Filipai 1:5 - Edo Bible (E Baibol Ẹdo) Version 1996

⁵ Rhunmwuda vbe ne uwa ya ru iyobọ mẹ hẹẹ vbe ẹmwẹ iyẹn ne ọ maa, ke ikpẹdẹ ne okaro dandaandan do sẹ wanwanna.

Filipai 1:5 ပူးပေါင်းရင်းမြစ်များ

Iwinna 2:42

Iran keghi wa ya ẹghẹ iran hia gha ruẹ emwi vbe obọ avbe ukọ, iran keghi rhie egbe ba iran. Iran kevbe gha re vbe evbare ne iran hia gha re, iran kevbe gha deba iran na erhunmwu.

Ebe ne Pọl gbẹẹn gie emwa Rom 11:17

A ghi giagia ahọ eso kua vbe erhan ohọ ne a kọe, a keghi do mu abọ erhan ohọ ni rre oha mama yọ. Wa ne ẹ i re Ju, te uwa yevbe erhan ohọ ni rre oha nii, wanwan nian, agbọn ẹfe kevbe ne ọ mwẹ ẹtin ne ọre ọghe avbe Ju, sẹ uwa obọ.

Ebe ne Pọl gbẹẹn gie emwa Rom 12:13

Wa gha ghae ne etẹn uwa ne ẹ i mwẹ emwi vbe uwu emwi ne uwa mwẹ, wa gha sẹ oyaya mu erhunmwuyẹn.

Ebe ne Pọl gbẹẹn gie emwa Rom 15:26

Rhunmwuda, avbe esọsi ni rre Masidonia kevbe Gris ya ẹkoata zẹ emwi obọ ne iran ya ye ivbi ogue ni rre uwu emwa Osanobua ni rre Jerusalẹm obọ.

I Kọrinti 1:9

Osanobua ne ọ tie uwa ne uwa do gha gu Jesu Kristi ne Ovbi ẹre mu obọ, ọmwa ne ọ kere ne a mu ẹtin yan nọ.

II Kọrinti 8:1

Etẹn mwẹ, ma ho ne uwa rẹn iwinna ne ẹsọhẹ Osanobua he winna vbe esọsi ne ọ rre Masidonia.

Ẹfisọs 3:6

Nene oro ọ na khin wẹẹ, rhunmwuda iyẹn ne ọ maa, iran ne ẹ i re Ju, vbe gu iran ne Ju ghae vbe afiangbe Osanobua ina egbe ọkpa nii ọre iran hia khin, iran vbe mwẹ oghae vbe emwi ne Osanobua la ekpa Kristi Jesu ve.

Filipai 1:12

I ho ne uwa rẹn etẹn mwẹ, wẹ, emwi hia ni sunu vbe egbe mwẹ, wa ru iyobọ ye alaghodaro iyẹn ne ọ maa.

Filipai 1:16

Aho ẹmwẹ ọmwa ọre ọ ya iran na ru vberriọ, rhunmwuda iran rẹnrẹn wẹ te Osanobua yae fian okhuo mẹ wẹ, ne I ya gha mu ẹzọ iyẹn ne ọ maa na gui.

Filipai 1:27

Banbanna nian, emwi ne a mobọ kha ọrọre ne uyinmwẹ uwa gha re vbene iyẹn ne ọ maa ho ne ọ gha ye, vbene a gha na miẹn wẹ, te I ghi sẹtin rre do miẹn uwa ra I ma sẹtin rre, I ghi gha họn wẹ, wa mudia vbene ekhọe uwa na kugbe vbe ọghe emwi ne uwa ru, wa ghi ku obọ gbe gha gbinna khian ne iyayi, kevbe iyẹn ne ọ maa.

Filipai 1:7

Ẹmwẹ uwa i lahin ekhọe mwẹ rre, rhunmwuda ọnii, emwi ne ọ kere nọ ne ẹmwẹ uwa gha ye rriọ vbe ekhọe mwẹ. Rhunmwuda, wa hia gun mwẹ ghae vbe emwi ne Osanobua ya mu ọghọ yọ mwẹ egbe na, kevbe ẹghẹ ne I na rre uwu eghan na, kevbe ẹghẹ ne idobo i na rrọọ mẹ, vbe i a gha mu ẹmwẹ iyẹn ne ọ maa gui, kevbe I a vbe gha ya ẹre igiẹ mu otọ.

Filipai 2:12

Rhunmwuda ọnii, ọse mwẹ ni ghan, vbene uwa wa gha họn ẹmwẹ mẹ ẹghẹ ne I na rre ehe ne uwa ye, ẹghẹ na ọre ọ na mobọ ke nian ne uwa gha họn ẹmwẹ mẹ vbe ne a ghi na miẹn na ighẹ I i ghi rre ehe ne uwa ye. Wa gha ya ohan kevbe uguọmwẹ winna khian, ne uwa miẹn ehe na ru ẹmwẹ imiẹnfan uwa fo,

Filipai 2:22

Wa tobọ uwa miẹn vbene ọ vbe ta egbe ọmwa ne irẹn khin hẹ, vbe imẹ vbe ọre gba winna, zẹ vbe ọmọ vbe erha ye iwinna iyẹn ne ọ maa.

Filipai 4:3

Kevbe uwẹ, ogieva mwẹ ne ekhọe esi ne ima gba winna kugbe, lahọ ru iyobọ ne avbe ikhuo na, rhunmwuda, iran mobọ kakabọ gun mwẹ winna vbe uwu ne a na kpe orhu iyẹn ne ọ maa, kevbe Klẹmẹnt kevbe avbe iho mwa nekpa ne ima gba winna, eni emwa ne a gbẹnnẹ ye uwu ebe ẹfe ọghe Osanobua nẹ.

Failimọn 1:17

Rhunmwuda ọnii, a deghẹ u gele ka mwẹ ye ogieva ruẹ, rhan obọ miẹn rẹn la owa, zẹ vbe ne u gha vbe rhan obọ miẹn imẹ la owa.

Hibru 3:14

Rhunmwuda, otu Kristi ma hia ye, deghẹ ma mu uhunmwu kọ ẹe gbangbaangban, ya sẹ ufomwẹ, ighẹ a mu ẹtin yan ne ima gha mwẹ vbe omuhẹn.

II Pita 1:1

E Saimọn Pita ne ọguọmwadia kevbe ukọ Jesu Kristi, ọre ọ gbẹn ebe na gie avbe emwa ni ne a la ekpa ẹmwata Osanobua mwa kevbe Jesu Kristi Ọmiọnmwafan mwa rhie iyayi ighobioye ne ọ vbe ye vbe ọghomwa na nẹ.

I Jọn 1:3

Emwi ne aro mwa sẹe, kevbe ne ehọ mwa họẹn, ọre ima vbe tama uwa ne uwa miẹn ehe na ya egbe ba mwa vbe uwu ne ima na gu Evbavba mu obọ kevbe Ovbi ẹre ighẹ Jesu Kristi.

I Jọn 1:7

Sokpan deghẹ ma rre uwu uwanmwẹ zẹ vbene irẹn vbe rre uwu uwanmwẹ, ẹghẹ nii, ọre ima na gu egbe mu obọ, esagiẹn Jesu ne Ovbi ẹre ghi ye ima khian ne ọ huanrẹn hin orukhọ hia rre.