Gẹnẹsis 4:5 - Edo Bible (E Baibol Ẹdo) Version 1996

⁵ Sokpan ọ ma rhan obọ miẹn Keni ke ese ẹre. Okuosu ke rrie Keni, aro ẹre ke khọrhiọ uan vbe uhunmwu ne ohu.

Gẹnẹsis 4:5 ပူးပေါင်းရင်းမြစ်များ

Gẹnẹsis 31:2

Rẹn kevbe miẹn wẹ ekhọe Leban fiwerriẹ ghe irẹn lahin vbene ọ te ka ye de yi.

Gẹnẹsis 31:5

Ọ keghi tama iran wẹẹ, “I do miẹn wẹẹ ẹ i re aro ne erha uwa te ka ya ghe mwẹ de usin, ọ re ọ ghi ya ghe mwẹ na. Sokpan Osanobua avbe erhamwẹ ọre ọ mudia mẹ.

Gẹnẹsis 39:19

Ohu na mu arowa e Josẹf ẹsẹse.

Job 15:13

Ohu Osanobua muẹn ẹsẹse, te u gha niẹn ukpe ghe ẹre.

Job 5:2

Ne ọmwa, rhunmwuda ighẹ emwi sọnnọ ẹn, kpokpo egbe ya uhunmwu yọ, uyinmwẹ ukọnmwẹ akpa vbe abobo ọre nọ.

Psalm 20:3

Te ọ gha rhan obọ miẹn emwi imuohan ruẹn hia, ne ẹko ẹre vbe rhiẹnrhiẹn ye izọ ese ruẹ hia.

Itan 19:3

Uyinmwẹ ọzuọ ne emwa eso yin ọ re iran ya gbe egbe iran, vbe iyekọni, iran ghi gha kpe e Nọyaẹnmwa.

Itan 29:10

Emwa ne okuo ọpia yẹ, te iran ra khuiwu ọmwa ne ọ ta ẹmwata, sokpan, emwa ẹmwata ghi hẹko tan obọ ga ọmwa vberriọ.

Asan-Ibo 4:4

I vbe rẹn emwi ne ọ si ẹe nẹ, ne emwa na miẹn ẹsọn sẹrriọ vbe agbọn na, ne ọ miẹn ehe na dunna ne iran: emwi ne ọ siẹe ọrọre wẹ emwi ne ogieva iran mwẹ viẹn ye iran aro, sokpan, ọna i vbe mwẹ esa, te ọ yevbe ne a khu ẹhoho khian.

Aizaia 3:9

Ẹmwẹ ne iran rhie ye ekhọe ọ re a ra ya gu iran gui. Te iran ghi wa rhan ma orukhọ zẹ vbene emwa Sọdom ghaa ye. Ọghe iran fo ne, obọ iran ọ re iran ya sii ẹe gie egbe iran.

Nọmbas 16:15

Ohu keghi mu e Mosis, ọ na tama e Nọyaẹnmwa wẹẹ, “Ghẹ rhan obọ miẹn izẹ ọhẹ rhọkpa ne iran na viọ rre. Ne I ru ẹre emwi rhọkpa irrọ vbe uwu iran, I ma vbe mu vbe uwu avbe ekẹtẹkẹtẹ iran.”

Matiu 20:15

Wẹ ma yayi ighe I sẹtin lo igho mwẹ vbe ne ọ khọnmwẹ, ra te ohu mwẹ ghi mu uẹn rhunmwuda ighe I ze emwi obọ?’ ”

Iwinna 13:45

Ugbẹn vbe avbe Ju ghi miẹn ubunmwẹ ẹvbo, igbọvo keghi vuọn iran ekhọe, iran kegha gbe odan ye ẹmwẹ ne Pọl ta, iran na gha ya ukpẹ sakan ẹn.

Hibru 11:4

Iyayi ọre Ebel ya zọ ese ne ọ maa sẹ ọghe Ken ghe Osanobua. Rhunmwuda iyayi ẹre, ọre Osanobua na kae ye ọmwa ẹmwata, rhunmwuda Osanobua tobọ ẹre rhan ohọ miẹn emwi imuohan rẹn.

Ebe ne Jud gbẹẹn 1:11

Umiẹn agbọn ne iran ye. Odẹ ne Ken lae ọre iran vbe la, iran keghi rhunmwuda igho ya egbe iran fi ohan ne abaku ru, zẹ vbene Balam ru. Isọtẹ fuẹn iran uan, zẹ vbe ne Kora sọtẹ.

I Samuẹl 16:7

Sokpan, e Nọyaẹnmwa tama rẹn wẹẹ, “Ghẹ ghe ẹre wẹ ọ tanẹn ra wẹ ọ mose, mẹ he ẹe nẹ, rhunmwuda, ẹ i re vbene ọmwa ne agbọn ghe emwi ọ re imẹ ghe ẹre. Agbọn ghe ikpakpa, sokpan, ekhọe imẹ ghe.”