Gẹnẹsis 32:9 - Edo Bible (E Baibol Ẹdo) Version 1996

⁹ Ẹre Jekọb na na erhunmwu wẹẹ, “Osanobua Ebraham ne erhamwẹ odede kevbe ọghe Aizik ne erhamwẹ, u ghi danmwehọ mwẹ, wẹ ọ re ọ tama mwẹ Nọyaẹnmwa wẹẹ, ‘Ne I werriegbe gha rrie ẹvbo mwẹ ne I vbe bu avbe etẹn mwẹ, wẹẹ u gha ruẹe ne emwi hia gha ma mẹ.’

Gẹnẹsis 32:9 ပူးပေါင်းရင်းမြစ်များ

Gẹnẹsis 17:7

“I gha mu eyan mwẹ sẹ ne uwẹ kevbe avbe ivbi uniẹn ruẹn vbe orre ne ọ dee zẹ vbe ile itẹbitẹ. Mẹ gha re Osanobua ruẹ kevbe Osanobua ọghe uniẹn ruẹn.

Gẹnẹsis 28:13

Iyekọni, ọ keghi miẹn vbe Nọyaẹnmwa mudia ke irẹn, ọ wẹẹ, “Mẹ ọrọre Nọyaẹnmwa, Osanobua Ebraham kevbe Aizik. Otọ ne u lovbiẹ yi na, I gha yae nuẹn ke uwẹ kevbe uniẹn ruẹn,

Gẹnẹsis 28:15

Yẹrẹro, I gha rrọọ yaba ruẹ, I ghi gha degue ruẹ vbe ehe ne u rhirhi a gha rrie, I ghi vbe dọlegbe rhie ruẹ gha die otọ na. Mẹ ira suẹ rae I te do ru avbe emwi ne I tama ruẹn na.”

Gẹnẹsis 31:13

Mẹ ọrọre Osanobua ne ọ rhiegbe ma ruẹn vbe Bẹtẹl ehe ne u na tue ofigbọn yan okuta ya zẹ ayere, ne u na vbe yan. Banbanna nian, mu egbe ne u gha rrie ẹvbo ruẹ ehe ne a na biọ.’ ”

Gẹnẹsis 31:29

I wa mwẹ ẹtin ne I ya ruẹ emwi nian sokpan, vbe nasọn, Osanobua erhaa keghi tama mwẹ wẹẹ, ‘Ghẹ ru emwi rhọkpa ne ọ gha mu e Jekọb orhiọn rueghe hiehie.’

Gẹnẹsis 31:3

Ẹre Nọyaẹnmwa na tama rẹn wẹẹ, “Werriegbe gha rrie ẹvbo erhaa kevbe avbe etuẹn, I gha ya ba ruẹ.”

Gẹnẹsis 31:42

Akpawẹ ẹ i re ne Osanobua avbe erhamwẹ, Osanobua Ebraham, Osanobua ne Aizik gae, na ya ba mwẹ, u gha we mwẹ fiabọ gha rrie nẹ. Sokpan Osanobua bẹghe ọlọghọmwa ne I ye kevbe ẹsọn ne I he miẹn, ọ re a na miẹn wẹẹ vbe nasọn ọ keghi bu ohiẹn.”

Gẹnẹsis 31:53

Osanobua Ebraham kevbe Osanobua e Nahọ gha bu ohiẹn imẹ vbe ruẹ.” E Jekọb keghi ya eni Osanobua ne erha ee ighẹ Aizik ga, yan eyan wẹẹ rẹn gha rhie uhi nii mwẹ.

Gẹnẹsis 32:8

“A deghẹ Isọ ghi rre do gu otu n okaro gbinna, ọkpa sẹtin lẹ fe.”

Gẹnẹsis 49:25

Osanobua erhaa ọrọre ọmwa ne ọ yuẹ obọ, Osanobua Noghodua, ọrọre ọmwa ne ọ fiangbuẹ. Afiangbe ọghe amẹ ke odukhunmwu rre kevbe ọghe avbe odin amẹ kevbe uwu otọ gha dee, afiangbe ọghe ẹmila nibun kevbe emọ.

II Krọnikol 20:12

We ọrọre Osanobua mwa! Rri iran oya, rhunmwuda, ma i miẹn emwi ọkpa ru vbe ehe ne ivbiyokuo ni bun sẹ nian na, ni gu ima khọn ye, ma ma rẹn emwi ne ima gha ru, sokpan, aro ruẹ ma ghi ghe ne iyobọ.”

II Krọnikol 20:6

Ọ keghi ya urhu ne ọ la na erhunmwu wẹẹ, “E Nọyaẹnmwa ne Osanobua avbe erha mwa odede, wẹ ọ re ọ ke ẹrinmwi khaemwisẹ yan avbe okpẹvbo ni rre otọ agbọn hia. Wẹ mwẹ ẹtin, u kevbe kpolo, ọmwa ọkpa i rrọ ne ọ gha sẹtin muan ruẹn ẹmwẹ,

II Krọnikol 32:20

Ẹre Hẹzekaia ne ọba kevbe Aizaia ne akhasẹ ne ovbi Amọz na na erhunmwu ghe Osanobua iran na datu tie ẹre ne ọ yi iran obọ.

Psalm 50:15

Ibaro gha rre, kpe tie mwẹ, I gha miẹn ruẹn fan wẹ ghi do gha rho mwẹ.”

Psalm 91:15

Iran gha kpe tie mwẹ, I gha yaba iran vbe iran a gha rre uwu ibaro. I gha miẹn iran fan I gha vbe ye ọghọ ne iran.

Ẹksọdọs 3:6

Ọ keghi tama rẹn, “Mẹ ọrọre Osanobua erha a, Osanobua ọghe Ebraham, Osanobua ọghe Aizik, kevbe Osanobua ọghe Jekọb.” E Mosis keghi mu emwi rhu aro rhunmwuda ohan ma gi ẹe ẹre ghe Osanobua.

Jerimaia 32:16

I ghi rhie ebe ne a ya do ẹki nii ne Barọk nẹ, I keghi na erhunmwu wẹẹ,

I Samuẹl 30:6

Uwu ọlọghọmwa nọkhua ọre Devid ghi ye rhunmwuda ẹko ma maa rẹn hiehie rhunmwuda ivbi iran ne iran ma ghi miẹn, iran na gha yan ighẹ iran ra filo okuta gbe ẹe rua, sokpan, e Nọyaẹnmwa ne Osanobua ẹre keghi rhie igiẹudu ne ẹẹn.