe agbọn.”

Gẹnẹsis 5:29

ọ na kha wẹẹ, “Ọmọ na gha do fan mwa vbe obọ ẹsọn vbe otọe nii ne Nọyaẹnmwa ye amunu na.” Ọ keghi he ẹre Noa,

Gẹnẹsis 6:13

Osanobua keghi tama Noa wẹẹ, “I tae nẹ ighẹ I ra fuẹn emwa fo. I ra wa fuẹn ehia a fẹfẹẹfẹ, rhunmwuda, agbọn vuọn ne uyimwẹ ika ne iran yin.

Gẹnẹsis 6:17

I ra gie uromwẹ amẹ rrie agbọn ne ọ fuẹn emwi ni rrọọ hia. Emwi hia ni rre agbọn gha wulo,

Gẹnẹsis 6:5

Ugbẹn vbe Nọyaẹnmwa ghi miẹn wẹ emwi dan wa gba emwa hia obọ vbe ehe hia kevbe wẹ, iro dan ọkpa ọre ọ wa rre iran ekhọe vbe ẹghẹ hia,

Gẹnẹsis 6:7

Ẹre ọ ghi na kha wẹẹ, “I gha fuẹn iran an ighẹ emwa ne I yi, I gha fuẹn iran an ighẹ avbe aranmwẹ kevbe ahianmwẹ rhunmwuda I kpa rẹn I ghẹ yi iran.”

Job 14:4

Emwi ọkpa ne ọ huanrẹn, ne ọ gha sẹtin ke uwu emwi ne ọ gbe iruẹn zẹ vbene ọmwa nagbọn ye rre, ẹ i rrọọ.

Psalm 51:5

Emwi dan ọ re I wa khin, kevbe ne a ya biẹ mwẹ gha dee, I keghi wa vuọn ne orukhọ ke ẹdẹ ne a biẹ mwẹ kpao.

Psalm 58:3

Emwi dan, ọ re avbe emwa dan, wa ya ẹdagbọn iran hia ru. Ẹdẹ ne a biẹ iran, ọ re iran ke ta ohoghe.

Psalm 58:4

Iran vuọn ne obi zẹ vbe ẹyẹn iran ghi khiọ ehọ iran vbe ẹyẹn ne ọ yin ehọ.

Ẹksọdọs 29:18

U ghi wa giẹn ogho nii hia vbe uhunmwu aka. Izọhẹ ne a giẹn ne Nọyaẹnmwa ọre ọna khin, izọhẹ ne a ya erhẹn ru nọ ke ẹe kevbe uwinhinmwẹ ne ọ yẹ mwẹ.

Ẹksọdọs 29:25

Iyeke ọnii, u ghi miẹn iran evbare nii, u ghi giẹn ọnrẹn vbe uhunmwu aka, vbe uhunmwu avbe emwi imuohan na a giẹn uan, ne ọ miẹn ehe na rhie uwinhinmwẹ ne ọ yẹ mwẹ ladian, emwi imuohan evbare ne a ya rhie gun mwẹ nọ.

Itan 20:9

A gha gele miẹn ọmwa ne ọ gha sẹtin kha wẹ ekhọe irẹn i gu irẹn gui hiehiere kevbe wẹ rẹn wa khọnmiotọ nẹ vbe uhunmwu orukhọ irẹn hia.

Asan-Ibo 7:20

Orhiọnkpa i rre agbọn na ne ọ wa ru emwi ẹse khian ne ẹ i vbe mwẹ abakuru.

Aizaia 47:12

Gha kun egba kevbe akpalode ruẹ khian erriọ ọ re u kun ẹnrẹn khian ke ẹghẹ ọvbokhan gha dee. U gha ghe a gha miẹn emwi ne iran gha ru ne uẹn; u gha ghe, u gha sẹtin runran avbe eghian ruẹn.

Aizaia 47:15

Emwi ne ọ maa ọkpa ne iran ra ru ne uẹn ọ re ọnii khin avbe iweuki nii ne u gha lẹ bu yo vbe ẹdẹ agbọn ruẹn hia. Iran hia gha sẹ uẹ rae, iran ghi khian okhian ọghe iran ọkpa ighi vbe kẹe vbọ ne ọ gha miẹn ruẹn fan.”

