Gẹnẹsis 8:20 - Edo Bible (E Baibol Ẹdo) Version 1996

²⁰ E Noa keghi gba aka ne Nọyaẹnmwa. Ọ keghi rhie ọkpọkpa vbe uwe aranmwẹ kevbe ahianmwẹ ne ẹ i mwẹ awua, ọ keghi ya iran zọ ese ne a giẹnrẹn vbe uhunmwu aka nii.

Gẹnẹsis 8:20 ပူးပေါင်းရင်းမြစ်များ

Gẹnẹsis 13:18

Rhunmwuda ọnii, Ebram na si agọ ẹre, ọ keghi ya bu ẹre ye ọkpẹn erhan iruẹmwi ọghe Mamrẹ vbe Hibrọn, ọ ke gba aka ne Nọyaẹnmwa vbe evba.

Gẹnẹsis 13:4

Ọ kegha rrie eke ne ọ ka gbe aka yi, ọ keghi ya ga e Nọyaẹnmwa vbe evba.

Gẹnẹsis 22:2

Osanobua keghi kha wẹẹ, “Rhie ovbuẹ, ovbuẹ ne ukpọmọkpa ighẹ Aizik ne u ho ẹmwẹ ọnrẹn, ne u gha rrie otọ Moraia. U ghi ya yae zọ ese na giuan, vbe uhunmwu oke ne I gha rhie ma ruẹn.”

Gẹnẹsis 22:9

Ugbẹn vbe iran ghi sẹ ehe ne Osanobua tama rẹn, Ebraham keghi gba aka, ọ na mwamwa erhan yọ, ọ keghi gba ovbi ẹre, ọ na muẹn yan aka nii vbe uhunmwu avbe erhan nii.

Gẹnẹsis 26:25

Aizik keghi gba aka ye evba ọ na ga Nọyaẹnmwa. Ọna bu agọ ẹre ye evba, avbe eguọmwadia re keghi fian uhae ọvbehe.

Gẹnẹsis 33:20

Ọ keghi gbe aka ye evba, ọ keghi he ẹre eni El gie Osanobua Izrẹl.

Gẹnẹsis 35:1

Osanobua keghi tama e Jekọb wẹẹ, “Muegbe ne u gha rrie Bẹtẹl ne u ya yin evba. U ghi gba aka mẹ vbe evba, Mẹ ne Osanobua ne ọ rhie egbe ma ruẹn vbe vba ẹghẹ ne u na gha lẹ khian hin obọ Isọ ne ọtuẹn.”

Gẹnẹsis 35:7

Ọ keghi gba aka ye evba, ọ na gha tie ẹre Bẹtẹl rhunmwuda Osanobua ye egbe naẹn miẹn vbe evba vbe ẹghẹ ne ọ na gha lẹ hin ehe ne ọtiọnrẹn ye rre.

Gẹnẹsis 4:4

Iyekọnii, Ebẹl ke mu oteghe ohuan aranmwẹ ne emwi irri ẹre ka gha biẹ rre, ọ ke gbẹe, ọ ke ya ehe ne ọ maa sẹ vbọ zọ ese. Ẹko ke rhiẹnrhiẹn Nọyaẹnmwa ghe Ebẹl ke ese ne ọ zọ re.

Gẹnẹsis 7:2

U ghi viọ ọdọ vbe amwẹ ukhukhu ihinrọn ọghe aranmwẹ ne ẹ i mwẹ awua, sokpan avbe aranmwẹ ni mwẹ awua, u ghi viọ iran ọdọ vbe amwẹ kẹkan.

Gẹnẹsis 7:3

U ghi vbe viọ ọdọ vbe amwẹ ukhukhu ihinrọn ọghe dọmwadẹ ahianmwẹ. U ghi ruẹe vberriọ ne avbe aranmwẹ ughughan, kevbe avbe ahianmwẹ ughughan ghẹ fuan ne iran miẹn ehe na dọlegbe gha biẹlẹ ye agbọn.

Gẹnẹsis 8:19

Avbe aranmwẹ oha hia ke avbe ahianmwẹ keghi ladian zẹ vbe oghẹn iran.

Job 1:5

Vbe owiẹ ne ọ ghi lele avbe ẹdẹ vberriọ, e Job ghi rhiọkpaegbe vbe owiẹ fioo, ọ ghi ya zọ ese ya họnmwẹ ivbi ẹre hia egbe ua. Emwi ne ọ ya ẹe ru ọna ọrọre wẹ rẹn rorẹe wẹ, u gha ghe, ọ defi eso unu vbọ, ọ na fi unu giẹ Osanobua.

Ẹksọdọs 10:25

E Mosis keghi tama rẹn wẹẹ, “Ọnii rhiema wẹ, wẹ ọre ọ ghi viọ aranmwẹ ne ima gha ya zẹ ese ke ihaoko ne a giẹn uan ne ima gha ya zẹ ese ghe Nọyaẹnmwa ne Osanobua mwa.

Ẹksọdọs 29:18

U ghi wa giẹn ogho nii hia vbe uhunmwu aka. Izọhẹ ne a giẹn ne Nọyaẹnmwa ọre ọna khin, izọhẹ ne a ya erhẹn ru nọ ke ẹe kevbe uwinhinmwẹ ne ọ yẹ mwẹ.

Ẹksọdọs 29:25

Iyeke ọnii, u ghi miẹn iran evbare nii, u ghi giẹn ọnrẹn vbe uhunmwu aka, vbe uhunmwu avbe emwi imuohan na a giẹn uan, ne ọ miẹn ehe na rhie uwinhinmwẹ ne ọ yẹ mwẹ ladian, emwi imuohan evbare ne a ya rhie gun mwẹ nọ.

Ebe ne Pọl gbẹẹn gie emwa Rom 12:1

Rhunmwuda ọnii etẹn mwẹ, I la ekpa itohan nọkhua ọghe Osanobua ghe emwa rinmwian uwa ne uwa ya egbe uwa fi ohan ne Osanobua zẹ vbe emwi izọ ese ne ọ ye rre agbọn, ne ọ mu aro ye ẹmwẹ iwinna ẹnrẹn, kevbe ne ọ vbe yẹ ọre. Ọnọna ọrọre ugamwẹ ẹmwata ne uwa gha rhie nẹẹn.

Hibru 13:10

Avbe ohẹn ni ga vbe uwu Ọgua ukpọn ọghe avbe Ju, i mwẹ asẹ ne iran gha ya re vbe emwi ne a ya zọ ese vbe aka ọghomwa.

I Pita 2:5

Wa gha dee zẹ vbe okuta ni rrọọ, ne uwa gia ya uwa bọ Ọgua Osa ọghe orhiọn, eke ne uwa gha na winna, zẹ vbe avbe ohẹn ni huanrẹn, ne uwa gha zọ ese orhiọn ne a ọ gia rhan obọ miẹn ghe Osanobua vbe ekpa Jesu Kristi.

I Pita 2:9

Sokpan, wa ọrọre emwa ne a hannọ zẹ, avbe ohẹn Osanobua, agbọn ẹvbo ne ọ huanrẹn, emwa Osanobua tobọ ẹre, emwa ne a hannọ zẹ, ne iran mu iwinna ọyunnuan Osanobua go, ọmwa ne ọ tie uwa ke uwu ebiebi ladian gha rrie uwu uwanmwẹ ọyunnuan.