Gẹnẹsis 44:30 - Edo Bible (E Baibol Ẹdo) Version 1996

^30-31 E Juda keghi kha wẹẹ, “Banbanna nian, enọwanrẹn, a deghẹ mẹ na bu erha mwẹ vbene I ma na rhie ọmọ ni mwẹ obọ, ọwarọkpa vbe ọ gha wa miẹn wẹ ọmọ ni i gue mwẹ, ọ ghi wa wu, enọwanrẹn, akhiẹ ne ima gha si ye erha ima egbe vbe ẹghẹ ọmaẹn ẹnrẹn gha gbe ẹe rua.

Gẹnẹsis 44:30 ပူးပေါင်းရင်းမြစ်များ

Gẹnẹsis 44:17

E Josẹf keghi wanniẹn wẹẹ, “Hiehiere! mẹ i khian ru vberriọ, ọmwa ne a miẹn ukpu nii vbe obọ ẹre ọkpa ọre ọ ra gha re ọviẹn mwẹ. Wa nekpa sẹtin bu erha uwa gha khian vbe egbe hẹnnẹdẹn.”

Gẹnẹsis 44:20

Enọwanrẹn, ewanniẹn ne ima rhie nuẹn ọrọre wẹẹ, ‘Ma ye mwẹ erha ne ọ khian ọmaẹn nẹ kevbe ọtẹn okpia ọkpa ne ọ re ọvbokhan ne a biẹ nẹẹn vbe ọ khian ọmaẹn nẹ. Ọtẹn ọvbokhan okpia nọkpa wu nẹ, rẹn ọkpa ọ re ọ ghi kẹe vbe emọ ne iye ẹe biẹlẹe, erha ẹe wa vbe ho ẹmwẹ ọnrẹn ẹsẹse.’

Gẹnẹsis 44:22

Ma na ghi tama ruẹn wẹẹ, ‘Ọmọ nii i sẹtin kpao sẹ erhae rae, a deghẹ ọ kpao, erhae gha wu.’

Gẹnẹsis 44:34

Vbia ra bu erha mwẹ gha rrie owa hẹ vbe ne ọvbokhan nii i na gue mwẹ? Mẹ i sẹtin zin ẹnrẹn ne I miẹn ọkhọ vbe nian ne ọ sunu vbe egbe erha mwẹ.”

II Samuẹl 18:33

Akhiẹ keghi gba ọba ẹko ọ keghi la ughugha ne ọ rre iyeke onurho, ọ na viẹ. Vbene ọ khian nii, ọ kegha viẹ wẹẹ, “Ovbi mwẹ o, ovbi mwẹ, Absalọm, Absalọm ne ovbi mwẹ, mẹ ọ re uwu ne ọ gbuẹ gha te gbe, ovbi mwẹ, Absalọm ne ovbi mwẹ!”

I Samuẹl 18:1

Ugbẹn vbe Sọl vbe Devid ghi gha guan nẹ, ẹmwẹ e Devid keghi wa la e Jonatan ekhọe sẹrriọ wẹ, ọ keghi ho ẹmwẹ ọnrẹn zẹ vbe ne ọ ho ẹmwẹ egbe ẹre.

I Samuẹl 25:29

Adeghẹ ọmwaikọmwa vbe dekun ruẹn, ọ na wẹ rẹn ra gbe ua, e Nọyaẹnmwa, Osanobua ruẹ gha rhie ruẹ lẹre, zẹ vbene ọmwa rhie emwi ighobioye lẹre. Zẹ vbe ọghe avbe eghian ruẹn, vbene ọ rhirhi a gha ye hẹ, e Nọyaẹnmwa gha filo iran kua zẹ vbe ne ọmwa ye umọvọn filo okuta kua.