Aizaia 48:8

Mẹ rẹnrẹn wẹ wa i gia mu ẹtin yan wẹ, etẹ ọ re a rẹn uwa yi ẹdẹ. Onii ọ sii ẹe ne uwa ma na zẹdẹ họn vbekpa ọnọna hiehiere ne ifi ẹmwẹ ọkpa vbọ ma na vbe fi la uwa ehọ.

Aizaia 53:6

Ma hia fẹẹrẹ keghi yevbe ohuan ni wiri dọmwadẹ ọghọe kegha khian ọghọe khian. Sokpan e Nọyaẹnmwa keghi kun oya ni yan rẹn oya ne ọ te khẹ ke ima hia.

Aizaia 65:6

“I mwamwa oya ne I gha rri iran re yotọ nẹ. Avbe gbẹn abe ne a bu gbe iran yotọ nẹ. Mẹ i ra fi aro ua vbe emwi ne iran ru, I gha ha ẹre werriegbe ne iran

Jerimaia 17:9

Gha ọ gha sẹtin rẹn otọ vbene ekhọe ọmwa nagbọn ye hẹ? Emwi ọvbehe ne ọ rẹrẹ ọmwa vbe ne irẹn ye i rrọ ọ khuọnmwi gberra ne ọ gie sinmwi nẹ.

Jerimaia 18:12

Iran gha wanniẹn wẹẹ, ‘Ẹn o, vbọzẹ? Ma gha wa ze vbe udu, a ghi vbe gha ru emwi dan khian zẹ vbene ima ho ne ima gha ru.’ ”

Jerimaia 8:6

I wa gbe ehọ kotọ gha danmwehọ, sokpan wa ma ta ẹmwata. A ma miẹn ọkpa ne ọ vbe khiẹ ye ẹmwẹ emwi dan ne ọ ru. A ma miẹn ọkpa ne ọ, vbe nọ wẹẹ, ‘De emwi ne I baku ru?’ Dọmwadẹ ọghọe wa rhie uhunmwu da odẹ ọre zẹ vbe ẹsin ne ọ khọn rrie okuo.

Ezikiẹl 20:41

“I gha ghi viọ uwa ke avbe ẹvbo ne a zagha uwa kui gha dee nẹ, I na vbe do si uwa koko, I gha rhan obọ miẹn ese ne uwa gien rẹn, avbe uhunmwu ẹvbo gha vbe miẹn wẹ ọmwa nọhuanrẹn ọ re imẹ khin.

Levitikọs 1:13

Ọmwa nii ghi kpe ibiẹ ọre kevbe owẹ ọre, ohẹn ghi do mu ese nii gie Nọyaẹnmwa, ọ ghi giẹn ehia fẹẹrẹ vbe uhunmwu aka, uwinhinmwẹ emwi ihaoko evbare na yẹ Nọyaẹnmwa.

Levitikọs 1:17

Ọ ghi viọ ẹre ifuẹn, ọ ghi va ẹe ẹre egbe ua vbene ẹ i na yanghan ifuẹn ọnrẹn kua. Ọ ghi giẹn ọnrẹn vbe aka. Uwinhinmwẹ emwi ihaoko evbare na yẹ Nọyaẹnmwa.

Levitikọs 1:9

Okpia nii ghi kpe avbe ibiẹ ọre kevbe avbe owẹ ọre, ohẹn ne ọ ru ugamwẹ ghi giẹn ese nii hia vbe aka. Uwinhinmwẹ emwi imuohan evbare na yẹ Nọyaẹnmwa.

Levitikọs 26:31

I gha ya ẹvbo uwa hia khian ni rẹnkhẹn uan, I gha guọghọ ehe ne uwa na ga. I ghi vbe he ese ne uwa zọre.

Levitikọs 4:31

Iyeke ọnii, ọ ghi viọ ẹvbi nii rrọ hia hin rre, zẹ vbene a vbe viọ ẹvbi hin aranmwẹ ne a gbe ya sisara, ne u vbe giẹn rẹn uan vbe aka, zẹ vbe emwi ne ọ winhin ne ọ yẹ e Nọyaẹnmwa. Odẹ vberriọ ọre ohẹn gha na zọ ese ye orukhọ ọmwa nii, a ghi vbe ya bọe.

