Gẹnẹsis 42:6 - Edo Bible (E Baibol Ẹdo) Version 1996

⁶ Zẹvbe enọkhaemwisẹ yan Igipt, e Josẹf ghi rre, iran keghi viọ ẹko rhu otọ vbe odaro ẹre.

Gẹnẹsis 42:6 ပူးပေါင်းရင်းမြစ်များ

Gẹnẹsis 18:2

ọ ghi tọn aro mu vbe ọwarọkpa, ọ keghi ya dẹghe ikpia eha vbe iran mudia vbe evba. Ọwarọkpa nii vbe ọ ghi wa bẹghe iran, ọ keghi rhulẹ ke onurho owa ukpọn rẹn kpao ya vba iran. Ugbẹn vbe ọ ghi diguẹ mu aro rhuotọ nẹ, ọ wẹẹ,

Gẹnẹsis 19:1

Ugbẹn vbe avbe odibosa eva nii ghi sẹ Sọdom vbe ẹghẹ ota, e Lọt keghi rre ehe ne ọ tota yi vbe onurho ẹvbo nii, ehe ne emwa na ko. Ugbẹn vbe Lọt ghi wa bẹghe iran, ọ keghi guakpao ya vba iran. Ọ keghi diguẹ mu aro rhuotọ vbe odaro iran.

Gẹnẹsis 33:3

E Jekọb keghi ke odaro ne iran hia, ọ na mu ẹko rhuotọ igba ihinrọn vbe ọ te do sẹ ehe ne ọtiọnrẹn ye.

Gẹnẹsis 41:43

Ọ ke wẹ ne ọ hin ikẹkẹ okhuae nogieva ọghe ọba, iran ni wan ẹvbo hin odẹ rre ke odaro nẹẹn gha go wẹẹ, “Wa wan ruan.” Erriọ ọre a ya ye Josẹf ru enọkhaemwisẹ yan Igipt.

Gẹnẹsis 41:54

Ukpo ihinrọn ọghe ukhunmwu keghi suẹn vbene Josẹf wa tae zẹẹ. Ukhunmwu kegha fi vbe ẹvbo nekpa hia, sokpan evbare kegha rre Igipt la ehe ne ọ sẹe ehe ne ọ rhanmwẹ.

Gẹnẹsis 41:57

Emwa kegha ke otọ agbọn hia rrie Igipt ne iran do gha gu e Josẹf dẹ ọka, rhunmwuda obọ ukhunmwu nii keghi wa vbe dotọ vbe otọ agbọn hia.

Gẹnẹsis 44:14

Ugbẹn vbe Juda kevbe etiọnrẹn ghi sẹ owa e Josẹf, te ọ he ye rre evba. Iran keghi vbẹrre nẹ.

Gẹnẹsis 45:26

Iran tama rẹn wẹẹ, “E Josẹf ye rre agbọn! Rẹn ọ re ọ khaemwisẹ yan Igipt hia!” Ọ keghi yan e Jekọb unuan, ọ ma ya iran yi.

Gẹnẹsis 45:8

Rhunmwuda ọnii, ẹ i re uwa ọre ọ gie mwẹ gha die edinran sokpan Osanobua nọ. Ọ keghi ya mwẹ ru zẹ vbe ihe erha ne ọba, mẹ ọ re ọ gbearoghe ẹvbo ẹre hia kevbe ne ọ khaemwisẹ yan Igipt hia.”

Gẹnẹsis 48:12

Ẹre Josẹf na tọn iran mu hin ekuawẹ e Jekọb rre, ọ na mu ẹko rhu otọ vbe odaro ẹre.

Itan 11:26

Te emwa ya amẹ unu ne ọmwa ne ọ si evbare gboo, ọ ghi viọ iran lẹre khẹ ẹghẹ ne emwi gha na gha ghan. Sokpan, a ghi gha na erhunmwu ne ọmwa ne ọ viọ iran ladian gha khiẹn.

Aizaia 60:14

Ivbi avbe emwa ni te gha wọ ruẹ uhunmwu gha rre. Iran ghi ya uhunmwu rhanmwẹ otọ ya ọghọ nuẹn. Avbe iran ni te ka gha giọ yi. Gha do ga vbe akharha ruẹ. Iran gha tie ruẹ ‘Ore nọkhua ọghe Nọyaẹnmwa,’ ‘E Zaiọn ne Ore Nọkhua ọghe Osanobua Nọhuanrẹn Izrẹl.’

Iwinna 7:10

Ọ keghi rhie ẹre la uwu ọlọghọmwa hia gberra vbe a i mwẹ ẹbe. E Josẹf ghi sẹ ehe ne Fero ne ọba Igipt ye, Osanobua keghi rhie uyinmwẹ ọmẹhẹ kevbe ọghe ẹwaẹn nẹẹn. E Fero keghi ya Josẹf ru nọ khaemwisẹ yan ẹvbo ẹre ke ẹguae ẹre.

Arhie Maan 3:9

U ghi danmwehọ. U ma miẹn avbe otu nii, ni re ọghe Setan, avbe ọhọn ohoghe ni, ni tie egbe iran e Ju vberriọ iran i re ọre, I gha ru ẹe ne iran bu ruẹ gha dee ne iran do mu ẹko rhu otọ, ne iran vbe ya uhunmwu rhanmwẹ otọ nuẹn. Iran hia gha rẹn ighe I ho ẹmwẹ ruẹn.

I Samuẹl 20:41

Ọvbokhan okpia nii ghi kpao nẹ, e Devid keghi ladian vbe iyeke utete avbe okuta nii, ọ keghi lovbiẹ ye otọ lọlọọlọ, ọ na vbokho uhunmwu rriotọ igba eha. Rẹn kevbe Jonatan kegha viẹ vbe iran mu egbe unu hiẹnhiẹn, ẹko e Devid ọ re ọ rhia sẹ Ọghe Jonatan.