Gẹnẹsis 46:34 - Edo Bible (E Baibol Ẹdo) Version 1996

³⁴ Wa ghi khama rẹn wẹẹ, ‘Enọwanrẹn aranmwẹ ọre ima rri ke ẹghẹ ọvbokhan mwa gha de zẹ vbe ne avbe erha mwa vbe gha ru.’ Erriọ ọre uwa gha na ya di odẹ Gosiẹn ya.” Emwi ne ọ yae ta ọna ọrọre wẹ emwa Igipt i ho ẹmwẹ avbe ọsuohuan.

Gẹnẹsis 46:34 ပူးပေါင်းရင်းမြစ်များ

Gẹnẹsis 13:7

Rhunmwuda ọnii, okhọn kegha rre ẹkpo emwa ni gbearoghe emwirri ọghe Ebram kevbe emwa ni gbearoghe ọghe Lọt, (Ẹghẹ ne a kha na, emwa Kenan kevbe emwa Pẹriz he ye rre otọe na).

Gẹnẹsis 13:8

Ẹre Ebram na khama Lọt wẹẹ, “Etẹn ma khin, ọ ma kei ne emwa mwẹ kevbe emwa ruẹn gba gha gui.

Gẹnẹsis 26:20

Iran ni su ohuan emwa Gera keghi gu emwa ni su ohuan Aizik gha muan ẹmwẹ wẹẹ, “Ma ọre ọ yan ẹzẹ na.” Rhunmwuda ọnii, Aizik kegha tie ẹzẹ nii “Ẹzọ” rhunmwuda ne iran na gui yọ.

Gẹnẹsis 30:35

Sokpan ẹdẹnẹdẹrriọ, E Leban keghi viọ avbe ovbukhọ ni hannọ igho ra ni gbẹnnẹ ekẹnnẹkẹnnẹ kevbe ẹwe amwẹ hia ni gbẹnnẹ ekẹnnẹkẹnnẹ, ni hannọ igho, kevbe ni mwẹ ehe nọfua vbe egbe, ọ kevbe viọ avbe ohuan nekhui hin rre, ọ na viọ enii ne ovbi ẹre gha su.

Gẹnẹsis 34:5

E Jekọb keghi họn wẹ iran yagha ovbi ẹre ne okhuo, sokpan, rhunmwuda ighẹ ivbiẹre rre uwu oha vbe ehe ne iran na gbearoghe ẹmila ẹre, ọ ma ru emwi rhọkpa iran te rre.

Gẹnẹsis 37:12

Etẹn e Josẹf nikpia kegha rrie Siẹkẹm ne iran ya gha gbearoghe ohuan erha iran.

Gẹnẹsis 37:2

Vbene okha ẹgbẹe Jekọb ye ọre ọna khin. E Josẹf, igbama ne ọ rre ukpo ehairrọvbugie keghi deba etiọnrẹn ivbi Bilha kevbe Zilpa ne egbakhian erha ẹe gha gbearoghe ohuan kevbe ẹwe. Ọ ghi do gha na iyẹn emwi dan ne etiọnrẹn ru ma erha ẹe.

Gẹnẹsis 43:32

Iran keghi rhie ọghe Josẹf nẹẹn, rẹn ọkpa vbe ehe ughaẹn. A kevbe viọ ọ ghe etiọnrẹn ye eteburu ọvbehe, a kevbe viọ ọghe ivbi Igipt ni deba ẹre gha rrie evbare ne iran vbe ehe ughaẹn. Rhunmwuda iran kae ye awua ne a deba emwa Hibru gha rri evbare.

Gẹnẹsis 45:10

U sẹtin tota ye Gosiẹn ehe ne u gha na sikẹ mwẹ. Wẹ kevbe ivbuẹ kevbe avbe eyẹ ruẹ, avbe ohuan ruẹn kevbe ẹwe ruẹ kevbe ẹmila ruẹ kevbe emwi ne u mwẹ hia.

Gẹnẹsis 45:18

Wẹ ne iran viọ avbe erha iran kevbe ẹgbẹe iran ne iran bu mwẹ gha dee. I gha rhie otọ ne ọ maa sẹẹ vbe Igipt ne iran, iran sẹtin vbe gha rri emwiokọ ne ọ maa sẹẹ vbe otọe nii.

Gẹnẹsis 46:32

I gha tama rẹn wẹẹ ọsuohuan ọ re uwa khin, wa vbe gbearoghe avbe ẹmila uwa, wa viọ avbe oghẹn ohuan uwa, ke oghẹn ẹmila ke emwi ne uwa mwẹ hia gha dee.’

Gẹnẹsis 47:11

Ẹre Josẹf na do gbe erha ẹe kevbe etiọnrẹn ẹkun sotọ vbe Igipt, ọ na viọ emwi ne iran vbe ehe ne ọ maa sẹẹ vbe otọe nii vbe asefẹn Ramesis zẹ vbe ne ọba tae.

Gẹnẹsis 47:3

Ọba keghi nọ iran wẹẹ, “De iwinna ne uwa winna?” Iran wanniẹn wẹẹ, “Ọsuohuan ma khin enọwanrẹn, zẹ vbene avbe erha mwa vbe gha ye.

Gẹnẹsis 47:4

Te ima do yin ẹvbo na, rhunmwuda vbe otọ Kenan, ukhunmwu fi sẹrriọ wẹ, avbe emwirri i ghi miẹn irunmwu re. Lahọ, ne ima yin odẹ Gosiẹn.”

Gẹnẹsis 47:6

otọe Igipt rre iran evba nii, gie iran yin odẹ Gosiẹn, ehe ne ọ maa sẹẹ vbe otọe na, adeghẹ a ghi vbe miẹn ne ọ gha sẹtin vbe uwu iran, we ne iran gha gbearoghe avbe emwirri mwẹ.”

Ẹksọdọs 8:22

Vbe ẹdẹ ne ẹdẹrriọ, mẹ gha sẹ otọe Gosiẹn rae, ehe ne avbe emwa mwẹ ye, a ghi miẹn wẹ ikian i rre odọ, ne u miẹn ehe na rẹn wẹ mẹ ne Nọyaẹnmwa ọre ọ winna vbe ẹvbo na.

Ẹksọdọs 8:26

E Mosis keghi wanniẹn wẹẹ, “Ẹ i re emwi ne ọ gbae ne ima ru vberriọ, rhunmwuda avbe aranmwẹ ne ima ya zọ ese ghe Nọyaẹnmwa Osanobua mwa gha sọnnọ ivbi Igipt, ma gha ye aranmwẹ ne ivbi Igipt wua zọ ese vbe ehe ne iran gha na bẹghe mwa, iran gha filo okuta gbele ima an.