Levitikọs 8:28

E Mosis keghi miẹn iran evbare na, ọ na giẹn ọnrẹn uan vbe uhunmwu aka ese na giẹn uan, zẹ vbe ese ne a ya ma ohẹn. Ọna ke gha re izọhẹ evbare, uwinhinmwẹ ọnrẹn ke gha yẹ e Nọyaẹnmwa.

Nọmbas 15:3

A sẹtin mu ẹmila ra ohuan ra ogho ra ẹwe gie Nọyaẹnmwa zẹ vbe izọese na giẹn uan, ra izọese ne a ya mu eyan sẹ ra ne a ya sisara, ra izọese ne a ru ya dugie ugamwẹ, uwinhinmwẹ avbe izẹọhẹ evbare vberriọ wa yẹ e Nọyaẹnmwa.

Matiu 15:19

Uwu ekhọe ọre iro nọ ya ọmwa ru emwi hia ke rre: izigha, oghẹ, uyinmwẹ ohọhọ hia, oyi, ohoghe, ọtakhọ.

Iyẹn ne ọ Maan Ọghe Jọn 3:6

Ikinnegbe ọre ikinnegbe biẹ, orhiọn ọre Orhiọn vbe biẹ.

Ebe ne Pọl gbẹẹn gie emwa Rom 1:21

Iran rẹn Osanobua, sokpan iran ma rhie uyi ne ọ khẹ kẹe nẹẹn, debare, iran ma kpọnmwẹ ọẹn. Ne iran gha na te ru vberriọ, ekhọe iran keghi do khian emwi oya fẹẹrẹ.

Ebe ne Pọl gbẹẹn gie emwa Rom 3:23

Rhunmwuda, emwa hia ru orukhọ nẹ, iran keghi vbe khian rrei ne uyi imiẹnfan Osanobua.

II Kọrinti 2:15

Rhunmwuda te ima ye vbe uwinhinmwẹ eturari ne Kristi giẹn ne Osanobua, ne ọ vbe sẹ egbe iran ne a ra miẹnfan, kevbe iran ne ọ ra wiri ua.

Ẹfisọs 5:2

Wa gie aho ẹmwẹ ọmwa gha kha yan ẹdẹ agbọn uwa, zẹ vbene Kristi ho ẹmwẹ mwa, ne ọ na ya ẹdẹ agbọn rẹn fi ohan ne ima, zẹ vbe emwi imuohan kevbe emwi izọ ese ne ọ winhin, ne ọ yẹ Osanobua.

Filipai 4:18

Rhunmwuda ọnii, wa ghe ebe ọ sẹ mwẹ obọ ọghe emwi hia ne uwa he hẹ gun mwẹ, ọ wa vbe sẹ kpọ kua. Emwi ne uwa viọ ne Epafroditọs viọ gu mwẹ, sẹ mwẹ obọ nẹ nian, emwi ne I ho hia gbae. Te ena ye vbe emwi izọ ese ne ọ winhin ne a ya mu ohan gie Osanobua, emwi ne ọ yẹ ọre, ne ọ gha vbe rhan obọ miẹn.

I Jọn 5:19

Ma rẹnrẹn wẹ ọghe Osanobua ma khin kevbe wẹ Ọmwa Dan ni ọre ọ kha yan agbọn na hia.

I Samuẹl 26:19

U ghi danmwehọ mwẹ, Umogun. A deghẹ e Nọyaẹnmwa ọ re ọ werriẹ ruẹ aro da mwẹ, a gha zọ ese imuohan gie ẹe, ọ gha fi ekhọe werriẹ, sokpan, a deghẹ emwa ne agbọn ọ re ọ ru ẹe, e Nọyaẹnmwa ọ re ọ gha fi iran unu. Rhunmwuda, iran khu mwẹ hin otọe e Nọyaẹnmwa rre. Iran wẹ ne I ya gha ga ẹbọ ẹrrẹe, kevbe ne I vbe gbe ihoi vbe otọe ne Nọyaẹnmwa mu ne emwa rẹn.