Gẹnẹsis 4:14 - Edo Bible (E Baibol Ẹdo) Version 1996

¹⁴ Te u ghi khu mwẹ hin otọ na rre na, kevbe hin odaro ruẹ rre. I ghi khian ehevbehevbe ke enọkpolugho vbe agbọn, ọmwa ne ọ rhirhi miẹn mwẹ ghi gbe mwẹ uan.”

Gẹnẹsis 4:14 ပူးပေါင်းရင်းမြစ်များ

Gẹnẹsis 3:24

Vbe odẹ ahọ ọghe ogba nii, rẹn keghi viọ emwi ne a yi ni ma he wu eso yọ, ke iran ke umozo ne erhẹn ne ọ baa ne ọ vbe gbe lẹga egbe hia. Wẹẹ ne iran ghẹ gie ọmwarhọkpa sikẹ erhan arrọọ nii.

Gẹnẹsis 4:13

E Keni keghi tama Nọyaẹnmwa wẹẹ, “Oya ne u rriọ mwẹ re na wegbe gbe ne egbe mwẹ gha sẹtin rrọọ.

II Samuẹl 14:7

Ne a ghi ye na nian enọwanrẹn, etẹn mwẹ hia wa hẹ aro da mwẹ, iran wẹ ne I rhie ovbi mwẹ ne iran, ne iran gbe ẹe rua ba ẹmwẹ ne ọ na gbe ọtiọnrẹn uan. Iran gha ru emwi na, mẹ ghi wa do khian ne ẹ i ghi mwẹ ọmọ okpia. Iran gha wa rhu mwẹ ukparo ọkpa ne I te mwẹ, iran ghi do ya ọdọ mwẹ khian ne ẹ i ghi mwẹ ọmọ okpia ne ọ gha ya eni ẹnrẹn khian ne ọ ma gbe ẹro.”

Psalm 109:10

Te avbe ivbi ẹre gha khian enọkpolugho ni vbu evbare re; te a gha vbe khulo iran kua, vbe uwu itowa ne iran te vbe ye.

Psalm 109:12

Ai gha miẹn ọmwa ne ọ gha tohan rẹn, ra ne ọ gha koko emọ ne ẹ i mwẹ erha ne ọ sẹrae.

Psalm 143:7

Zẹ ẹmwẹ wanniẹn mwẹ nian, Nọyaẹnmwa, egbe fu mwẹ nẹ, ghẹ ghi rhie aro lẹre mẹ ne I ghẹ do ya khian okpa vbe uwu iran, ni tuorre rrie ehe ne iran ni wulo nẹ ye.

Itan 14:32

Emwi dan ne emwa dan ru ọ re iran ya gbe egbe iran; sokpan uyinmwẹ ekhọe esi ọ re ẹmwata ya da egbe yi.

Itan 28:1

Ọmwa dan ghi gha lẹ, vbene ọmwa rhọkpa ma na khu ẹe, sokpan ọmwa esi ghi din zẹ vbe oduma.

Aizaia 8:22

ra iran ghi gha ghe otọe sokpan, iran i ra bẹghe emwi ọvbehe gberra ọlọghọmwa kevbe ebiebi, ebiebi ne ọ gbe orrirri ne iran ra khulo iran lao. Odẹ ne iran gha la miẹn uhunmwu vbe egbe ọlọghọmwa na, ẹ i rrọ.

Jerimaia 52:3

Ohu ivbi e Juda kevbe ivbi e Jerusalẹm keghi mu e Nọyaẹnmwa sẹrriọ wẹ ọ keghi viọ iran hin ehe ne irẹn ye rre. E Zedekaia keghi sọtẹ ọba e Babilọn ighẹ Nebukiadneza.

Hozia 13:3

Rhunmwuda ọnii, a gha ho iran na bẹkun vbe evbu owiẹ ne ọ wa khian ne a ma ghi miẹn vbe ẹdẹ ma he khian hiehiere. Iran gha yevbe ebe ne ọ kakae ne ẹhoho hoho kua vbe ehe ne a na wiẹn ọka, zẹ vbe ighogho ne ọ ke ukoni ladian.

Levitikọs 26:17

I gha werriẹ aro da uwa, vbe ne a gha na miẹn wẹ a khọn miẹn uwa otọ, iran ni khuiwu uwa ghi gha khaemwisẹ yan uwa, wa gha runran sẹrriọ wẹ wa ghi gha lẹ vbene ọmwarhọkpa ma na khu uwa.

Levitikọs 26:36

“I gha runran uwa ni rre imu vbe ẹvbo ẹrrẹe sẹrriọ wẹ, owogho ebe ne ẹhoho mu khian ghi si ulẹ ye uwa egbe. Wa ghi rhulẹ zẹ vbene a miẹn wẹ odaro okuo ọre a na khu uwa khian, wa ghi vbe dele vbe eghian ma sikẹ uwa.

Nọmbas 35:19

Ọtẹn ọmwa ne ọ wu nii, ne ọ ghi sikẹ ọre sẹ ọ re ọ bi ye ọre egbe ne ọ gbe ọmwa ne ọ de izigha nii uan. Ọ gha miẹn ọẹn, ọ ghi gbẹe.

Nọmbas 35:21

Te ọ gbe ẹre ekpa, te ọ de izigha, a ghi gbe ẹe rua. Ọtẹn ọmwa ne ọ wu nii ne ọ ghi sikẹ ọre sẹ, ọ re ọ bi ye ọre egbe ne ọ ghi gbe ẹe rua, ighẹ izigha nii, ehe ne ọ rhirhi na miẹn ọẹn, ọ ghi gbẹe rua.

Nọmbas 35:27

ọ re etẹn ọmwa nọwu nii na miẹn ọẹn, iran na gbẹe rua, egbe irria ikhi vberriọ a i tie ẹre izigha.

Matiu 25:41

“Rẹn ghi tama iran ni rre ọre obọ iye ọmwa wẹẹ, ‘Wa kpao vbe ehe ne I ye rre, wa ne Osanobua fi ẹre unu, wa gha rrie uwu erhẹn etẹbitẹ ne a kpehe ẹre ye otọ khẹ Esu kevbe avbe odibo ẹre.

Matiu 25:46

A ghi hẹ iran na gha rrie uwu irrioya ne ẹ i mwẹ ọfo, avbe emwata ghi gha rrie arrọọ etẹbitẹ.”

Diuteronomi 28:64

“E Nọyaẹnmwa ghi zagha uwa lele agbọn ẹvbo. hia ke obọ ọkpa vbe ufomwẹ agbọn yasẹ obọ nọkpa, evba wa ghi na ya gha ga ẹbọ ne a ya okuta kevbe erhan ru, avbe ẹbọ ne uwa, ra avbe erha uwa odede ma he ga ẹdẹ.

Diuteronomi 28:65

Wa i ra miẹn ọfumwegbe vbe ehe rhọkpa, ihe ọkpa ne uwa gha vbe tie ẹre ọghe obọ uwa ẹ i vbe rrọọ; e Nọyaẹnmwa ghi ya ohawa, a i ghi mwẹ idaehọ kevbe ẹtinfomwẹ yọ uwa ẹwu.

II Tẹsalonaika 1:9

Oya ne iran ra re ọrọre ọfuan etẹbitẹ, a ghi wannọ iran fua hin ehe ne Nọyaẹnmwa ye rre, kevbe hin ehe ne ẹtin uyi ẹre ye rre.